ACTUALIDADE - ÚLTIMAS NOVAS

O Concello de Ribadumia informa de que dende mañá, 17 de marzo, ata o 30 do mesmo mes o Auditorio Municipal de Ribadumia acollerá a exposición itinerante “Descubrindo o rural”. Esta exposición é o resultado do concurso de fotografía organizado dende o GDR Salnés-Ulla-Umia para animar a participación pública e privada no proceso de desenvolvemento e coñecemento do noso rural e que contribúan á conservación e dinamización da nosa contorna. Os gañadores do concurso nas diferentes categorías foron agasallados con diferentes obsequios así como cunha dotación económica. Ademais de formar agora parte desta exposición que percorrerá os diferentes municipios que conforman o GDR Salnés-Ulla-Umia. A exposición poderá ser visitada os domingos dende as 18:30 h. Ou calquer outro día chamando previamente o Concello para concertar unha visita no número 986718491/99.

O Concello de Ribadumia informa de que a escola infantil de Ribadumia abre o seu prazo de reserva de praza para o vindeiro curso 2019/2020. As familias interesadas poderán tramitar as suas reservas dende o 18 de marzo ata o 1 de maio,(ámbolos dous incluidos). As solicitudes de admisión, xunto coa documentación requirida, poderán recollerse nas oficinas do concello e na propia gardería. A lista provisional de admitidos exporase a partir do 31 de maio no taboleiro de anuncios do concello e da escola. Nos últimos anos púdose dar cavida a tódolos nenos/as do concello. O curso pasado foron presentadas 33 solicitudes de reserva de praza. Con capacidade para 95 pequenos de idades comprendidas entre 0 e 3 anos, a Escola Infantil Municipal de Ribadumia conta na actualidade con 86 nenos e nenas matriculados. Neste sentido, cabe destacar que, durante os últimos anos, a gardería puido dar cabida a tódalas familias que solicitaron novas admisións. O pasado curso, por exemplo, foron presentadas 36 solicitudes de reserva de praza. Situada na parroquia de Barrantes, a gardería inaugurouse en setembro do 2004 con tres aulas, unha para cada tramo de idade. A posta en marcha deste servizo supuxo un importante avance do Concello de Ribadumia para facilitar a plena conciliación da vida laboral e familiar, un dos obxectivos prioritarios en materia de servizos sociais promovido desde o actual Equipo de Goberno. Deste xeito, a demanda existente no municipio para este servicio, fixo que o longo dos anos se fosen abrindo novas aulas, situando na actualidade en sete as salas dispoñibles. O seu horario de funcionamento é de 8:00 a 20:30 horas.

O Concello de Ribadumia informa que deron comezo as obras para a mellora da accesibilidade ó ximnasio municipal de Cabanelas (Ribadumia). Esta actuación suporá unha inversión de 36.026,85 € e será financiada con fondos propios do Concello. Obra que mellorará o uso e desfrute tanto do Club Náutico o Muíño como dos veciños que se acheguen á área recreativa do Umia, ó ximnasio municipal ou a piscina, posto que suporá unha mellora para os servizos que alí se prestan. Esta área recreativa é así unha das zonas que o equipo de goberno está a impulsar polo seu valor natural o que hai que engadir que esta no entorno do Paseo Fluvial do Río Umia. Estas actuacións veñen a supor unha modificación para o acceso existente ata o de agora que consiste nun espazo entre o edificio do ximnasio e o edificio da piscina que está pavimentado con baldosa hidráulica. ó cal se pode acceder desde a zona axardinada, a carón do río Umia, mediante unha escaleira ou mediante unha rampla de acceso para discapacitados. A este espazo existente entre os dous edificios tamén se pode acceder desde a entrada á área recreativa, xunto á estrada EP-9501. Este espazo entre os edificios está a unha altura intermedia entre a zona axardinada (planta baixa do edificio do ximnasio) e a planta alta do edificio, onde se sitúan o ximnasio e a cafetería Así mesmo, nesta zona hai outro acceso á planta alta do edificio do ximnasio, que son as escaleiras que soben directamente desde a zona axardinada á cafetería. As melloras consistirán en instalar unha pasarela de acceso para discapacitados que arranque da plataforma existente entre os dous edificios, acaroada ó edificio do ximnasio, hasta chegar a esquina do edificio á mesma altura da planta alta do edificio. En este punto a rampla conectará con unha plataforma que se estenderá por todo o fronte do edificio do ximnasio cara á zona axardinada, e conectará coa escaleira existente de acceso á cafetería. Esta plataforma cumpre a dobre función de servir de acceso á planta alta do edificio e de terraza da cafetería.

Arquivo/s adxunto/s

• Arquivo adxunto-1

O próximo día 14 de marzo (xoves) vaise levar a cabo a limpeza xeral do depósito de distribución do subministro domiciliario de auga, polo que durante a realización de ditos traballos, nalgúns puntos da rede, pode producirse diminución da presión ou nalgún caso corte do subministro de maneira ocasional. Rogamos desculpen as molestias que isto puidera ocasionar.

Arquivo/s adxunto/s

• Arquivo adxunto-1

Recentemente modificouse a LOREG para que os electores que así o soliciten poidan ser excluídos das copias do Censo Electoral que se lle facilita aos partidos políticos. As solicitudes para as próximas Eleccións Xerais 2019 poderanse realizar ata o día 18 de marzo, inclusive.

Período de consulta do día 11 ata o día 18 de marzo, ambos inclusive.

Arquivo/s adxunto/s

• Arquivo adxunto-1

O Concello de Ribadumia informa que no que vai de ano máis de 156 persoas realizaron algún curso formativo en Ribadumia relacionado coa formación agroforestal. Cabe destacar aquí que un 27% dos alumnos son ribadumienses, achegándose ata aquí veciños de localidades como Barro, Caldas de Reis, Fornelos de Montes, Lugo, Poio ou Pontevedra entre outros. Algo que está a converter a Ribadumia en punto de referencia para estes cursos formativos. Xa que ademais son cursos gratuítos, ou se existe un carne profesional, o custo é a taxa correspondente. Os cursos que se impartiron están dentro do Plan de Formación Agroforestal 2018 e 2019 (subvencionados pola Consellería do Medio Rural) e en colaboración con Tragsatec, entre eles están o curso de benestar animal no transporte, o curso de aplicador/manipulador de produtos fitosanitarios ponte (xa se realizaron neste tempo 2 edicións), o curso de poda de froiteiras e videiras ou o curso de aplicador/manipulador de produtos fitosanitarios nivel básico. E xa está a prepararse a seguinte oferta formativa cun novos cursos de aplicador de fitosanitarios en diferentes niveles ou o de manipulador de alimentos e alérxenos. Actuacións que achegan a formación os veciños que desexen mellorar as súas capacidades e coñecementos para o seu posto de traballo ou para encontrar unha nova ocupación laboral. En todo caso se un punto de referencia en formación, neste caso, agroforestal supón crecemento e futuro para o municipio.

A pasada semana o Concello de Ribadumia asinou o compromiso con Sogama para a difusión de medidas de reciclaxe e, ó mesmo tempo, para conseguir unha rebaixa do 10% do canon nos recibos que se lles emiten ós veciños no recibo do lixo, na liña mantida por este equipo de goberno de diminuír a carga impositiva ós veciños ou, como mínimo, de mantela sen subas. O actual equipo de goberno mantivo sen subas a taxa do lixo para os veciños cando Sogama se dedicou a subir ano tras ano o prezo que cobra polo tratamento da tonelada de lixo recollido, incremento que tamén viñeron sufrindo todos os veciños de forma indirecta xa que o Concello tivo que facer fronte a esas subas con recursos propios que non se puideron investir noutros conceptos. Esto contraponse o feito na lexislatura anterior onde se pasou de cobrar 32,01 € no recibo do lixo no ano 2011 a duplicalo no 2012, pasando a cobrar 63 € ano. Se facemos unha retrospectiva temporal, os datos demostran as subas do canon que Sogama lles aplica ós concellos ano tras ano, dende o 2002 ata o 2018, destacando o incremento desmesurado que se produciu no ano 2014 e que supuxo un 33,5% sobre o canon do ano anterior; esta medida, que foi recurrida dende diversos municipios (entre os que non se atopou Ribadumia que non apoiou a moción levada a pleno no ano 2014) polo grande prexuízo que lle implicaba ós veciños, obtivo o visto e prace da Xunta de Galicia, que lle permitiu a Sogama incrementar as tarifas para facer fronte ó seu déficit. Con todo, este 10% de redución é unha diminución ficticia, xa que os veciños non recuperan en absoluto a tarifa que tería que estar vixente a día de hoxe se os incrementos se axustasen nestes anos simplemente o IPC, e segue estando moi por debaixo de todas as subas aplicadas entre 2002 e 2018.

O Concello de Ribadumia informa que están rematadas as obras de rehabilitación do Lavadoiro sito en lugar Sucasa (Leiro). Dita actuación ascendeu a 9.404,52 € e está financiada pola Subvención para a rehabilitación e a sinalización do patrimonio histórico-cultural do ano 2018 habilitada pola Deputación de Pontevedra para os concellos da provincia. A obra consistiu no cambio da cuberta e colocación de granito sobre as paredes que forman a pila do lavadeiro, ademais da restauración da comporta existente para o desvío de auga ata o lavadeiro, dispoñendo dunha nova de aceiro galvanizado, e a limpeza duns 20 m. Do canle de auga. Esta actuación ven a continuar coas xa levadas a cabo en diferentes lavadoiros e fontes do municipio dentro dos traballos de conservación do noso patrimonio, sendo está unha das premisas do equipo de goberno, que busca recuperar e manter en perfecto estado os nosos recursos, pois son estes a imaxe do municipio de cara a visitantes foráneos que se acheguen a coñecer as nosas riquezas culturais, gastronómicas e patrimoniais.

Arquivo/s adxunto/s

• Arquivo adxunto-1
• Arquivo adxunto-2

O Concello de Ribadumia informa que ven de cambiarse a empresa concesionaria do servizo de recollida de aceite de cociña doméstico. Con este cambio hai un incremento dos contedores dispoñibles para depositar este residuo, pasando de 5 que había anteriormente ós 14 que haberá a partir de agora repartidos por todas as parroquias do municipio. Cabe destacar que se tivo en conta a colocación de un contedor para a recollida de aceite de cociña doméstico no CPI Julia Becerra Malvar e outro no Cra de Leiro. Isto ven a dar resposta a unha parte do novo servizo contratado, que é a difusión e concienciación da necesidade de reciclaxe e polo tanto da recollida de aceite que se levará a cabo a través de diferentes campañas nos colexios. Destacar que este servizo que agora se mellora e se achega os veciños de Ribadumia é totalmente gratuíto.

Arquivo/s adxunto/s

• Arquivo adxunto-1

O Concello de Ribadumia informa que, con motivo da celebración da “III Xornada Internacional da Camelia” no Pazo Quinteiro da Cruz, se organizan novas edicións dos concursos fotográfico e artístico infantil. O prazo para poder presentar os traballos en ambos casos está xa aberto e teñen que estar estes fundamentados na temática da camelia. Poderán presentar os traballos en ambos os casos ata o día 23 de marzo. Despois será un xurado, formado por un representante do Pazo Quinteiro da Cruz, un membro da Asociación de fotografía Ollares de Portonovo e un representante do Concello, os que elixirán o primeiro e segundo premio en cada un dos concursos. As fotografías presentadas estarán expostas ao público no Auditorio Municipal de Ribadumia, así como na web do Concello e nas redes sociais oficiais. Ademais, o gañador desfrutará dun vale de 50 euros, mentres que quen acade o segundo lugar recibirá un curso de fotografía valorado en 40 euros. Os gañadores no concurso Artístico Infantil, así mesmo, desfrutarán dun vale de 50 € no caso do primeiro premio, e un vale de 40€ para o segundo clasificado. Poden consultar as bases en omeuconcello.ribadumia.org ou ter máis información no Departamento de Cultura do propio concello. A isto cabe engadir, que para o sábado 30 de marzo contaremos cun novo taller de tinta china dirixido a nenos e nenas a partir de dos 6 anos. Taller que está sendo un éxito ano tras ano esgotándose as 20 prazas. Así, xa está aberto o prazo de inscrición ata o próximo 25 de marzo para esta nova edición.

Arquivo/s adxunto/s

• Arquivo adxunto-1
• Arquivo adxunto-2
• Arquivo adxunto-3

O Concello de Ribadumia emitiu no día de onte as alegacións correspondentes ós proxectos de explotación de servizos públicos de transporte regular de viaxeiros de uso xeral por estrada de clave XG600 a XG743 que se atopan en exposición pública. Estas alegacións están centradas no caso omiso que dende a Xunta de Galicia se fixo ás aportacións presentadas por este Concello en diferentes momentos das xestións do Plan de Transporte. Deste xeito, o pasado mes de xullo mantívose unha reunión onde se expuxo claramente que Ribadumia ten un servizo de transporte moi deficiente que non cubre as comunicacións cos servizos para necesidades básicas como educación ou sanidade, poñendo de manifesto que, a día de hoxe, se manteñen as liñas de autobús tal e como estaban cando o hospital de referencia estaba en Pontevedra, sen facer ningunha modificación ó respecto cando o referente pasou a ser o Hospital do Salnés. Isto foi exposto para ser tido en conta no novo Plan de Transporte, posto que a única parada que existía, e se mantén, cara ó centro sanitario do Salnés está na Ponte de Castrelo, nun dos extremos do Concello, co que os veciños das parroquias máis afastadas, como Lois, Leiro ou Besomaño, terían que desprazarse entre 8 e 10 km só para coller un autobús que os desprace a un hospital que está a mesma distancia en transporte privado, ademais do tempo que deberían investir en percorrer o dobre de quilómetros. A esto cabe engadir as inexistentes conexións con centros educativos de Educación Secundaria e Bacharelato situados en Vilagarcía ou Vilalonga, algo esencial para favorecer a formación dos veciños que así desexen desprazarse a eses centros, que agora mesmo se ven unicamente reducidas ós centros de Cambados ou Pontevedra, coas limitacións educativas que isto supón xa que, en principio, son menores que dependen de pais ou outros familiares para poder desprazalos. Toda esta situación no servizo público de transporte supón un claro prexuízo para os veciños de Ribadumia nas opcións de achegarse a outras áreas, xa que, dentro da comarca, só terían conexión directa con Cambados, algo que se reflicte tamén na economía en xeral. Así, nas alegacións presentadas exponse que o Concello de Ribadumia considera fundamental a existencia destas liñas de transporte público, tanto para o crecemento do municipio como para que os veciños de Ribadumia estean en igualdade de condicións respecto ós doutras áreas.

O Concello de Ribadumia solicitou á Deputación a contratación de 12 persoas desempregada. Entre estes estará a contratación de 3 mozos de recollida de lixo, 3 peóns de obras públicas, 2 peóns de construción de edificios, 1 mantedor de edificios, 1 albanel, 1 animador sociocultural, 1 persoa de limpeza. A resolución favorable por parte da institución provincial comunica que o Concello de Ribadumia é beneficiario de 105.286,96€ para a contratación destes 12 traballadores, cuxa selección se realizará a través do INEM. Os interesados deben estar inscritos na Oficina de Emprego de Cambados nas ocupacións demandadas e os criterios de selección dan prioridade ás persoas desempregadas, non perceptoras de prestacións dando preferencia ás vítimas de violencia de xénero, ós candidatos maiores de 45 anos, ós que teñan familia monoparental ou con fillos a cargo, ós candidatos con niveis de renda máis baixa e con cargas familiares, tal e como establece a orde de convocatoria.

O concello de Ribadumia informa que despois de levar a cabo as xestións oportunas para a adecuación do proxecto de “Mellora da seguridade vial” na Rúa A Torre por fin son unha realidade. Esta adecuación consistiu, non só en adaptalo a lei senón tamén as demandas e suxerencias que nos fixeron chegar os veciños da zona nas diferentes reunións mantidas con eles. As obras iniciáronse co retranqueo dos muros dende a rotonda dos Castaños ata a entrada do casco urbano, incluíndo o muro do Pazo de Barrantes, e consisten na demolición dos existentes e na súa reconstrución mantendo as características orixinais dos mesmos. O importe desta obra, necesaria para realizar as posteriores execucións do proxecto aprobado pola Deputación provincial, ascende a 66.089,47 € e faise con cargo o Plan Concellos 2018 cunha duración aproximada de 4 meses, co que se prevé que estea rematada a finais de abril. Unha vez concluída darán comezo as obras correspondentes ó proxecto da Deputación de Pontevedra, que inclúe a creación de beirarrúas e franxa de estacionamento de vehículos, así como pasos de peóns elevados. O importe total deste proxecto ascende a 225.088,23 €. Este proxecto mellorará así a seguridade viaria solicitada polos veciños que residen en Rúa A Torre, e tamén de todos aqueles que se achegan diariamente a disfrutar do noso concello, sobre todo por ser este un dos puntos de partida da Ruta da Pedra e da Auga. Proxectos que veñen a sumar as actuacións xa realizadas como a do aparcadoiro feito no ano 2017 preto da Rotonda dos Castaños e que, gracias ó convenio co propietario, mellorou a zona cun investimento mínimo para os veciños de Ribadumia de pouco máis de 6.000,00 €.

O próximo domingo 17 de febreiro, o equipo de goberno do Concello de Ribadumia reúnese cos veciños de Besomaño para exporlles os proxectos previstos para a parroquia.

Arquivo/s adxunto/s

• Arquivo adxunto-1

O equipo de Goberno acordou na última Xunta de Goberno a legalización da obra executada e a licenza de primeira ocupación da Pousada de Ribadumia, de acordo co expediente de obra presentado pola Deputación e unha vez que o Pleno da entidade provincial aprobou o investimento para rematar a urbanización das rúas número 1 e 4 do polígono de Sta. Baia, de acordo con convenio subscrito no seu día co Arcebispado de Santiago. Así mesmo, a Deputación Provincial ten previsto licitar nos vindeiros días estas obras de urbanización, o cal implicará un investimento aproximado de 250.000€, que redundará en beneficio de todo o sector urbano de Sta. Baia, xa que non só se procederá a urbanizar a rúa anexa á propia pousada, senón tamén se rematarán todos os servizos da rúa Párroco Valiñas, con beirarrúas, saneamento e abastecemento, ata a estrada provincial EP-9305. Hai que recordar que a obra da Pousada incrementou o seu presuposto inicial de case tres a máis de 5 millóns de euros, tendo que redactarse un expediente de legalización que foi contratado pola Deputación, no pasado mes de novembro, por un importe de case 15.000€, trala aprobación en Pleno do mesmo, cos votos favorables do Partido Popular, incluída Salomé Peña, que sempre defendeu que o edificio construído da Pousada era totalmente legal. Nesta legalización inclúense as novas plantas construídas que non figuraban no proxecto inicial, tanto do edificio da Pousada coma do centro deportivo e de ocio, tales como a planta semisótano que une ambos edificios ou a planta baixo cuberta para a terraza do comedor e servizos. Así mesmo, corrixiuse a ocupación feita no seu día de forma irregular ó estar o xardín da Pousada construído ocupando parte do vial número 4 e terreos da igrexa. Con este acordo quedan rematados os trámites municipais, de forma que a Deputación e a empresa concesionaria poderían poñer en funcionamento estas instalacións hosteleiras.

O concello de Ribadumia informa que por terceiro ano consecutivo foi o Salón Internacional de Turismo Gastronómico Xantar que se celebrou en Ourense entre o 6 e o 10 de febreiro para promocionar Ribadumia. Durante eses días o Concello exalta as súas festas gastronómicas como son a Festa do Pan do Salnés e a Festa do Viño Tinto do Salnés e variedade autóctonas, presentando ambos eventos a cada un dos que se achegan para interesarse pola nosa gastronomía, festas e patrimonio tanto cultural como arquitectónico. Un ano máis Ribadumia participou nas actividades que teñen lugar no Salón como por exemplo, no Workshop con axencias de viaxes ou estando presentes tamén no concurso de carteis de Festas Gastronómicas, onde na pasada edición o cartel da Festa do Pan do pintor Pepe Noya foi recoñecido co 1º premio. Coincidindo con esta promoción de Ribadumia e das nosas festas, presentou a pasada semana a solicitude de Festa de Interese Turístico de Galicia para a Festa do Pan do Salnés, unha das nosas festas máis arraigada e que este ano chegará á súa maioría de idade coa celebración da XVIII edición. A Festa do Pan do Salnés supón o revivir dun xeito de vida arredor dos muíños, os cales están presentes en diversos puntos do Concello mostrando así a importancia que supuñan para os nosos antepasados. Deste xeito durante a festa móstrase o facer tradicional e artesán do pan, ademais de recuperar un prato tradicional como os ovos estrelados con pan de millo, que serven nun gran xantar de confraternidade onde máis dun millar de persoas disfrutan entre amigos e familiares da gastronomía, música e tradición.

O Concello de Ribadumia informa de que está aberto o prazo ata o próximo 25 de febreiro para presentar as candidaturas a “Ribadumiense en prol do galego”, recoñecemento que será entregado o 17 de maio con motivo do Día das Letras Galegas 2019, cando se celebrará a terceira edición da gala homenaxe “Ribadumienses en prol do galego”. Todos os que o desexen poderán consultar as bases na plataforma omeuconcello.ribadumia.org. O Concello pretende, deste xeito, non só celebrar o día no que se honra á lingua galega, senón tamén aproveitar esta ocasión para render homenaxe aos veciños e veciñas, asociacións ou entidades do municipio que participan, dun xeito ou outro, en prol da conservación e posta en valor da nosa lingua.

O Concello de Ribadumia informa que o total do cargo líquido segundo o padrón dos impostos e taxas de vehículos, lixo, IBI urbano e rústica, auga e actividades económicas ascende a un total de 1.540.754,60 €. A estes datos hai que engadir que o total do cargo líquido que xestionou a ORAL en 2017, era de 1.094.823,82€, o que supón un incremento respecto a 2018 de 445.930,78 €. Incremento que non é debido a un maior número de impostos ou a unha subida dos tipos impositivos, pero si ven derivado dunha mellor xestión e máis próxima, o cal facilita a comunicación cos veciños. Do total a recadar en período voluntario, foi ingresado unha media do 87,61 %, o que supón 1.362.773,00 €. E que segundo o tipo de imposto se pode dicir que do correspondente ó IAE se recadou o 97,32% sendo así o imposto cun maior importe recadado en voluntaria, fronte o IBI rústico, un 76,97 %, do que cabe citar é o imposto con menor recadación total (só 4.120,81 € no padrón). Polo banda dos gastos do servizo, no ano 2018 ascenderon a un total de 41.504,95 €, e inclúen tanto os gastos necesarios para a posta en marcha do servizo, como os gastos para o seu desenvolvemento diario, e tendo en conta que os gastos de persoal adscritos se fan de forma anual aínda que non se dedican de forma exclusiva a recadación, senón que presta servizos noutras areas. Aínda así, supón un aforro importante, máis de 50000€, respecto dos máis de 90000 € que se lle pagaban a Oral pola xestión da recadación en período voluntario. Pero a partir deste ano, os gastos vense reducidos a metade ó non ter en conta os da posta en marcha, co que o aforro anual se incrementará, a partir do próximo ano, ata os 75000 € aproximadamente, cantidade que pode ser destinada a outras inversións en favor dos veciños mellorando o seu día a día.

Na última sesión plenaria aprobouse o reparto do 100% das axudas a entidades para o 2018. Deste xeito as asociacións culturais reciben un total de 20000 € para un total de 502,63 puntos que se baremaron segundo as bases aprobadas entre 12 solicitudes presentadas. A contía repartida entre as entidades deportivas ascende a 34000 €, os cales se repartiron entre os clubs ribadumienses, incluíndo o patrocinio solicitado polo Club Náutico O Muiño pola participación de María Pérez no campionato mundial de Portugal ó cal lle corresponden 659,46 € segundo a baremación correspondente. Este patrocinio ven a sumarse os dous que o Club Náutico o Muíño xa solicitara e se concederon neste 2018 pola participación de María Pérez e Manuel Fontán nas probas do Europeo en Italia. As entidades sociais foron beneficiarias do reparto de 9000 €, destacando a presentación por primeira vez da Asociación Gotas, e manténdose todas as anteriores. De consideración e destacable é que durante esta lexislatura e trala aprobación das bases se produciu un incremento exponencial dos importes que se lle conceden a cada asociación, acadando como media os seguintes incrementos: • Asociacións culturais: 196,30 % • Entidades deportivas: 104,4 % • Asociacións sociais: 50 %