ACTUALIDADE - ÚLTIMAS NOVAS

Relación de entradas

780 Entradas

NP - O TURISMO EN RIBADUMIA PECHA A TEMPADA 2025 CUN 21% MAIS DE VISITANTES CA NO MESMO PERÍODO QUE 2024 23/10/25

O Concello de Ribadumia vén de facer balance da actividade turística correspondente ao mes de outubro e da tempada 2025, que rematou o pasado día 12 coa clausura do Punto de Información Turística municipal. Durante estes primeiros doce días de outubro contabilizáronse 695 visitantes, unha cifra que confirma o interese do municipio como destino activo máis aló da tempada estival.

Do total de visitantes, o 68% (472 persoas) procedían doutros países, mentres que o 32% (223 persoas) chegaron de diferentes puntos de España, incluíndo 79 galegos (11%). No perfil dos usuarios, o 86% foron peregrinos, o 13% turistas e o 1% excursionistas.

Entre os países de orixe, Portugal e Estados Unidos comparten a primeira posición (82 visitantes cada un), seguidos de China, México, Canadá, Australia e Reino Unido, que completan a lista dos principais países. No eido nacional, destacan Cataluña (51 visitantes), Madrid e Andalucía (24 cada unha) e Galicia (79 visitantes), reflectindo unha ampla diversidade de orixes entre as persoas que escollen Ribadumia como parada no seu percorrido.

Facendo un balance global, entre os meses de xuño e outubro, o Punto de Información Turística de Ribadumia rexistrou un total de 5.672 visitantes, o que supón un incremento aproximado do 20.7% respecto ao ano 2024, cando a cifra total fora de 4.699.

A tempada caracterizouse pola forte presenza internacional, especialmente de Estados Unidos, Portugal e Italia, ademais doutros como Alemaña, Francia, China e Polonia. O turismo nacional tamén tivo unha importante representación, con Andalucía, Madrid e Castela-A Mancha á cabeza.

No conxunto do ano, o perfil de peregrino consolidouse como o máis habitual —representando preto do 85% das visitas totais—, en gran parte vinculado á Variante Espiritual do Camiño Portugués - Ruta do Padre Sarmiento, un dos principais reclamos do municipio xunto coa Ruta da Pedra e da Auga, o Monte do Castro ou os muíños de Barrantes e do Batán.

Desde o goberno local valórase moi positivamente o balance desta tempada turística, que demostra a capacidade de Ribadumia para atraer visitantes nacionais e internacionais máis aló do verán. O concello destaca que o traballo de promoción, a mellora dos espazos naturais e patrimoniais e a organización de eventos culturais, deportivos e gastronómicos contribúen á desestacionalización do turismo e á dinamización económica local.

Con estas cifras, Ribadumia pecha a tempada 2025 cun crecemento sostido, reafirmándose como un destino con recursos turísticos de primeiro nivel, preparado para seguir medrando no futuro.

Arquivo/s adxunto/s

Arquivo adxunto-1

O CONCELLO DE RIBADUMIA ABRE O PRAZO DE PRESENTACIÓN DE CANDIDATURAS PARA A VIII FESTA DO DEPORTE 20/10/25 - 11/11/25

O Concello de Ribadumia informa de que xa está aberto o prazo de presentación de candidaturas para a “VIII Festa do Deporte”.

Todo aquel que o desexe poderá presentar as súas propostas dende o 20 de outubro ata o 10 de novembro.

Para facelo, os/as interesados/as deberán descargar os formularios na plataforma do Concello ou solicitalos nas propias oficinas da Casa Consistorial.

Para coñecer todos os detalles sobre estes galardóns, os interesados poden consultar as bases da “Festa do Deporte”.

Arquivo/s adxunto/s

Arquivo adxunto-1

NP - O TURISMO EN RIBADUMIA MANTÉN A SÚA DINÁMICA DE CRECEMENTO NO MES DE SETEMBRO 15/10/25

Ribadumia continúa consolidándose como un destino de referencia dentro da comarca do Salnés, tamén fóra da tempada alta. Segundo os datos recollidos pola Oficina de Turismo municipal durante o mes de setembro, rexistráronse 1.540 visitantes, o que supón un incremento do 24,4% respecto ao mesmo período de 2024.

O turismo internacional segue a ser o principal motor de visitantes, representando o 71% do total, con 1.101 persoas procedentes de países estranxeiros, mentres que o 29% restante corresponde a visitantes nacionais (439 persoas), e 50 galegos.

O perfil maioritario continúa a ser o de peregrino, que suma 1.376 persoas (89%), seguido de turistas (9%) e excursionistas (2%). Estes datos confirman a relevancia da Variante Espiritual do Camiño de Santiago, que atrae cada ano a un número crecente de camiñantes e visitantes interesados en coñecer o patrimonio natural e cultural de Ribadumia.

Desde o goberno local valoran moi positivamente estes resultados, que reafirman o traballo desenvolvido nos últimos anos para desestacionalizar o turismo e poñer en valor os múltiples recursos do municipio: dende os muíños do Batán, a senda fluvial do Umia, a Ruta da Pedra e da Auga e o Monte do Castro, ata os eventos culturais, deportivos e gastronómicos que dinamizan o territorio durante todo o ano.

Ribadumia segue así a consolidarse como un destino onde a natureza e o patrimonio convértense nos mellores reclamos para quen nos visita.

Arquivo/s adxunto/s

Arquivo adxunto-1

NP - O CONCELLO DE RIBADUMIA IMPULSA A LIMPEZA E MANTEMENTO DAS FONTES E LAVADOIROS MUNICIPAIS 15/10/25

O Concello de Ribadumia está a desenvolver unha nova campaña de limpeza e mantemento das fontes e lavadoiros tradicionais do municipio, co obxectivo de preservar en boas condicións estes bens patrimoniais que forman parte da identidade histórica e cultural da localidade.

Para levar a cabo estes traballos, o Concello habilitou unha cuadrilla de persoal municipal encargada da limpeza, conservación e posta a punto destes espazos, actuando de maneira coordinada en todas as parroquias do termo municipal, dende Sisán ata Lois.

En total, está previsto intervir en preto de 40 elementos patrimoniais, tanto fontes como lavadoiros, algúns deles de gran valor histórico e etnográfico. A actuación permitirá mellorar a accesibilidade e o uso cotián por parte da veciñanza, así como favorecer que as persoas visitantes poidan coñecer de primeira man o patrimonio de Ribadumia.

Dende o goberno local destacan a importancia de manter este tipo de bens en condicións óptimas polo seu valor funcional, cultural e histórico, reforzando o compromiso coa conservación e a posta en valor do patrimonio común.

Arquivo/s adxunto/s

NP - O CONCELLO DE RIBADUMIA APOSTA POLO CORRECTO MANTEMENTO DOS ESPAZOS PÚBLICOS COA COLABORACIÓN DA ASOCIACIÓN BATA 08/10/25

O Concello de Ribadumia conta coa colaboración de BATA Servicios Integrales a la Comunidad C.E.E. para o desenvolvemento de labores de xardinería e coidado do medio ambiente en distintos puntos do municipio. O equipo de traballo, composto por tres ou catro operarios segundo a xornada, incluíndo un responsable de equipo, realiza tarefas fundamentais para garantir o bo estado das zonas verdes e dos espazos públicos.

As súas funcións abranguen a limpeza de matorrais e maleza mediante roza manual ou mecánica, o corte de céspede con cortacéspede, o perfilado de perímetros con rozadoira de fío, o recorte de sebes, así como a poda de árbores. Ademais, encárganse do tratamento sostible dos restos orgánicos derivados destes traballos, velando polo respecto medioambiental.

As intervencións concéntranse nas rotondas dos Castaños, do cemiterio de Sisán, de Santa Marta, do Polígono, da piscina municipal, de Leiro, de Lois e a situada no lugar da Lomba. O labor é practicamente semanal durante o verán, coincidindo co maior crecemento vexetal, e complétase con actuacións periódicas ao longo do resto do ano en función das necesidades da vexetación.

Con esta colaboración, o Concello de Ribadumia reitera a súa aposta polo mantemento sostible e responsable das zonas verdes municipais, favorecendo a integración laboral das persoas con TEA e/o discapacidade intelectual e garantindo á veciñanza e visitantes espazos públicos coidados.

Arquivo/s adxunto/s

NP - RIBADUMIA REMATA A FORMACIÓN PARA A POSTA EN MARCHA DA MESA LOCAL DE COORDINACIÓN CONTRA A VIOLENCIA DE XÉNERO 03/10/25

O pasado mércores tivo lugar no Salón de Plenos do Concello de Ribadumia a segunda sesión formativa do Programa para a constitución das Mesas Locais de Coordinación institucional fronte á violencia de xénero (MLC), completando así o ciclo de formación que permite dar un paso decisivo cara á creación deste novo recurso no municipio.

O Concello foi seleccionado pola Consellería de Política Social e Igualdade, a través da Dirección Xeral de Loita contra a Violencia de Xénero, dentro do acordo de colaboración coa Federación Galega de Municipios e Provincias, para integrar a rede galega de entidades locais comprometidas na loita contra a violencia de xénero.

Á formación asistiron o alcalde e membros da corporación municipal, persoal técnico do concello, representantes do Centro de Saúde de Ribadumia, do ámbito deportivo, das ANPAs dos centros escolares, así como a xefa da Unidade de Violencia de Xénero contra a Muller da Subdelegación do Goberno en Pontevedra, entre outros axentes clave.

As sesións tiveron carácter teórico e práctico, abordando cuestións como os obxectivos da mesa, os procedementos oficiais para a súa constitución e os pasos necesarios para a coordinación entre os diferentes axentes implicados. Ademais, favoreceron a creación dunha rede de contactos e intercambio de información, imprescindible para garantir unha resposta integral e eficaz ante situacións de violencia de xénero.

Co remate desta formación, Ribadumia sitúase máis preto da constitución oficial da súa Mesa Local de Coordinación, un espazo de traballo conxunto que reforzará a prevención, detección, atención e seguimento dos casos, poñendo no centro a protección das mulleres e das súas familias.

Arquivo/s adxunto/s

NP - AVANZAN AS OBRAS DE MELLORA NO CAMIÑO MUNICIPAL E NAS REDES DE PLUVIAIS E SANEAMENTO NO FREIXO 19/9/25

O Concello de Ribadumia informa de que xa están en marcha as obras de mellora do camiño municipal e das redes de pluviais e saneamento no núcleo de Freixo, na parroquia de Ribadumia, unha actuación incluída no convenio de colaboración subscrito co organismo público SOGAMA, que financia na súa totalidade este proxecto cun investimento total de 121.000 euros.

O obxectivo principal desta intervención é ofrecer un mellor servizo ás vivendas da contorna, garantindo unha accesibilidade axeitada e unhas infraestruturas máis seguras e modernas. Para iso, as obras céntranse na mellora do sistema de drenaxe e recollida de augas pluviais do camiño, dotándoo dunha rede eficiente, e na ampliación da rede de saneamento existente cara aos camiños transversais.

Ademais, realizaranse pequenas intervencións na rede de abastecemento de auga e procederase á ampliación dun tramo do camiño, derrubando muros e peches en mal estado de conservación, co obxectivo de mellorar a súa funcionalidade e a seguridade viaria.

Con esta actuación, o Concello de Ribadumia continúa coa súa aposta pola modernización das infraestruturas municipais, garantindo condicións de maior confort e seguridade para a veciñanza do núcleo de Freixo.

Arquivo/s adxunto/s

NP - RIBADUMIA REFORZA CUNHA BRIGADA OS TRABALLOS DE PREVENCIÓN E XESTIÓN DE BIOMASA FORESTAL 16/9/25

Xa está en marcha a nova brigada forestal do Concello de Ribadumia, composta por un capataz e catro peóns forestais contratados por un período de tres meses. A súa incorporación enmárcase no convenio de colaboración entre a Consellería de Medio Rural e o Concello para a execución de accións de prevención e defensa contra os incendios forestais nos anos 2025-2026.

O investimento da actuación ascende a un total de 92.712 euros para as dúas anualidades, dos cales 50.712 euros correspóndense con labores en materia de prevención de incendios forestais, sendo este un importe cofinanciado nun 80% pola Unión Europea a través de fondos Feader no marco do Plan Estratéxico da Política Agraria Común (PEPAC9 2023-2027. Os 42.000 euros restantes, financiados íntegramente con fondo autonómicos, estarán destinados a actuacións en materia de vixilancia e defensa contra incendios forestais.

Durante o seu período de actividade, a brigada realizará tarefas de defensa e extinción no Distrito Forestal O Salnés-Caldas, así como actuacións preventivas mediante traballos de roza manual en parcelas da rede de faixas secundarias de xestión de biomasa forestal, seguindo unha planificación técnica detallada.

Tamén se realizarán traballos de roza mecanizada de matogueiras con apeiros rozadores de cadeas nas diferentes parroquias.

Nas últimas semanas, e tras a vaga de incendios que azotou o territorio galego, o equipo de Ribadumia xa foi mobilizado a diferentes puntos da contorna como Meaño, O Vao, Covas, Vilaboa ou Sisán. Nestes lugares levaron a cabo labores de comprobación dos perímetros afectados e tarefas de regadío complementarias aos traballos previos realizados polos servizos de emerxencia e bombeiros.

Con esta iniciativa, Ribadumia dá un paso adiante na loita contra os incendios forestais, reforzando tanto a capacidade de resposta inmediata como o labor de prevención, clave para garantir a seguridade da veciñanza e a preservación do patrimonio natural do noso municipio e da comarca.

Arquivo/s adxunto/s

NP - O TURISMO INTERNACIONAL MEDROU EN RIBADUMIA CUN AGOSTO DE RÉCORD EN VISITANTES REXISTRADOS NO PUNTO DE INFORMACIÓN TURÍSTICA 13/9/25

A actividade turística en Ribadumia durante os meses de xullo e agosto confirma a consolidación do noso municipio como destino de referencia na comarca de O Salnés. O Punto de Información Turística municipal rexistrou neste periodo estival un total de 2.448 visitantes (977 en xullo e 1.471 en agosto), cifras que, aínda que semellan similares ao do ano pasado, amosan un incremento significativo do 14% respecto ao mes de agosto do 2024, cando se recibiran a 1.288 visitantes.

En xullo, a cifra foi algo menor respecto ao exercicio anterior, mais o balance estival en conxunto foi moi positivo. A presenza internacional destaca sendo un 34% do total, atopándonos con viaxeiros de Portugal, Italia e Estados Unidos, que encabezan o listado de países visitantes, seguidos por Alemaña, Polonia, Francia, Reino Unido ou China.

No eido nacional, destacan as visitas chegadas de Andalucía (30%), Madrid (23%) e Castela-A Mancha (9%).

O perfil maioritario que visita Ribadumia continúa a ser o do peregrino vinculado á Variante Espiritual - Ruta do Padre Sarmiento do Camiño, con máis de 1.500 persoas contabilizadas entre xullo e agosto. Xunto a eles, o turismo cultural, natural e gastronómico segue atraendo a excursionistas e turistas que se converten nunha oportunidade de dinamización económica para a hostalaría e o comercio local.

Con estes datos, Ribadumia reforza a súa imaxe como un destino turístico en crecemento, capaz de atraer visitantes nacionais e internacionais pola súa combinación de patrimonio natural como a Ruta da Pedra e da Auga, a oferta cultural e gastronómica, así como pola celebración de eventos de referencia ao longo de todo o ano.

Arquivo/s adxunto/s

NP - RIBADUMIA REMATA OS TRABALLOS DE POSTA A PUNTO NOS CENTROS ESCOLARES MUNICIPAIS 06/9/25

O Concello de Ribadumia informa que xa se deron por finalizadas as labores de posta a punto dos centros escolares do municipio, tanto nos CRA como no CPI Julia Becerra Malvar, co obxectivo de que os espazos estean en perfectas condicións para a volta ás aulas no novo curso académico 2025/2026.

As actuacións realizadas incluíron traballos de mantemento xeral, pintado de aulas e espazos comúns, reordenación de mobiliario e revisión das luminarias, así como outras melloras que permitirán garantir o bo uso das instalacións por parte do alumnado e o profesorado.

Ademais, o Concello tamén levou a cabo labores de pintado e posta a punto nas instalacións municipais onde se localiza o servizo de conciliación familiar da Escola de Ocio e o Plan madruga; así como no comedor escolar e o ximnasio, asegurando deste xeito que estes servizos se presten en condicións óptimas de comodidade e seguridade para os nenos e nenas do noso municipio.

Con esta posta a punto, o goberno local continúa traballando para que os nenos e nenas de Ribadumia poidan dispoñer de espazos adecuados, seguros e confortables para a súa aprendizaxe e desenvolvemento.

Arquivo/s adxunto/s

PROGRAMA APRENDÉNDONOS 13/8/25 - 30/9/25

O xoves 31 de xullo daba comezo o programa Aprendéndonos. Un programa no que onde o concello de Ribadumia foi beneficiario da convocatoria SI435A- Programa de Promoción da Igualdade e prevención da Violencia de Xénero, da Consellería de Política Social e Igualdad da Xunta de Galicia e cofinanciado pola Unión Europea.

Por este motivo ven de poñer en marcha o programa Aprendéndonos, un programa de atención, orientación e acompañamento para a recuperación integral dos proxectos vitais das mulleres participantes dende a perspectiva de xénero.

O obxectivo principal é previr a violencia de xénero e mellorar a situación as vítimas de violencia de xénero e das mulleres en situación de vulnerabilidade.

O resultado que se pretende acadar é unha mellora da súa situación persoal, social e laboral.

Arquivo/s adxunto/s

Arquivo adxunto-1

NP - O CONCELLO DE RIBADUMIA AMPLÍA A REDE DE ABASTECEMENTO DE AUGA NO LUGAR DA IGREXA EN SISÁN 28/8/25

O Concello de Ribadumia rematou as obras de investimento na rede de auga no Lugar da Igrexa, na parroquia de Sisán, unha actuación que supón a conexión e ampliación da rede municipal de abastecemento e que foi financiada con fondos propios do consistorio.

A intervención permitiu dotar desta infraestrutura esencial a unha zona que ata o de agora carecía deste servizo público, mellorando así as condicións de habitabilidade e de calidade de vida da veciñanza.

Con esta obra, o goberno local continúa a avanzar na súa aposta por modernizar e reforzar as redes de abastecemento, garantindo un servizo seguro, estable e eficiente en todos os núcleos do municipio. O Concello reafirma deste xeito o seu compromiso de seguir executando proxectos que dean resposta ás necesidades da poboación e que aseguren un correcto funcionamento das infraestruturas municipais ao longo do tempo.

Arquivo/s adxunto/s

NP - RIBADUMIA CONTARÁ CON DOUS PUNTOS DE RECARGA PARA VEHÍCULOS ELÉCTRICOS A TRAVÉS DUN CONVENIO COA MANCOMUNIDADE DO SALNÉS 27/8/25

Iniciadas as obras para a instalación de dous puntos de recarga para vehículos eléctricos, que estarán situados na Rúa Espadeiro, á altura do número 3. Trátase dun proxecto que permitirá dotar ao municipio de dúas prazas de estacionamento con acceso a recarga de alta potencia, favorecendo a mobilidade sostible e o uso de vehículos menos contaminantes.

A actuación deriva do acordo adoptado polo Pleno municipal en marzo de 2024, polo que se aprobou a cesión á Mancomunidade do Salnés dos espazos necesarios para levar a cabo esta iniciativa. En total, serán nove os concellos da comarca que dispoñan destes puntos, dentro dunha estratexia conxunta de implantación comarcal que permite unha xestión máis eficiente da instalación, mantemento e explotación dos mesmos.

O proxecto impulsado polo ente supramunicipal conta cunha subvención do “Plan Nacional de Sostibilidade Turística en Destinos Xacobeos”, no marco do subproxecto “Posta en valor da orixe de todos os camiños Xacobeos”. En concreto, a actuación de Ribadumia consistirá na instalación dun punto de recarga trifásico, de 200 kW de potencia, preparado para dar servizo a todo tipo de vehículos eléctricos autorizados. O equipamento será de acceso libre, situado en zona de aparcamento público e deseñado para ofrecer unha experiencia segura e rápida ás persoas usuarias.

Desde o Concello destacan que esta intervención supón un paso máis no compromiso co medio ambiente e coa transición cara a un modelo de mobilidade máis sostible. Así mesmo, reforzará o atractivo do municipio para veciños, visitantes e peregrinos, ao ofrecer novas opcións de servizo adaptadas ás necesidades actuais.

Arquivo/s adxunto/s

NP - A ESCOLA DE VERÁN DE RIBADUMIA ARRANCOU UN ANO MÁIS CON ARREDOR DE 200 INSCRITOS 09/7/25

O pasado 23 de xuño deu comezo no Concello de Ribadumia unha nova edición da Escola de Verán, unha iniciativa municipal consolidada que este ano contará coa participación duns 200 nenos e nenas do municipio.

A Escola de Verán desenvolverase entre os meses de xuño e setembro, sendo xullo o mes con maior demanda, e manténdose como un recurso clave para facilitar a conciliación da vida laboral e familiar durante o período estival.

Dirixida a menores de 3 a 12 anos, que cursan Educación Infantil e Primaria, a Escola de Verán ofrece un espazo seguro e divertido, onde os máis pequenos gozan dunha programación adaptada ás súas idades, orientada a potenciar o seu desenvolvemento social, motor e persoal.

As actividades son deseñadas e coordinadas polo equipo de monitores do Concello, garantindo un proxecto educativo e lúdico de calidade. Así, para ofrecer o mellor servizo aos nenos e nenas contratáronse un total de 12 monitores e monitoras de tempo libre, entre os que se atopan dous profesionais especializados na atención a menores con necesidades especiais, como reforzo aos tres profesionais que desenvolven a súa labor de forma continuada durante todo o ano nos programas de conciliación e actividades infantís.

O servizo funciona en horario de 7:30 a 15:00 horas, permitindo ás familias dispor dun amplo abano temporal para organizar o seu día a día. As actividades repártense en catro localizacións: a Casa de Cultura de Lois, o CRA de Lois, o CRA de Ribadumia e a Casa de Cultura de Ribadumia, centralizándose en xuño e setembro nesta última.

Deste xeito, o goberno local dálle continuidade aos programas de conciliación que se manteñen activos durante todo o ano, como son o Plan Madruga, a Escola de Ocio ou a Escola Infantil, reafirmando o compromiso coas familias e co benestar da infancia.

Arquivo/s adxunto/s

NP - A OFICINA DE TURISMO DE RIBADUMIA ATENDEU A PRETO DE 1.000 VISITANTES NO MES DE XUÑO 08/7/25

O Concello de Ribadumia fai balance das visitas rexistradas durante o mes de xuño, segundo os datos recompilados pola Oficina de Turismo municipal, que reflicten o bo momento turístico que vive o municipio mellorando os datos deste mesmo período do ano pasado, en especial os relativos ao número de usuarios de fóra do territorio nacional, que aumentaron nun 9,65%.

Ao longo do mes, un total de 989 persoas pasaron pola Oficina de Turismo, das cales un 2% visitaban Ribadumia dende diversos puntos de Galicia, o 26% procedían doutros puntos de España e un 74% eran turistas internacionais. Estes datos evidencian un crecemento nas visitas rexistradas dun 6,34% respecto ao mes de xuño do pasado ano 2024.

Dentro do turismo nacional, destaca o importante fluxo de visitantes de comunidades como Andalucía (104), Madrid (27), País Vasco (25) ou Valencia (22). No apartado internacional, os principais países de procedencia foron Estados Unidos (231 visitantes), Portugal (114), Italia (92), Alemaña (47) e Países Baixos (28), xunto con chegadas doutros destinos máis afastados como Australia, Canadá, Emiratos Árabes ou Sudáfrica.

En canto ao perfil do visitante, o 91% foron peregrinos, mentres que un 8% eran turistas e o 1% excursionistas que se desprazaron a Ribadumia para pasar o día, xa que o municipio segue destacando como enclave dentro da Ruta do Padre Sarmiento - Variante Espiritual do Camiño Portugués, así como pola Ruta da Pedra e da Auga que transcorre o termo municipal.

Cómpre salientar tamén o impacto positivo do turismo no sector do aloxamento local e a hostalaría, pois a maioría dos visitantes fixeron uso de establecementos como o albergue, as casas de uso turístico e hoteis.

Desde o Concello valórase moi positivamente este balance, que pon de manifesto o atractivo das propostas culturais, deportivas, naturais e gastronómicas do municipio, así como a importancia de continuar traballando na promoción turística, no mantemento das rutas e espazos naturais e na organización de actividades que dinamicen a vida local durante todo o ano.

Arquivo/s adxunto/s

NP - RIBADUMIA MELLORA A REDE DE ABASTECEMENTO DE AUGA NA ZONA DO CASAL E A RÚA IGREXA DE BARRANTES 04/7/25

O Concello de Ribadumia está a levar a cabo nestes días obras de mellora na rede de abastecemento de auga municipal, co obxectivo de ampliar o servizo e dotar de auga pública ás zonas do Casal e á rúa Igrexa de Barrantes.

Para facer posible esta actuación, procedeuse á instalación dunha nova conexión á rede existente, dotada de dous collaríns e os correspondentes manómetros, cos que se poderá medir a presión da instalación e comprobar o seu correcto funcionamento unha vez rematados os traballos. Ademais, colocáronse as chaves de paso necesarias para o control e a regulación do caudal, garantindo así unha infraestrutura moderna e adaptada ás necesidades actuais.

Este tipo de actuacións son traballos imprescindibles para avanzar cara unha Ribadumia dotada con servizos de calidade e pensada para o benestar de todos os seus habitantes.

Arquivo/s adxunto/s

CONCESIÓN DE SUBVENCIÓN PARA A PROMOCIÓN DO USO DA LINGUA GALEGA 01/7/25

A consellería de Cultura, Lingua e Xuventude, ven de publicar a Resolución de 5 de xullo de 2024, da Secretaría Xeral da Lingua , pola que se conceden subvencións ás entidades locais de Galicia para a promoción do uso da lingua galega, ao abeiro da convocatoria regulada na Orde do 14 de febreiro do 2025.

O Concello de Ribadumia resultou beneficiario dunha achega de 2.863,16€.

O proxecto de dinamización da lingua, presentado polo Concello de Ribadumia, incluíu a actuación en 2 eidos: servizos sociais e perspectiva de xénero e igualdade.

APERTURA DA PISCINA MUNICIPAL 2025 26/6/25

Mañá, 27 de xuño, comeza a tempada de verán en Ribadumia coa apertura da piscina municipal.

O horario será de 15:00 a 21:00 horas, de luns a domingo.

Non esquezas o teu carné para acceder ao recinto.

Máis información no 986 71 84 91 ou no 986 71 84 99.

Arquivo/s adxunto/s

NP - A NOITE DE SAN XOÁN DESENVOLVEUSE EN RIBADUMIA SEN INCIDENCIAS E CON MÁIS DE 170 FOGUEIRAS 25/6/25

O Concello de Ribadumia fai un balance moi positivo da celebración da Noite de San Xoán, que tivo lugar o pasado luns, 23 de xuño, e que reuniu a centos de persoas en celebracións repartidas por todo o termo municipal.

Este ano comunicáronse un total de 173 solicitudes para a realización de fogueiras, todas elas xestionadas de acordo coa normativa vixente e respectando as condicións de seguridade estipuladas. A noite transcorreu sen incidencias nin avisos aos corpos de emerxencia, o que desde o Concello valoramos como un exemplo de civismo, prevención e bo facer por parte da veciñanza.

A seguinte cita festiva chegará este sábado 28 de xuño, con motivo da celebración da noite de San Pedro, para a que xa se recibiron 182 solicitudes de fogueiras, superando incluso as rexistradas para San Xoán.

Dende o Concello de Ribadumia queremos agradecer o comportamento responsable e o respecto ás normas demostrados durante a pasada noite, e animamos a manter esa mesma actitude na celebración da noite de San Pedro, para que todos poidamos gozar das festas con seguridade, tranquilidade e bo ambiente.

Lembramos que as comunicacións e medidas de seguridade son fundamentais para garantir o éxito destas celebracións tradicionais que tanto forman parte da nosa identidade cultural. A colaboración de todos é clave para que Ribadumia siga sendo un exemplo de convivencia e responsabilidade.

Arquivo/s adxunto/s

Arquivo adxunto-1

NP - O CAMPO DE FÚTBOL DE A BOUZA ESTREARÁ NOVO CÉSPEDE DE ÚLTIMA XERACIÓN 24/6/25

O Concello de Ribadumia xa está a tramitar a contratación para a renovación do céspede artificial do Campo de Fútbol de A Bouza, en Barrantes, co obxectivo de dotar as instalacións dun novo campo de xogo máis seguro, moderno e adaptado ao alto nivel de uso deportivo que concentra este espazo.

O actual céspede presenta un estado de desgaste avanzado, debido á intensa actividade que soporta durante todo o ano, o que supón un risco para os deportistas que utilizan o campo de forma habitual. Para corrixir esta situación, executarase a substitución completa do céspede existente por un sistema de última xeración, con certificación FIFA QUALITY PRO, que garante a súa calidade e resistencia segundo os estándares internacionais.

O novo sistema estará composto por céspede artificial con base elástica "in-situ" de 25 mm de espesor, formada por unha mestura de resinas de poliuretano e granulado de caucho, instalada mediante maquinaria especializada. A herba artificial empregada está deseñada para ofrecer máximo rendemento, durabilidade e confort no xogo, seguindo a normativa oficial da RFEF.

A actuación contempla, ademais do subministro e colocación do novo terreo de xogo, o desmonte completo da superficie actual e do equipamento deportivo, a regularización do pavimento asfáltico, así como a limpeza integral do sistema de drenaxe. Unha vez finalizadas as tarefas, procederase tamén á reinstalación do equipamento, deixando o campo totalmente preparado para o seu uso.

O orzamento total do proxecto ascende a 267.178,91 euros, un investimento que conta co financiamento tanto da Deputación de Pontevedra a través da Liña 1 do Plan +Provincia 2024 e o Plan Extraordinario de Infraestruturas Deportivas; como da aportación por parte de Turismo de Galicia, da Xunta de Galicia, formalizado mediante un convenio.

O Concello, consciente da importancia de seguir mellorando as infraestruturas deportivas municipais e garantir un espazo de xogo seguro, moderno e funcional para todos os clubs, equipos e persoas usuarias da instalación; traballou na procura de fondos para acadar o financiamento do 100% do investimento, evitando así o uso de fondos propios municipais.

Arquivo/s adxunto/s