ACTUALIDADE - ÚLTIMAS NOVAS

Relación de entradas

728 Entradas

ENQUISA Á VECIÑANZA DO PLAN DE ACCIÓN POLO CLIMA E A ENERXÍA SOSTIBLE 24/2/25

Preocúpache o impacto do cambio climático?

Cres que con pequenos cambios podemos avanzar cara a un futuro máis #sostible?

Gustaríache colaborar para que o noso Concello tome decisións que axuden a reducir a súa pegada de carbono e avanzar cara aos Obxectivos de Desenvolvemento Sostible da #ONU?

Agora é o momento! Só precisas 5 minutos: https://forms.gle/ZjYqMszQoWyBx62WA

Enche o FORMULARIO e fai chegar a túa opinión ao equipo encargado do Informe de Seguimento do #PACES (Plan de Acción polo Clima e a Enerxía Sostible). A túa colaboración será clave para definir as accións que nos permitirán reducir as emisións de CO2 e adaptarnos ao cambio climático nos próximos anos.

Participa e axuda a facer do noso Concello un referente na loita contra o cambio climático

Arquivo/s adxunto/s

Arquivo adxunto-1

RIBADUMIA INAUGURA O SEU CURSO DE COMERCIO E SUPERMERCADO DA MAN DE ACCIÓN CONTRA EL HAMBRE 22/2/25

A Casa de Cultura de Ribadumia acolleu onte a inauguración do curso “Comercio e supermercado” do programa formativo Vives Aprende Inclusión: Escolas Inclusivas de Emprego Galicia 2025, impulsado por Acción contra el Hambre. Este ten como obxectivo mellorar a empregabilidade das persoas en situación de desemprego, dotándoas de competencias laborais e coñecementos básicos no ámbito comercial.

De febreiro e xuño, esta acción formativa brindará diversos coñecementos especializados para facilitar a inserción laboral dos participantes, proporcionándolles ademais un programa de prácticas ao remate das sesións teóricas.

A inscrición para este curso continúa aberta e aínda quedan prazas dispoñibles. As persoas interesadas poden anotarse a través da páxina web www.vivesaprende.org, chamando ao teléfono 696 476 831 ou enviando un correo electrónico a mdiz@accioncontraelhambre.org.

Dende o Concello de Ribadumia animamos a todas aquelas persoas en busca de novas oportunidades laborais a participar neste programa, que representa unha gran ocasión para mellorar a súa formación e acceder con máis garantías ao mercado de traballo. Así mesmo, tamén destacamos a importancia deste tipo de iniciativas para fomentar a inclusión social e a empregabilidade no municipio.

Arquivo/s adxunto/s

Campamentos A Lanzada 2025 18/2/25

Visitar sitio web

OBXECTO: Convocatoria de 2025 do programa “Campamentos A Lanzada”, con 1.540 prazas para nenas e nenos da provincia, e establecer as condicións para participar nel.

PARTICIPANTES: Poderán participar nenas e nenos que cumpran os seguintes requisitos:

• Nacer entre os anos 2012 e 2017 (ambos os dous incluídos).

• Estar empadroadas ou empadroados nalgún dos concellos da provincia de Pontevedra.

• Non padecer ningunha enfermidade infecto-contaxiosa en fase activa.

QUENDAS: Os campamentos terán lugar entre o 22 de xuño e o 6 de setembro de 2025. Realizaranse once quendas, de sete días de duración cada unha (de domingo a sábado), nas seguintes datas:

• Primeira quenda: do 22 ao 28 de xuño

• Segunda quenda: do 29 de xuño ao 5 de xullo

• Terceira quenda: do 6 ao 12 de xullo

• Cuarta quenda: do 13 ao 19 de xullo

• Quinta quenda: do 20 ao 26 de xullo

• Sexta quenda: do 27 de xullo ao 2 de agosto

• Sétima quenda: do 3 ao 9 de agosto

• Oitava quenda: do 10 ao 16 de agosto

• Novena quenda: do 17 ao 23 de agosto

• Décima quenda: do 24 ao 30 de agosto

• Décimo primeira quenda: do 31 de agosto ao 6 de setembro

ACTIVIDADES E SERVIZOS OFERTADOS:

a) Un programa de actividades socioculturais, recreativas, formativas, ambientais, científicas e de convivencia que posibilite a participación de todas as rapazas e rapaces. Algunha destas actividades impartirase en lingua inglesa.

Todas as actividades prestaraas un equipo técnico especializado en animación sociocultural e actividades de tempo libre, náuticas, científicas e en lingua inglesa. Así mesmo, no caso de menores con necesidades especiais por razón da súa discapacidade disporase do persoal de apoio necesario adaptado ás súas singularidades.

b) Aloxamento en tendas de campaña e manutención en réxime de pensión completa.

c) Saídas educativas e de lecer.

d) Todo o material necesario para realizar as actividades.

e) Atención sanitaria de primeiros auxilios e seguro de accidentes.

PREZO:

• 110 euros por praza.

• 80 euros por praza para menores de familia numerosa ou monoparental.

PRAZO DE PRESENTACIÓN: O prazo de presentación das solicitudes comezará o 3 de marzo e rematará o 21 de marzo de 2025.

Arquivo/s adxunto/s

Arquivo adxunto-1

NP - O CONCELLO DE RIBADUMIA INICIA AS OBRAS DE MELLORA DOS SERVIZOS DE ABASTECEMENTO E SANEAMENTO NO LUGAR DE SISENLA 17/2/25

O Concello de Ribadumia iniciou as obras de mellora dos servizos públicos de saneamento e abastecemento nun tramo de camiño municipal no lugar de Sisenla, na parroquia de Sisán. Esta actuación, incluída no Plan Máis Provincia 2024 da Deputación de Pontevedra conta cun orzamento total de 50.216,77 euros, con financiamento íntegro por parte do ente provincial.

Tras realizar unha análise previa das redes existentes e das posibilidades da zona, o plan de actuación inclúe a ampliación da rede municipal de saneamento, coa instalación dunha estación de bombeo, e a ampliación da rede municipal de abastecemento de augas.

Tamén se mellorará a recollida de augas pluviais coa execución dun tramo completo de rede soterrada na marxe do camiño e a canalización soterrada, en previsión de futura extensión da rede municipal de alumeado. Finalmente, realizaranse tamén as reposicións do pavimento afectado polas obras e das marcas viarias existentes.

Esta actuación forma parte dun conxunto de melloras que o Concello está a levar a cabo en diversas zonas do municipio para garantir uns servizos máis eficientes e modernos para os veciños e veciñas de Ribadumia. A mellora da infraestrutura tamén favorecerá a calidade de vida e a seguridade vial na zona, sendo un paso máis no proceso de modernización do municipio.

Arquivo/s adxunto/s

RIBADUMIA CONVOCA A SEGUNDA EDICIÓN DO CONCURSO E DESFILE DE DISFRACES E CARROZAS INFANTÍS 12/2/25

O Concello de Ribadumia convoca a segunda edición do Concurso e desfile de disfraces e carrozas infantís de Entroido, que terá lugar o luns 3 de marzo de 2025. Este evento, xa consolidado como unha das citas destacadas do Entroido local, pretende fomentar a creatividade e o espírito festivo entre os máis pequenos e as súas familias, enchendo a localidade de ledicia, cor e música.

O desfile dará comezo ás 16:30 horas na Casa de Cultura de Ribadumia e percorrerá as rúas do municipio ata chegar á Carballeira de Barrantes, onde se celebrará posteriormente a entrega de premios. Ademais, para que os pequenos e pequenas ribadumienses gocen dunha tarde para o recordo, tras a finalización do evento terá lugar un espectáculo de animación infantil a cargo de Javi Solla.

As persoas interesadas en participar poden formalizar a súa inscrición a través da sede electrónica do Concello ou de maneira presencial nas oficinas municipais de luns a venres en horario de 08:00 a 15:00 horas.

As inscricións permanecerán abertas ata o mesmo día do desfile, 3 de marzo, ás 15:00 horas, agás no caso das comparsas e carrozas, que deberán anotarse antes do 24 de febreiro.

As categorías e premios son os seguintes:

Individual Infantil:

1º premio: 100,00€
2º premio: 75,00€
3º premio: 50,00€

Parellas Infantís:

1º premio: 150,00€
2º premio: 100,00€
3º premio: 75,00€

Grupos de máis de 3 persoas:

1º premio: 200,00€
2º premio: 150,00€
3º premio: 100,00€

Carrozas de 3 a 20 persoas:

1º premio: 300,00€
2º premio: 200,00€
3º premio: 150,00€

Carrozas de máis de 20 persoas:

1º premio: 400,00€
2º premio: 300,00€
3º premio: 200,00€

Nas categorías de grupos e carrozas, polo menos o 50% dos integrantes deberán ser menores de 16 anos.

O xurado do concurso terá en conta criterios como a animación, espectacularidade, orixinalidade, espontaneidade, conxunción e animación musical.

Desde o Concello de Ribadumia convidamos a todas as familias, centros educativos e asociacións a participar neste evento festivo. Será unha oportunidade única para gozar do Entroido con creatividade e diversión. Prepara o teu mellor disfrace, reúne aos teus amigos e familiares, e vén a celebrar unha das festas máis esperadas do ano. Vémonos no Entroido 2025 en Ribadumia!

Arquivo/s adxunto/s

$Imagen$

O CRA DE RIBADUMIA ABRE UN ANO MÁIS AS SÚAS PORTAS PARA ACHEGARSE AO NOVO ALUMNADO PARA O CURSO 2025-2026 06/2/25

O Colexio Rural Agrupado (CRA) de Ribadumia abre as súas portas o vindeiro luns 24 de febreiro ás 16:00 horas para celebrar unha xornada de portas abertas destinada a familias con nenos e nenas de 3 a 5 anos que estean a punto de iniciar a súa etapa escolar en setembro.

Esta iniciativa ofrece unha excelente oportunidade para coñecer de primeira man as instalacións das aulas, a súa programación educativa e as actividades que contribúen ao desenvolvemento integral dos nenos e nenas. Durante a visita, as familias poderán descubrir as aulas, explorar proxectos educativos como os traballos de horta e invernadoiro, obradoiros de cociña, actividades de teatro e outras iniciativas que dinamizan e enriquecen o proceso de aprendizaxe.

Ademais, o CRA de Ribadumia tamén presentará os seus servizos complementarios, como o comedor escolar, o plan madruga e as actividades extraescolares, deseñados para facilitar a conciliación e ofrecer unha experiencia educativa completa.

Dende o centro e a ANPA animan a todas as familias a achegarse para resolver calquera dúbida ou inquietude que poidan ter. Así mesmo, informan que, para aquelas persoas interesadas que non poidan acudir na data programada, existe a posibilidade de concertar unha cita personalizada noutro día para coñecer o centro educativo.

Arquivo/s adxunto/s

Arquivo adxunto-1

A CRUZ VERMELLA IMPARTIRÁ EN RIBADUMIA UN CURSO DE ATENCIÓN SOCIOSANITARIA EN PERSOAS DEPENDENTES 04/2/25

O Concello de Ribadumia, en colaboración coa Cruz Vermella, organiza un curso de formación especializado en hixiene, atención sociosanitaria e nutrición en persoas dependentes. A formación, que se impartirá no Auditorio municipal de Ribadumia, comezará no mes de febreiro e terá unha duración de 150 horas.

O obxectivo principal desta iniciativa é capacitar ás persoas participantes nas competencias necesarias para ofrecer unha atención de calidade ás persoas en situación de dependencia, centrándose na súa hixiene, coidados sociosanitarios e nutrición, así como facilitar a inserción laboral neste ámbito.

As prazas son limitadas, polo que se recomenda realizar a inscrición o antes posible. Para máis información ou para formalizar a inscrición, as persoas interesadas poden dirixirse ao teléfono 986 512 244, ao correo electrónico arosa@cruzroja.es ou contactando con Servizos Sociais do Concello de Ribadumia no 986 718 491.

Con este curso, o Concello de Ribadumia e a Cruz Vermella reafirman o seu compromiso coa formación de profesionais nun ámbito tan esencial como é o dos coidados sociosanitarios. Esta acción formativa, ademais de mellorar a preparación técnica das persoas asistentes, contribúe a fomentar unha maior conciencia social e unha atención máis humana e responsable cara ás persoas dependentes.

Arquivo/s adxunto/s

Arquivo adxunto-1

𝐀𝐋𝐄𝐑𝐓𝐀 𝐋𝐀𝐑𝐀𝐍𝐗𝐀 𝐏𝐎𝐑 𝐂𝐎𝐒𝐓𝐄𝐈𝐑𝐎𝐒 24/1/25

📣 Lembrade que, ante o aviso da Agencia Estatal de Meteorología sobre un fenómeno meteorolóxico adverso por costeiros previsto para hoxe, 24 de xaneiro, deberanse extremar as precaucións.

⚠️ Evitade na medida do posible o acceso as zonas como as carballeiras e aos espazos públicos ao aire libre.

Arquivo/s adxunto/s

Arquivo adxunto-1

RIBADUMIA CONTA CON TRES PUNTOS LIMPOS DE PROXIMIDADE NO TERMO MUNICIPAL 20/12/24

O Concello de Ribadumia vén de adquirir unha dotación de tres puntos limpos de proximidade, que se colocaron en diferentes localizacións do termo municipal, e nos que a veciñanza ribadumiense pode depositar de forma sinxela ata sete tipos de residuos domésticos de pequeno tamaño, facilitando así a súa catalogación e posterior reciclaxe.

O orzamento desta acción ascende a un total de 11.978,75 euros, subvencionado parcialmente cunha axuda da Xunta de Galicia con importe de 8.900,10 euros, cofinanciada polo Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU.

Os puntos limpos de proximidade foron instalados na praza do Concello, diante do Mercado Municipal e nas proximidades do Centro de Saúde.

O tipo de materiais que se poden botar nestas instalacións urbanas accesibles e de fácil identificación pola cidadanía son: cartuchos de tinta, residuos de aparatos eléctricos e electrónicos, baterías e pilas usadas, lámpadas (fluorescentes, baixo consumo e leds), material escolar e cápsulas de café. Ademais, o interior de cada un dos sete departamentos está organizado en celdas individuais de xeito que cada tipo de residuo se garde en compartimentos separados no seu interior.

Con esta medida, dende o Consistorio búscase promover a concienciación social e unha reciclaxe efectiva, establecendo unha medida que facilita á veciñanza a entrega de eses restos que ata o de agora carecían de recollida específica na entidade local.

Arquivo/s adxunto/s

Arquivo adxunto-1

NP - O VANDALISMO ATACA AS INSTALACIÓNS DO CPI JULIA MALVAR E NA ESCOLA INFANTIL MUNICIPAL DEIXANDO DIVERSOS DESTROZOS 12/12/24

O CPI Julia Becerra Malvar, de Ribadumia, foi obxecto de varios actos de vandalismo, acontecidos durante a fin de semana.

Entre os danos rexistrados atópanse a pintada de grafitis nas portas, columnas e nos muros exteriores tanto do centro de educación primaria e infantil, como no recinto da Escola Infantil Municipal. Ademais, os docentes tamén notificaron ao Concello de Ribadumia a rotura de fiestras e a queima de cartóns no recinto escolar.

As autoridades competentes da Xefatura da Garda Civil de Cambados xa foron notificadas sobre este incidente, e neste momento estase traballando para esclarecer os detalles e levar a cabo as accións necesarias.

O Concello quere expresar a súa máis firme condena a estes actos vandálicos, que van contra os valores de respecto, convivencia e coidado do espazo público que deben caracterizar o noso municipio. Recordamos que as instalacións escolares como as do CPI Julia Becerra Malvar e a Escola Infantil Municipal son un lugar fundamental para a educación e o desenvolvemento dos nenos e nenas, e é responsabilidade de todos preservalas e protexelas.

Por este motivo, facemos un chamamento á conciencia cidadá para evitar que se repitan actos coma este no futuro. O vandalismo non só implica un custo económico para os veciños e veciñas, senón que tamén provoca un dano moral e social difícil de medir.

Dende o Concello de Ribadumia reiteramos o noso compromiso coa protección dos espazos públicos e seguiremos traballando para garantir a seguridade e o benestar de toda a cidadanía. Así mesmo, animamos a calquera persoa que poida aportar información relevante a poñerse en contacto coas autoridades locais.

Arquivo/s adxunto/s

O Concello de Ribadumia mellora o equipamento básico da Biblioteca Municipal con mobiliario e equipamento informático 03/12/24

O Concello de Ribadumia mellora o equipamento básico da Biblioteca Municipal incorporando mesas dobres con pantallas separadoras ao seu mobiliario na sala de estudo para dar cabida a mais ususarios deste espazo e tamen varias estanterías para dar cabida a mais libros e material educativo e de lecer.

Ademais, co obxecto de mellorar a xestión do empréstito de libros adquiriuse unha Impresora para crear novos e renovar os carnets existentes dos usuarios da biblioteca.

Con estas melloras, o goberno local pretende renovar e adecuar os espazos dirixidos a xuventude, fomentar o uso deste espazo pola mocidade e facer o local mais accesible para o desenvolevmento de proxectos xuvenís que redunden no beneficio da comunidade.

A Casa de Cultura de Ribadumia, abre todos os dias da semana e atrae especialmente aos mais xoves xa que ali se atopa a Oficina Municipal de Información Xuvenil, a biblioteca municipal, a aula internet e ademais, é un espazo onde se desenvolven diversas actividades formativas para cativos, mozos e adultos.

Este investimento contou coa financiación do Servizo de Xuventude e Reto Demográfico da Deputación de Pontevedra que aportou 2.100,00€ a través do programa "O teu espazo xuvenil".

NP - RIBADUMIA ILUMINA O SEU NADAL CO TRADICIONAL ACENDIDO DE LUCES 03/12/24

O Concello de Ribadumia dará comezo ao seu Nadal este xoves, 5 de decembro, co acendido do alumeado. Esta cita terá lugar ás 19:30 horas na Praza do Concello cando os representantes do Goberno local e da asociación de comerciantes Ribadumia Agárdate inauguren, en colaboración, o Nadal ribadumiense.

Será unha xornada en que toda a familia e a veciñanza goce dunha tarde chea de música e entretemento, rosca, castañas e chocolate quente gratuíto para todas as persoas que se acheguen ata o lugar do acendido. Ás 19:30 horas estrearase o alumeado e farase un brinde en que se desexará un bo Nadal e unhas felices festas.

O Concello de Ribadumia convida a toda a veciñanza do municipio e arredores a asistir ao tradicional acendido do alumeado e compartir unha tarde chea de ledicia e espírito de Nadal. O Goberno local espera dar comezo a estas celebracións con este evento para todos os ribadumienses na compañía de amigos, familiares e veciños.

Arquivo/s adxunto/s

NP - RIBADUMIA PREMIA ÁS MELLORES DECORACIÓNS DE NADAL DE VIVENDAS E ESCAPARATES 28/11/24

Tras o éxito das anteriores edicións, o Concello de Ribadumia convoca un ano máis o V Concurso de decoración de Nadal en ventás e exteriores de vivendas e o V Concurso de decoración de Nadal de escaparates e interiores de establecementos, este último promovido en colaboración coa asociación de comerciantes do municipio “Ribadumia Agárdate”.

O obxectivo destes dous certames non é outro que promover a creatividade dos veciños e veciñas de Ribadumia, animándoos a decorar os seus balcóns, ventás, exteriores ou establecementos, nunha data tan sinalada como é o Nadal. Así mesmo, tamén se busca impulsar a promoción do comercio local de Ribadumia, repartindo 890 euros en premios para gastar nos establecementos con sede no municipio.

O xurado valorará diferentes aspectos como a creación artística, a presentación, creatividade, orixinalidade, as cores e iluminación e os elementos característicos da nosa cultura e tradicións, así como os adornos de Nadal feitos con material reciclado.

As persoas que desexen participar teñen de prazo para inscribirse ata o venres 20 de decembro de 2024 de forma presencial no Concello de Ribadumia, a través do correo electrónico cultura@ribadumia.org ou no teléfono 986718491.

Os veciños e veciñas de Ribadumia que queiran participar coa decoración dos seus fogares deberán ter exposta a súa decoración, cando menos, entre o 8 de decembro de 2024 e o 7 de xaneiro de 2025.

Unha vez rematado o prazo de inscrición nos concursos, o xurado reunirase para examinar as candidaturas presentadas e decidir os galardoados da presente edición. No caso do concurso de vivendas, o xurado estrará composto por dous representantes do Concello de Ribadumia e un representante da Asociación de Comerciantes de Ribadumia. Por outra banda, para o concurso de escaparates e interiores de establecementos, o xurado estará formado por un representante do Concello de Ribadumia e dous representantes da Asociación de Comerciantes.

Os gañadores e gañadoras dos dous concursos daranse a coñecer o día da Cabalgata de Reis, ademais de ser comunicados persoalmente e a través das redes sociais municipais. Para coñecer máis información arredor de todas as condicións e dereitos dos concursos, pódense consultar as bases que se publicarán na web do Concello de Ribadumia e no taboleiro municipal.

Premios do Concurso de decoración de Nadal de ventás e exteriores de vivendas:

- 1º premio: 200€ en vales de 20€ para empregar no comercio local.

- 2º premio: 140€ en vales de 20€ para empregar no comercio local.

- 3º premio: 100€ en vales de 20€ para empregar no comercio local.

Premios do Concurso de decoración de Nadal de escaparates e interiores de establecementos:

- 1º premio: 200€ e un diploma de recoñecemento.

- 2º premio: 150€ e un diploma de recoñecemento.

- 3º premio: 100€ e un diploma de recoñecemento.

Dende o Concello animamos a todos os nosos veciños e veciñas a sumarse a esta iniciativa polo Nadal, decorando Ribadumia dunha forma orixinal coa que poidamos atraer a visitantes dos municipios da comarca e potenciar o comercio local de cara as compras destas sinaladas datas.

Arquivo/s adxunto/s

O CONCELLO DE RIBADUMIA ULTIMA OS PREPARATIVOS PARA O ENCONTRO LITERARIO "LITERATURA E VIÑO" 27/11/24

O venres 20 e sábado 21 de decembro tense previsto celebrar no Auditorio Municipal de Ribadumia a primeira edición dun encontro literario que levará por título "Literatura e viño". O evento leva este título debido a que se fai unha especie de maridaxe entre o viño que estará presente na celebración e un homenaxe as nosas letras. Con este proxecto, o Concello de Ribadumia pretende promover a dinamización da lingua galega e promocionar o seu uso e mellorar o seu prestixio.

Diversos autores galegos e algúns deles con varios recoñecementos, interactuarán e intercambiarán experiencias, explorarán as claves de creación literaria, falarán das súas obras, darán a coñecer textos en lingua galega, todo elo nun espazo literario onde o de público será participe dese cara a cara.

Prevese a participación de tres librerías no evento, varias adegas e a asociación CenFollas, esta última editora da Revista Cen Follas - De artes e letras.

O proxecto, conta co cofinanciamento da Deputación de Pontevedra que lle concedeu ao Concello de Ribadumia unha axuda de 3.562,50€.

NP - O CONCELLO DE RIBADUMIA CONMEMORA O 25N COA LECTURA DO MANIFESTO E UN PUNTO VIOLETA 26/11/24

O Concello de Ribadumia conmemorou o Día Internacional para a Eliminación da Violencia contra as Mulleres realizando a lectura do Manifesto institucional no Auditorio, ata onde se achegaron veciños e veciñas do municipio, representantes políticos e representantes do tecido asociativo e deportivo do concello, sumándose á loita pola igualdade.

O acto deu comezo ás 12:00 horas da man do pianista Juan Carlos Cambas que tocou unha emotiva peza instrumental, acompañado dunha interpretación de danza por parte de dúas ximnastas do club de ximnasia rítmica Grand Jeté.

Rematada a peza, o alcalde de Ribadumia, David Castro, tomou a palabra para avogar por unha sociedade igualitaria e libre de violencias, destacando o papel fundamental que deben desempeñar as institucións como axentes de apoio, dando visibilidade e información de especial relevancia para acadar este fin.

Tras isto, deu comezo a lectura conxunta do Manifesto, que foi realizada polo alcalde, ao que lle seguiu a concelleira de Igualdade e Servicios Sociais, Alba Martínez. Finalmente, rematou a proclama a coordinadora do CIM da Mancomunidade do Salnés, Ana Balsa, quen tamén aproveitou a súa intervención para lembrar ás persoas presentes que todas as mulleres vítimas de violencia de xénero teñen a súa disposición o CIM do Salnés, no que poden recibir axuda psicolóxica e xurídica, así como información de especial importancia.

Finalmente, o acto conmemorativo pechouse cunha nova interpretación musical por parte de Juan Carlos Cambas, esta vez acompañado pola solista Rosa Leiro.

Paralelamente á celebración no Auditorio, na praza do Concello instalouse dende primeira hora da mañá un Punto Violeta no que se proporcionou a todas as persoas que se achegaron ata alí información relativa á campaña de sensibilización da Deputación de Pontevedra para este 25N baixo os lemas “Compracer nunca, con pracer sempre” e “Non a líes, alíate”.

Ademais, este punto informativo tamén se desprazou ata o CPI Julia Becerra Malvar, onde se lle repartiron aos alumnos e alumnas de Educación Secundaria Obrigatoria unhas pulseiras e un pequeno folleto informativo.

Arquivo/s adxunto/s

NP - O CONCELLO DE RIBADUMIA REALIZA OBRAS DE AMPLIACIÓN E MELLORA NO CAMIÑO DE ACCESO A OUTEIRO E PUXAFEITA 19/11/24

O Concello de Ribadumia deu comezo ás obras necesarias para a ampliación e mellora do camiño de titularidade municipal que transcorre dende a estrada provincial EP-9305 Coirón - Ribadumia - Leiro cara os núcleos de Outeiro e Puxafeita, ambos na parroquia de Ribadumia.

Este proxecto pertence ao Plan Marco de Mellora de Camiños Municipais de Acceso a Parcelas Agrícolas 2024/205 e conta cun orzamento base de 62.139, 30 euros, destinado a conseguir unha correcta accesibilidade ás diversas explotacións e fincas agrícolas, así como proporcionar mellores prestacións ás vivendas dos núcleos próximos.

O tramo citado presentaba anteriormente unha serie de dificultades para o tránsito rodado como unha lomba no camiño que limitaba a correcta visión, así como unha anchura insuficiente da plataforma do viario, o que impedía o cruzamento de dous vehículos en dirección contraria.

O plan de actuación a seguir polo Concello contempla a ampliación da plataforma do camiño, rematando adecuadamente as marxes do mesmo mediante a execución de muros de contención de terras e muros de perpiaños; así como a pavimentación con firme de aglomerado asfáltico en idénticas condicións que o xa existente e a recollida das augas pluviais superficiais sobre o camiño, dirixíndoas cara a rede existente na estrada provincial.

Arquivo/s adxunto/s

NP - A CASA CONSISTORIAL DE RIBADUMIA CONTA CUNHA NOVA INSTALACIÓN FOTOVOLTAICA PARA AUTOCONSUMO 18/11/24

O Concello de Ribadumia dá un paso máis no seu compromiso co uso das enerxías renovables, incorporando unha instalación paneis solares fotovoltaicos para o autoconsumo na casa do Concello, contando cun orzamento de 11.410,30 euros para a realizacións dos traballos correspondentes.

O Instituto Enerxético de Galicia (INEGA) concedeu ao ente municipal unha subvención de 7.680,40 euros para este fin, financiándose no marco do Plan de Recuperación, Transformación e Resiliencia Europeo, ao amparo do instrumento temporal Next Generation EU.

A instalación consta de 16 paneis monocristalinos cunha potencia unitaria de 455 Wp, facendo un total de 7,28 kW de potencia total. O inversor ten unha potencia de 7,00 kW. Así, a potencia nominal da instalación será de 7,00 kW, por ser a potencia máis baixa, considerando a potencia do campo fotovoltaico e do inversor.

O campo fotovoltaico instalarase na cuberta da Casa do Concello, en superposición co tellado da mesma. Ademais, instalaranse correctamente o cabreado e proteccións necesarias, e realizarase a documentación técnica necesaria para a súa legalización.

Dende o consistorio adóptase esta medida co obxectivo de mellorar a eficiencia enerxética do edificio, apostando polas fontes de enerxía limpas, como é a solar, esperando acadar ademais unha notable redución dos custos eléctricos para as arcas municipais, podendo investir os fondos empregados con anterioridade noutros fins, de cara a mellorar a calidade de vida da veciñanza de Ribadumia.

Arquivo/s adxunto/s

O CONCELLO DE RIBADUMIA CONVOCA A XXII EDICIÓN DO CONCURSO DE POSTAIS DE NADAL 15/11/24 - 25/11/24 14:00

As datas festivas do Nadal vanse achegando e, con elas, o comezo da programación especial do Concello de Ribadumia, que este ano convoca o XXII Concurso de Postais de Nadal. As persoas interesadas poden consultar as bases do certame no taboleiro de anuncios, na plataforma municipal e nas redes sociais.

O concurso está aberto a todos os nenos e nenas de entre 3 e 16 anos, empadroados no Concello de Ribadumia, escolarizados no CPI Julia Becerra Malvar ou no CRA de Ribadumia. Cada alumno ou alumna poderá presentar un único traballo en tamaño cuartilla e participará na categoría que lle corresponda segundo o seu curso escolar (infantil, primaria ou ESO).

A temática das postais terá que facer alusión ao Nadal e á exaltación dos valores típicos destas datas como, por exemplo, a solidariedade, a familia, a amizade, a reunión ou ledicia. Ademais, terán que ser orixinais e non estar presentadas a outros concursos.

Para presentar estas creacións haberá, en cada centro escolar, unha urna para depositalas. No Concello de Ribadumia tamén haberá unha urna para facer a súa entrega, que estará dispoñible ata o luns 25 de novembro ás 14:00 horas.

Unha vez se coñezan os gañadores de cada unha das categorías, os traballos presentados pasarán a ser propiedade do Concello, e o fin último do concurso é a elaboración da felicitación de Nadal coas postais gañadoras.

Tendo en conta que estamos preto dunha das datas favoritas da pequena veciñanza, o Concello de Ribadumia anima ás novas xeracións a participar neste tipo de actividades que, ademais de facelas partícipes do que ocorre en Ribadumia, fomentan a estimulación da creatividade.

Arquivo/s adxunto/s

NP - O MERCADO DE RIBADUMIA EN CAMIÑO DE CONSEGUIR O SELO DE EXCELENCIA 14/11/24

O Concello de Ribadumia, consciente da importancia que os mercados teñen na vida local, ven de recibir unha subvención da Consellería de Emprego, Comercio e Emigración grazas a cal iniciar un proceso de diagnose da situación actual e os usos de dita instalación municipal. O orzamento previsto para a acción é de 9.680,00 euros, dos cales o ente autonómico faise cargo do 80% do total.

O plan do Concello de cara a conseguir o recoñecemento do selo de excelencia é emprender accións de mellora que fagan que este espazo sexa un lugar competitivo e atractivo, que responda ás necesidades dos comerciantes que desenvolven alí a súa actividade diaria, así como para os potenciais consumidores, co fin de que se consolide un comercio de proximidade moderno e innovador.

Arquivo/s adxunto/s

NP - REMATAN AS OBRAS DE EXECUCIÓN DO PECHE LATERAL DA AULA DO C.R.A. DE RIBADUMIA 14/11/24

Tras analizar o estado do peche da escola infantil C.R.A. de Ribadumia, localizada na parroquia de Ribadumia, dende o Concello ordenouse a execución dun novo muro lateral, cuxo proxecto ascende a un orzamento total de 10.875,01 euros.

O proxecto executouse co obxecto de acadar unha correcta solución de cerramento do espazo escolar e garantir a seguridade dos usuarios e usuarias das instalacións municipais. Ademais, a renovación do muro permite acadar unha imaxe uniforme do peche frontal do recinto.

O novo peche ten unha lonxitude de 29,60 metros, conformado por unha fileira granítico abuxardada en ambas caras, cunha altura de 0,50 metros en tonalidade similar á pedra existente. Así mesmo, completouse a instalación cunha malla metálica simple de torsión, plastificada en cor verde, alcanzando unha altura final de 1,50 metros. A base do peche, nivelándoa co patio interior do recinto do C.R.A, realizouse con bloques de mampostería granítica.

Esta actuación é unha mostra máis do compromiso do equipo de Goberno local, asegurando espazos seguros que permitan un correcto desenvolvemento académico e persoal do alumnado.

Arquivo/s adxunto/s