ACTUALIDADE - ÚLTIMAS NOVAS

Relación de entradas

766 Entradas

NP - A OFICINA DE TURISMO DE RIBADUMIA ATENDEU A PRETO DE 1.000 VISITANTES NO MES DE XUÑO 08/7/25

O Concello de Ribadumia fai balance das visitas rexistradas durante o mes de xuño, segundo os datos recompilados pola Oficina de Turismo municipal, que reflicten o bo momento turístico que vive o municipio mellorando os datos deste mesmo período do ano pasado, en especial os relativos ao número de usuarios de fóra do territorio nacional, que aumentaron nun 9,65%.

Ao longo do mes, un total de 989 persoas pasaron pola Oficina de Turismo, das cales un 2% visitaban Ribadumia dende diversos puntos de Galicia, o 26% procedían doutros puntos de España e un 74% eran turistas internacionais. Estes datos evidencian un crecemento nas visitas rexistradas dun 6,34% respecto ao mes de xuño do pasado ano 2024.

Dentro do turismo nacional, destaca o importante fluxo de visitantes de comunidades como Andalucía (104), Madrid (27), País Vasco (25) ou Valencia (22). No apartado internacional, os principais países de procedencia foron Estados Unidos (231 visitantes), Portugal (114), Italia (92), Alemaña (47) e Países Baixos (28), xunto con chegadas doutros destinos máis afastados como Australia, Canadá, Emiratos Árabes ou Sudáfrica.

En canto ao perfil do visitante, o 91% foron peregrinos, mentres que un 8% eran turistas e o 1% excursionistas que se desprazaron a Ribadumia para pasar o día, xa que o municipio segue destacando como enclave dentro da Ruta do Padre Sarmiento - Variante Espiritual do Camiño Portugués, así como pola Ruta da Pedra e da Auga que transcorre o termo municipal.

Cómpre salientar tamén o impacto positivo do turismo no sector do aloxamento local e a hostalaría, pois a maioría dos visitantes fixeron uso de establecementos como o albergue, as casas de uso turístico e hoteis.

Desde o Concello valórase moi positivamente este balance, que pon de manifesto o atractivo das propostas culturais, deportivas, naturais e gastronómicas do municipio, así como a importancia de continuar traballando na promoción turística, no mantemento das rutas e espazos naturais e na organización de actividades que dinamicen a vida local durante todo o ano.

Arquivo/s adxunto/s

NP - RIBADUMIA MELLORA A REDE DE ABASTECEMENTO DE AUGA NA ZONA DO CASAL E A RÚA IGREXA DE BARRANTES 04/7/25

O Concello de Ribadumia está a levar a cabo nestes días obras de mellora na rede de abastecemento de auga municipal, co obxectivo de ampliar o servizo e dotar de auga pública ás zonas do Casal e á rúa Igrexa de Barrantes.

Para facer posible esta actuación, procedeuse á instalación dunha nova conexión á rede existente, dotada de dous collaríns e os correspondentes manómetros, cos que se poderá medir a presión da instalación e comprobar o seu correcto funcionamento unha vez rematados os traballos. Ademais, colocáronse as chaves de paso necesarias para o control e a regulación do caudal, garantindo así unha infraestrutura moderna e adaptada ás necesidades actuais.

Este tipo de actuacións son traballos imprescindibles para avanzar cara unha Ribadumia dotada con servizos de calidade e pensada para o benestar de todos os seus habitantes.

Arquivo/s adxunto/s

RIBADUMIA COMEZA A LIMPEZA E DESINFECCIÓN DE PRETO DE 700 CONTEDORES DO MUNICIPIO 01/7/25

O Concello de Ribadumia informa que esta mesma semana comezaron os traballos de limpeza e mantemento dos contedores verdes situados ao longo de todo o municipio, unha actuación incluída no programa municipal de conservación e posta a punto dos espazos públicos.

En total, serán preto de 700 contedores os que se limparán nos próximos días nas súas ubicacións actuais, mediante un vehículo lavacontedores de alta presión que actuará inmediatamente despois do vaciado dos colectores. Este sistema permite minimizar o tempo de limpeza de cada contedor, reducindo o consumo de auga e garantindo un proceso máis respectuoso co medio ambiente.

Antes do inicio do servizo, realizouse unha planificación conxunta entre o persoal municipal e a empresa encargada da limpeza, co obxectivo de coordinar as rutas do camión de recollida de lixo co vehículo lavacontedores. Deste xeito, asegúrase que cada contedor sexa lavado e desinfectado tras ser baleirado, o que supón unha maior eficiencia e un mellor resultado final.

A limpeza dos contedores cobra especial importancia nesta época estival, cando as altas temperaturas poden xerar cheiros molestos, polo que este servizo contribúe a mellorar a calidade ambiental e a boa imaxe turística do municipio, ademais de ofrecer un beneficio directo á veciñanza. O custo total desta actuación é de 7.315 euros, IVE incluído, financiados con fondos municipais.

Esta intervención súmase ás distintas accións de mantemento e coidado que o Concello leva a cabo de forma continuada para manter Ribadumia nas mellores condicións de hixiene, limpeza e estética, tanto para o benestar dos veciños e veciñas como para todas aquelas persoas que nos visitan para facer turismo ou gozar das actividades culturais e deportivas previstas nas vindeiras datas.

Arquivo/s adxunto/s

APERTURA DA PISCINA MUNICIPAL 2025 26/6/25

Mañá, 27 de xuño, comeza a tempada de verán en Ribadumia coa apertura da piscina municipal.

O horario será de 15:00 a 21:00 horas, de luns a domingo.

Non esquezas o teu carné para acceder ao recinto.

Máis información no 986 71 84 91 ou no 986 71 84 99.

Arquivo/s adxunto/s

NP - A NOITE DE SAN XOÁN DESENVOLVEUSE EN RIBADUMIA SEN INCIDENCIAS E CON MÁIS DE 170 FOGUEIRAS 25/6/25

O Concello de Ribadumia fai un balance moi positivo da celebración da Noite de San Xoán, que tivo lugar o pasado luns, 23 de xuño, e que reuniu a centos de persoas en celebracións repartidas por todo o termo municipal.

Este ano comunicáronse un total de 173 solicitudes para a realización de fogueiras, todas elas xestionadas de acordo coa normativa vixente e respectando as condicións de seguridade estipuladas. A noite transcorreu sen incidencias nin avisos aos corpos de emerxencia, o que desde o Concello valoramos como un exemplo de civismo, prevención e bo facer por parte da veciñanza.

A seguinte cita festiva chegará este sábado 28 de xuño, con motivo da celebración da noite de San Pedro, para a que xa se recibiron 182 solicitudes de fogueiras, superando incluso as rexistradas para San Xoán.

Dende o Concello de Ribadumia queremos agradecer o comportamento responsable e o respecto ás normas demostrados durante a pasada noite, e animamos a manter esa mesma actitude na celebración da noite de San Pedro, para que todos poidamos gozar das festas con seguridade, tranquilidade e bo ambiente.

Lembramos que as comunicacións e medidas de seguridade son fundamentais para garantir o éxito destas celebracións tradicionais que tanto forman parte da nosa identidade cultural. A colaboración de todos é clave para que Ribadumia siga sendo un exemplo de convivencia e responsabilidade.

Arquivo/s adxunto/s

Arquivo adxunto-1

NP - O CAMPO DE FÚTBOL DE A BOUZA ESTREARÁ NOVO CÉSPEDE DE ÚLTIMA XERACIÓN 24/6/25

O Concello de Ribadumia xa está a tramitar a contratación para a renovación do céspede artificial do Campo de Fútbol de A Bouza, en Barrantes, co obxectivo de dotar as instalacións dun novo campo de xogo máis seguro, moderno e adaptado ao alto nivel de uso deportivo que concentra este espazo.

O actual céspede presenta un estado de desgaste avanzado, debido á intensa actividade que soporta durante todo o ano, o que supón un risco para os deportistas que utilizan o campo de forma habitual. Para corrixir esta situación, executarase a substitución completa do céspede existente por un sistema de última xeración, con certificación FIFA QUALITY PRO, que garante a súa calidade e resistencia segundo os estándares internacionais.

O novo sistema estará composto por céspede artificial con base elástica "in-situ" de 25 mm de espesor, formada por unha mestura de resinas de poliuretano e granulado de caucho, instalada mediante maquinaria especializada. A herba artificial empregada está deseñada para ofrecer máximo rendemento, durabilidade e confort no xogo, seguindo a normativa oficial da RFEF.

A actuación contempla, ademais do subministro e colocación do novo terreo de xogo, o desmonte completo da superficie actual e do equipamento deportivo, a regularización do pavimento asfáltico, así como a limpeza integral do sistema de drenaxe. Unha vez finalizadas as tarefas, procederase tamén á reinstalación do equipamento, deixando o campo totalmente preparado para o seu uso.

O orzamento total do proxecto ascende a 267.178,91 euros, un investimento que conta co financiamento tanto da Deputación de Pontevedra a través da Liña 1 do Plan +Provincia 2024 e o Plan Extraordinario de Infraestruturas Deportivas; como da aportación por parte de Turismo de Galicia, da Xunta de Galicia, formalizado mediante un convenio.

O Concello, consciente da importancia de seguir mellorando as infraestruturas deportivas municipais e garantir un espazo de xogo seguro, moderno e funcional para todos os clubs, equipos e persoas usuarias da instalación; traballou na procura de fondos para acadar o financiamento do 100% do investimento, evitando así o uso de fondos propios municipais.

Arquivo/s adxunto/s

NP - O CONCELLO DE RIBADUMIA AVANZA NA CONTRATACIÓN DA REPARACIÓN E MELLORA DOS PARQUES INFANTÍS DA PRAZA DO CONCELLO E DA CARBALLEIRA DE BARRANTES 18/6/25

O Concello de Ribadumia avanza na contratación para a execución do proxecto de reparación e mellora dos parques infantís municipais situados na Praza do Concello e na carballeira de Barrantes, dúas áreas de lecer fundamentais para a infancia do municipio.

A actuación contará cun orzamento base de 169.512,22 euros, que será financiado integramente a través da Liña 1 do Plan +Provincia da Deputación de Pontevedra. O obxectivo principal é renovar, adaptar e garantir a seguridade dos elementos de xogo existentes, mellorando así a calidade dos espazos destinados aos pequenos e pequenas de Ribadumia.

Na actualidade, varios dos xogos destes parques presentan desgaste ou deterioro, o que fai necesaria a súa reparación ou substitución. O proxecto contempla a retirada daqueles elementos que xa non sexan seguros nin susceptibles de reparación, substituíndoos por novos xogos de similares características, máis modernos e adaptados ás necesidades actuais.

As actuacións previstas son as seguintes:

No parque infantil da carballeira de Barrantes, retirarase o pavimento de caucho, os xogos actuais e parte da varanda. Ademais procederase á instalación de:

• Dous equipos combinados de xogos.

• Dous pórticos arrandeadoiros (un con asentos planos e outro de berce).

• Un xogo de balancín xiratorio, un trampolín, un xogo de resorte individual novo e outro recolocado.

• Un balancín existente recolocado.

• Nova varanda perimetral e cartel informativo.

No parque da Praza do Concello, retiraranse os xogos biosaludables, os xogos infantís e o pavimento existente. Así mesmo instalaranse:

• Unha cuneta e sistema de drenaxe para evitar a acumulación de auga.

• Novo pavimento de seguridade con céspede artificial e paneis de polietileno.

• Un equipo combinado de xogos, unha tirolesa, un pórtico con asento plano, berce e cesta.

• Dous balancíns, dous trampolíns, un resorte individual e unha mariola.

Con esta actuación, o Concello de Ribadumia reafirma o seu compromiso co benestar da infancia e a mellora dos espazos públicos, creando contornas seguras, accesibles e atractivas para que os nenos e nenas do municipio poidan gozar do seu tempo de lecer nas mellores condicións.

Arquivo/s adxunto/s

NP - A 52ª FESTA DO VIÑO TINTO DO SALNÉS CONFÍRMASE COMO UN ÉXITO DE PARTICIPACIÓN, AMBIENTE E PROMOCIÓN DO TERRITORIO 17/6/25

O Concello de Ribadumia fai unha valoración moi positiva da 52ª edición da Festa do Viño Tinto do Salnés e Exaltación das Variedades Autóctonas, que se celebrou entre os días 5 e 8 de xuño, e que volveu converter ao municipio no epicentro do viño, da cultura e da festa na comarca do Salnés.

Tanto a veciñanza como os centos de visitantes que se achegaron á parroquia de Barrantes durante os catro días coinciden en destacar o bo ambiente, a calidade dos actos e o éxito organizativo da festa. A carpa dos stands rexistrou unha actividade moi intensa, con altos niveis de venda e participación, tal e como trasladaron tanto os adegueiros como o público asistente, que eloxiaron o ambiente vivido e o formato do evento.

Todos os actos, dende o pistoletazo de saída do xoves cunha programación dirixida á mocidade ata a noite do domingo co peche cos fogos de artificio, os actos da programación contaron cunha gran afluencia e implicación, consolidando esta celebración como unha das festas vitivinícolas máis multitudinarias de Galicia.

O Xantar de Confraternidade do sábado 7 de xuño reuniu arredor de 1.000 persoas, demostrando unha vez máis o arraigamento social e o respaldo institucional e popular a esta festa. Aínda que o evento estivo marcado polo triste falecemento dun dos cociñeiros, desde o Concello trasladamos novamente o noso máis sentido pesar á súa familia e recoñecemos a profesionalidade e o compromiso de todo o equipo de cociña que continuou co servicio.

Outro dos momentos destacados da programación foi a VIII Andaina Solidaria do domingo 8 de xuño, que acadou unha participación de preto de 150 persoas e logrou unha recadación superior aos 1.000 euros, destinados á asociación TDAH Salnés. A colaboración voluntaria a modo de inscrición dos participantes supuxo un incremento notable respecto á edición anterior e reforza o carácter solidario da festa.

A festa tamén contou cun Punto Violeta, dentro da campaña “No Tinto diversión, non agresión”. O espazo estivo operativo de venres a domingo ofrecendo información, apoio e atención a quen o precisase, ademais de estar en contacto directo co posto de mando dos servicios de emerxencia para actuar de forma rápida e efectiva de ser necesario.

Desde o Concello de Ribadumia queremos agradecer a implicación de todas as persoas: membros da comisión, persoal do Concello, catadores, voluntarios, corpos de seguridade, servicios de emerxencia, entidades colaboradoras e adegas participantes, así como ao público que fixo posible que, un ano máis, a Festa do Viño Tinto do Salnés e Exaltación das Variedades Autóctonas sexa un exemplo de dinamización económica, cultural e turística. Esta celebración é unha referencia que leva o nome de Ribadumia por toda a comarca, por toda Galicia e o territorio nacional, e seguiremos traballando para que nas vindeiras edicións continúe medrando.

Arquivo/s adxunto/s

LISTADOS PROVISIONAIS DE ADMITIDOS I EXCLUÍDOS NA ESCOLA DE OCIO-VERÁN 2025 11/6/25

A partir de hoxe atópanse dispoñibles os listados provisionais de admitidos i excluídos na Escola de Ocio-Verán 2025. Podedes consultalos nas oficinas da Casa do Concello ou chamando ao 986718491/9.

AMPLIACIÓN HORARIO A ESTABLECEMENTOS DE HOSTALARÍA DURANTE A LII FESTA DO TINTO DO SALNÉS 26/5/25

Por Resolución de Alcaldía aprobouse con motivo da celebración da LII Festa do Viño Tinto do Salnés e das Variedades Autóctonas, ampliar o horario de peche dos establecementos abertos ao público e de finalización dos espectáculos públicos e das actividades recreativas durante os días 5, 6 e 7 de xuño de 2025, en 2 horas, quedando polo tanto os horarios dispoñibles dos seguintes establecementos:

• Cafeterías: ata as 4:30 horas.

• Restaurantes: ata as 4:00 horas.

• Bares: ata as 4:30 horas.

• Pubs: ata as 6:00 horas.

Arquivo/s adxunto/s

O CONCELLO DE RIBADUMIA DESTACA AS MELLORAS REALIZADAS NA PLANTA DE TRANSFERENCIA DE RESIDUOS DE SOGAMA, QUE DA SERVIZO A MÁIS DUNHA VEINTENA DE MUNICIPIOS 23/5/25

O Concello de Ribadumia vén de constatar o resultado das obras de mellora acometidas recentemente na planta de transferencia de residuos de Sogama, situada no noso municipio. Trátase dunha infraestrutura clave para a comarca, que presta servizo a máis dunha vintena de concellos, especialmente relevante durante os meses de verán, cando o volume de residuos se duplica ou incluso triplica debido ao incremento da poboación estacional e o turismo.

As melloras foron financiadas pola empresa pública Sogama, que destinou máis de 600.000 euros á estabilización e consolidación dun talude de gran altura situado nunha parcela anexa á instalación, así como á construción de novos vestiarios e a reparación do aparcadoiro de contedores existente, ao que se engadiron dúas prazas novas.

A planta de Ribadumia está preparada para o tratamento de dúas fraccións principais de residuos: a coñecida como bolsa amarela, que contén envases lixeiros (plástico, latas e briks), e a bolsa negra, correspondente aos restos non reciclable. Estas fraccións son recollidas polos servizos municipais e trasladadas á planta, onde se transfire o seu contido a colectores de gran capacidade equipados con mecanismos de seguridade, e posteriormente son enviadas ao Complexo Medioambiental de Sogama en Cerceda.

No caso da bolsa amarela, os materiais son separados por tipoloxías para seren remitidos aos centros recicladores. Os restos da bolsa negra, pola súa banda, pasan por un proceso de selección mediante tecnoloxía 4.0 que permite recuperar a parte reciclable, destinando o restante á produción de enerxía eléctrica.

Ademais, os concellos que dispoñen de recollida diferenciada de materia orgánica a través do contenedor marrón deben transportar estes residuos á planta de compostaxe de Vilanova de Arousa, onde se transforman nun abono natural destinado a usos agrícolas e de xardinaría.

Os datos de xestión da planta de Ribadumia en 2024 reflicten a importancia desta infraestrutura: 99.145,51 toneladas de bolsa negra, cun lixeiro descenso do 0,33% respecto a 2023, e 4.545,74 toneladas de bolsa amarela, cun aumento do 6,76% respecto ao ano anterior.

Dende o Concello valoran moi positivamente estas actuacións, que melloran a seguridade e funcionalidade da planta, ao tempo que contribuímos, como municipio anfitrión, a un modelo de xestión de residuos máis eficiente, sostible e comprometido co medio ambiente.

Arquivo/s adxunto/s

NP - O CONCELLO DE RIBADUMIA CONTINÚA COA SÚA POSTA A PUNTO DE VIAIS E ZONAS VERDES 21/5/25

O Concello de Ribadumia vén de activar un novo plan intensivo de limpeza de viais e zonas verdes municipais, co obxectivo de que o municipio amose a súa mellor cara tanto para a veciñanza como para os visitantes que se achegarán nas próximas semanas debido a diversa axenda de actividades deportivas e culturais que acollerá o noso municipio.

Para acadar este obxectivo, destinarase un investimento de preto de 20.000 euros que permitirá reforzar os traballos de mantemento e limpeza viaria. Entre as medidas adoptadas destaca o dobre turno de desbroce mecánico mediante tractores e a ampliación do equipo de desbroce manual, mediante a contratación de tres empresas especializadas que xa comezaron os seus labores no termo municipal.

Esta acción enmárcase nun plan de posta a punto do municipio de cara á chegada da época estival, coincidindo ademais coa celebración de eventos deportivos como a Fase Final da AF7, a Copa Ribadumia-Clae Viajes ou a VII Mini BTT Concello de Ribadumia, así como propostas culturais para todas as idades, que terán lugar en Ribadumia durante os vindeiros meses.

Dende o Concello reafírmase o compromiso co mantemento e coidado do espazo público e a calidade de vida da veciñanza, garantindo un entorno limpo, seguro e acolledor para todos e todas.

Arquivo/s adxunto/s

Arquivo adxunto-1

PROGRAMA +RETODIXITAL 12/5/25

O programa +Reto Dixital da Deputación de Pontevedra ofrece formación dixital para persoas maiores de 50 anos, empadroadas no Concello de Ribadumia, co obxectivo de brindarlle os recursos necesarios para facilitar o seu acceso aos servizos da Administración electrónica e mellorar as súas habilidades dixitais.

Os obradorios, os cales teñen un custo de 5 euros por persoa e curso, son os seguintes:

1️⃣ Administración electrónica

2️⃣ Banca Móbil

3️⃣ Sedes electrónicas

Máis información e inscricións ata o 15 de maio nas Oficinas Municipais.

Arquivo/s adxunto/s

Arquivo adxunto-1

ESCOLA DE VERÁN 2025 30/4/25

> O Concello de Ribadumia quere informar de que a partir do próximo luns día 05 de maio xa se poderán presentar as solicitudes para a Escola de Verán do Concello.

> Poderá descargarse o formulario de inscrición na web municipal ou nas propias oficinas do Concello.

Arquivo/s adxunto/s

NP - RIBADUMIA DESPIDE CON ÉXITO UNHA NOVA EDICIÓN DA FASE PREVIA DO AROUSA FÚTBOL 7 24/4/25

O Concello de Ribadumia valora, un ano máis, moi positivamente a Fase Previa do Arousa Fútbol 7, celebrada do 17 ao 20 de abril no Complexo Deportivo da Senra. Un evento que, unha vez máis, converteu ao noso municipio no centro do fútbol base durante a Semana Santa, cunha gran afluencia de público e un nivel deportivo á altura deste torneo.

Ao longo de catro intensas xornadas, preto de 1.200 xogadores e xogadoras, distribuídos en 80 equipos procedentes de Galicia, Asturias, Cantabria, Castela, Canarias e Portugal, deron mostra do seu talento, espírito deportivo e compañeirismo. Foron días de emoción, xogo limpo e convivencia, que reuniron arredor de 4.000 persoas no recinto e contribuíron, ademais, a dinamizar a economía local, con máis de 700 persoas aloxadas no municipio e na contorna.

O Concello felicita especialmente aos equipos clasificados para a fase final do torneo, que se celebrará os días 30 e 31 de maio e 1 de xuño: ED Val Miñor Nigrán, San Tirso SD "A", CD Calasanz "A" e ED Xuventude Oroso. Parabéns tamén ao resto de participantes, que fixeron desta Fase Previa unha auténtica festa do fútbol. Ademais, tamén queremos expresar os nosos parabéns ao CD Ribadumia, equipo local que conseguiu escalar na clasificación ata as semifinais onde finalmente foi derrotado. A pesar disto, os aurinegros demostraron ser un gran equipo no campo, competindo con deportividade e unión.

A celebración deste torneo supón tamén un importante impulso para o turismo deportivo no noso municipio, que cada vez máis se consolida como un destino atractivo para eventos deste calibre. O número de visitantes, a ocupación hoteleira e o movemento nos establecementos de hostalaría e restauración demostran o potencial deste tipo de iniciativas para xerar beneficios no tecido económico local, promovendo á vez o coñecemento do noso entorno natural, cultural e social.

O volume de afluencia e a demanda de servizos de aloxamento e restauración que recibiu a organización como interlocutora de boa parte dos visitantes ao Concello colmaron a capacidade dos establecementos non só do propio concello senón de boa parte da contorna. Foron moitas as dificultades de atender as demandas de última hora, todo á vez que o sintomático cartel de cheo en case todos os locais reflexaba un éxito rotundo na convocatoria do Arousa Fútbol 7.

Dende o Concello de Ribadumia queremos agradecer o labor da organización, dos clubs, das familias e de todas as persoas voluntarias que fixeron posible o desenvolvemento do torneo. A súa implicación é clave para que Ribadumia siga a ser un espazo de referencia para o deporte base e para a promoción dos valores que representa.

Vémonos de novo no terreo de xogo os días 30 e 31 de maio e 1 de xuño, para celebrar a Fase Final do Arousa Fútbol 7, onde participarán equipos nacionais e internacionais de primeiro nivel. Será, sen dúbida, outro momento para seguir gozando do mellor fútbol base nun ambiente único.

Arquivo/s adxunto/s

NP - O CONCELLO DE RIBADUMIA RESOLVEU PRETO DE 500 INCIDENCIAS NO QUE VAI DE ANO CUNHA RESPOSTA ÁXIL E EFICAZ 24/4/25

O Concello de Ribadumia informa que, no que vai de ano, xa se levan resoltas arredor de 500 incidencias no municipio, grazas a un sistema de atención á cidadanía eficaz e á coordinación dos servizos municipais. Estes datos amosan o compromiso do Concello coa mellora continua do espazo público e coa atención rápida ás necesidades veciñais no día a día.

As incidencias rexistradas abranguen un amplo abano de actuacións, entre as que se inclúen a reposición de sinais, reparación de beirarrúas, reparación de puntos de luz, labores de limpeza e mantementos en vías, solución de roturas en liñas de auga ou saneamentos, así como diversas xestións administrativas con outras administracións ou entidades, necesarias para dar resposta a determinados casos.

É destacable que unha elevada porcentaxe destas incidencias foron resoltas nas primeiras 24 horas despois da súa notificación, e unha parte importante delas tamén nas seguintes 48 horas. Só unha porcentaxe mínima superou ese tempo, sendo casos que requiren actuacións máis complexas ou que dependen da coordinación con organismos alleos ao propio Concello tales como o bacheado de firmes ou a colocación de espellos en puntos estratéxicos das vías.

O Concello lembra á cidadanía que segue dispoñible na plataforma municipal en liña o apartado de "Incidencias e Avarías", onde se poden comunicar de forma sinxela todas aquelas situacións que requiran unha intervención municipal. Así mesmo, tamén poden comunicalo de forma telefónica ou presencial directamente nas oficinas municipais.

Dende o goberno local continúase traballando na atención á veciñanza e no correcto mantemento diario das infraestruturas e servizos municipais, animando á cidadanía a seguir colaborando para que Ribadumia sexa un espazo cada vez máis coidado, accesible e funcional.

Arquivo/s adxunto/s

NP - RIBADUMIA ULTIMA OS PREPARATIVOS PARA ACOLLER A FASE PREVIA DO AROUSA FÚTBOL 7 16/4/25

O Concello de Ribadumia xa está a piques de vivir un dos eventos deportivos máis importantes da tempada: a Fase Previa do Arousa Fútbol 7. O torneo, que se celebrará do 17 ao 20 de abril no Complexo Deportivo da Senra, contará coa participación de 80 equipos e máis de 1.200 xogadores e xogadoras, nunha cita que promete un altísimo nivel competitivo e unha gran afluencia de público, como vén sendo habitual en edicións anteriores.

Nas últimas horas ultímanse os preparativos tanto por parte do equipo organizador como do Concello, co obxectivo de garantir unha experiencia deportiva e humana á altura do torneo. Xa están a chegar ao municipio equipos procedentes de Asturias, Segovia e Cantabria, que se aloxarán tanto en Ribadumia como nos concellos da contorna, contribuíndo á dinamización económica da comarca.

No plano deportivo, a Fase Previa comeza con moita expectación, coa participación de equipos con grande potencial para acceder á fase final, que se celebrará os días 30 e 31 de maio e 1 de xuño. Destacan, entre outros, o AFB Lanzarote, formado por xogadores de toda a illa; a ED Valmiñor de Nigrán, que aspira a repetir clasificación; o Bertamiráns FC, ED Xuventude Oroso ou o SD Villestro. Xunto a eles, tamén se estrean na competición equipos como a Academia Sporting Vizela ou o CD Quirinal de Asturias, que xa acadou a fase final noutras edicións.

Pero o AF7 non é só fútbol. A organización impulsa valores fundamentais como o respecto, a igualdade e a protección da infancia. Esta edición destaca a súa adhesión á campaña "No Discrimination" da FIFA, promovendo unha competición libre de actitudes discriminatorias e fomentando un clima de convivencia positiva entre participantes, familias e público.

Ademais, o torneo contará cun protocolo específico de protección á infancia, co que se busca garantir un espazo seguro para todos os nenos e nenas participantes. Entre as medidas que se aplicarán destacan os controis de acceso, a habilitación de zonas privadas de uso exclusivo para menores, a tolerancia cero ante calquera manifestación ofensiva e a presenza de puntos de control para o seguimento do estado emocional dos participantes.

O Concello de Ribadumia anima a toda a veciñanza e visitantes a achegarse ao Complexo Deportivo da Senra para gozar do mellor fútbol base e vivir unha experiencia única, nun ambiente deportivo, familiar e cheo de valores.

Arquivo/s adxunto/s

NP - RIBADUMIA ACOLLE A XV EDICIÓN DA FEIRA DA FAMILIA 11/5/25 16:30 - 11/5/25 20:30

O 11 de maio é o día elixido para celebrar a XV Edición da Feira da Familia no Concello de Ribadumia, un evento pensado especialmente para todas as familias do noso concello, que promete ser unha xornada chea de risas, xogos e moita diversión.

A Praza do Concello será o escenario onde se desenvolverán as actividades. Haberá inchables para que os máis pequenos se divirtan, xogos tradicionais familiares para compartir momentos especiais entre avós, pais, nais e fillos, e stands informativos para aprender un pouco máis sobre servizos e actividades na nosa comunidade. Tamén teremos a oportunidade de gozar da actuación de Patty Diphusa, que nos fará bailar e rir con súa música.

Non nos esquecemos das merendas! Durante toda a xornada, as familias poderán desfrutar de merenda e palomitas, creando un ambiente acolledor e festivo para todos. Para participar nesta xornada de convivencia, é necesario inscribirse antes do 8 de maio.

As familias que queiran apuntarse ou recibir máis información poden chamar ao 986718491, ou achegarse á oficina do Educador Familiar, en horario de 9:00 a 15:00h. O alcalde e todo o equipo de goberno convidan con moito agarimo a todas as familias do concello a que se acheguen a vivir esta fermosa xornada.

Data e lugar:

• Data: 11 de maio

• Lugar: Praza do Concello de Ribadumia

• Horario: 16:30h-20:30h

Esperámoste para vivir xuntos unha tarde moi especial! Para máis información, contacte co Departamento de Servizos Sociais de Ribadumia, teléfono 986718491.

Arquivo/s adxunto/s

NP - O CONCELLO DE RIBADUMIA CONDENA OS ACTOS VANDÁLICOS ACONTECIDOS NA CONTORNA DA ESCOLA INFANTIL MUNICIPAL 12/4/25

O Concello de Ribadumia quere manifestar a súa firme condena ante os actos vandálicos acontecidos durante a pasada fin de semana na contorna da Escola Infantil Municipal.

Uns feitos inxustificables que supuxeron a destrución de materiais empregados nas obras de mellora que se están a levar a cabo no centro, así como danos na maquinaria utilizada polos operarios e situada nas inmediacións do edificio.

As obras en execución teñen como obxectivo reducir o consumo enerxético da instalación, mellorar o confort termoacústico e eliminar os riscos de desprendementos ou filtracións, ao tempo que se renova o aspecto exterior do centro. Uns traballos destinados a garantir o benestar da cativada usuaria e a eficiencia das instalacións municipais.

Lamentablemente, os feitos desta fin de semana non son illados, xa que esta zona xa ten rexistrado accións similares de forma reiterada, o que incrementa a preocupación do Concello polo mantemento e a seguridade deste espazo público.

Neste sentido, o Concello de Ribadumia está en contacto coa Garda Civil e as autoridades competentes para avanzar nas medidas que permitan evitar este tipo de comportamentos incívicos. Ao mesmo tempo, dende o goberno municipal facemos un chamamento ao respecto polos bens públicos e á implicación da cidadanía para coidar entre todos os espazos comúns.

Preservar as instalacións municipais en bo estado é responsabilidade de todos e todas, e só a través do civismo e a conciencia social se poderá manter Ribadumia como un lugar coidado, seguro e agradable para vivir.

Arquivo/s adxunto/s

NP - A FASE PREVIA DO AROUSA FÚTBOL 7 CHEGARÁ A RIBADUMIA CUNHA PARTICIPACIÓN RÉCORD DE EQUIPOS 09/4/25

O Concello de Ribadumia acollerá entre os días 17 e 20 de abril unha nova edición da Fase Previa do Arousa Fútbol 7, un evento deportivo de referencia no fútbol base que este ano bate todos os récords de participación e que converterá ao municipio no epicentro do deporte rei durante a Semana Santa.

Un total de 80 equipos tomarán parte nesta competición, sumando máis de 1.200 xogadores e xogadoras e arredor de 160 adultos nos corpos técnicos. A dimensión do evento, que traspasa fronteiras, atrae a equipos de toda Galicia, Asturias, Cantabria, Canarias, Castela e tamén de Portugal, converténdose así nun encontro de carácter estatal e internacional.

A alta demanda rexistrada para participar nesta fase previa foi histórica segundo indican dende a organización do evento: 92 equipos solicitaron praza para competir, obrigando a pechar o proceso de inscrición 20 días antes do remate do prazo previsto, debido ao elevado interese. Así mesmo, detectouse un notable incremento da venda anticipada de entradas, que medrou un 40% respecto a edicións anteriores. De acompañar o bo tempo, espérase superar amplamente a asistencia prevista, consolidando unha vez máis a Ribadumia como destino de referencia para o deporte base.

A afluencia de público estimada sitúase en torno ás 4.000 persoas. Ademais, máis do 70% dos equipos desprázanse dende fóra da comarca do Salnés, polo que se prevé unha elevada ocupación hoteleira durante o evento. A través dos canles de reserva coordinados polo AF7, máis de 700 persoas pernoctarán no municipio e os seus arredores, cunha media de dúas noites por persoa dende o mércores á noite ata o luns de Semana Santa, contribuíndo así de forma directa á dinamización económica local.

O Concello convida a toda a veciñanza e visitantes a achegarse durante os días do torneo para vivir de preto o gran ambiente deportivo que se respirará en Ribadumia. Unha oportunidade perfecta para gozar do mellor fútbol base e compartir unha experiencia única nun espazo de convivencia, lecer e deporte para toda a familia.

Arquivo/s adxunto/s