ACTUALIDADE - ÚLTIMAS NOVAS

Relación de entradas

793 Entradas

NP - O CONCELLO DE RIBADUMIA CONVOCA O III CONCURSO DE CARROZAS DE REIS 09/12/25

Co Nadal cada vez máis cerca, o Concello de Ribadumia está preparando unha completa programación de actividades e eventos cos que celebrar coa veciñanza as datas festivas.

Por este motivo, convócase o III Concurso de carrozas de Reis, as cales acompañarán ás maxestades de Oriente na Cabalgata de Reis 2026, percorrendo as rúas con creacións orixinais e cheas de luz.

Ao concurso poderán presentarse todas as asociacións veciñais, culturais, clubs deportivos ou entidades de carácter social sen ánimo de lucro que o deseñen e teñan o seu domicilio social no Concello de Ribadumia e se atopen inscritos no Rexistro Municipal de Asociacións. Poderase participar unicamente cunha carroza individualmente ou en agrupación dun máximo de dúas asociacións.

A temática de cada carroza é libre pero deberá estar vinculada ao Nadal, sendo imprescindible que sexa realizada polos propios participantes e que a estética sexa diferente á do ano anterior, no caso de ter participado. Ademais, tan só se poderán presentar aquelas propostas nas que os seus integrantes vaian disfrazados. As carrozas deberán ter, como mínimo, 1 metro de altura, 3 metros de longo e 1,5 metros de ancho.

A inscrición deberá facerse obrigatoriamente nas oficinas do concello. O prazo de presentación de toda a documentación será ata o martes 23 de decembro e as solicitudes recolleranse de luns a venres en horario de 8:00 a 15:00 horas.

O xurado deste concurso estará composto por un membro representante da organización da Cabalgata de Reis, unha persoa vinculada ao departamento de eventos, cultura ou comunicación do Concello de Ribadumia e tres representantes de distintas asociacións con sede no Concello de Ribadumia, dándose prioridade a aquelas que colaboren na organización da Cabalgata e non se presenten a este concurso.

Cada unha das carrozas que realicen o pasacalles obterán unha gratificación de 300€ por participar. Ademais, estableceranse tres premios:

• Primeiro premio: 400€ + diploma acreditativo.

• Segundo premio: 300€ + diploma acreditativo.

• Terceiro premio: 200€ + diploma acreditativo.

As persoas interesadas poden consultar o resto da información relevante e as bases desta convocatoria na páxina web municipal, no taboleiro de anuncios ou a través das redes sociais oficiais do Concello.

Arquivo/s adxunto/s

NP - O CONCELLO DE RIBADUMIA CONVOCA A XXIII EDICIÓN DO CONCURSO DE POSTAIS DE NADAL 09/12/25

As celebracións do Nadal están á volta da esquina e, con elas, ponse en marcha a programación especial do Concello de Ribadumia, que este ano lanza a XXIII edición do Concurso de Postais de Nadal. As bases completas poden consultarse no taboleiro de anuncios, na plataforma municipal e nas redes sociais do Concello.

O certame está dirixido a nenos e nenas de entre 3 e 16 anos que estean empadroados en Ribadumia e estuden no CPI Julia Becerra Malvar ou no CRA de Ribadumia. Cada participante poderá presentar unha única postal, en formato cuartilla, e competirá na categoría correspondente ao seu nivel educativo (infantil, primaria ou ESO).

As postais deberán facer referencia ao Nadal e aos valores característicos destas datas, como a solidariedade, a unión familiar, a amizade, o reencontro ou a alegría. Ademais, os traballos deben ser completamente orixinais e non ter participado noutros concursos.

Para entregar as creacións habilitarase unha urna en cada centro escolar. Tamén haberá outra na casa consistorial, dispoñible ata o mércores 10 de decembro ás 13:00 horas.

Cando se anuncien os gañadores de cada categoría, todas as postais presentadas pasarán a ser propiedade do Concello. O obxectivo final do certame é elaborar a felicitación oficial de Nadal coas postais premiadas.

Coa chegada dunha das épocas máis esperadas pola cativada, o Concello de Ribadumia anima ás novas xeracións a participar nesta iniciativa, que non só as implica na vida do municipio, senón que tamén potencia a súa creatividade.

Arquivo/s adxunto/s

NP - O CONCELLO DE RIBADUMIA PREMIARÁ AS DECORACIÓNS DE NADAL MÁIS DESTACADAS EN VIVENDAS E ESCAPARATES 09/12/25

O Concello de Ribadumia abre un ano máis a convocatoria do VI Concurso de decoración de Nadal en ventás e exteriores de vivendas, así como do VI Concurso de decoración de Nadal en escaparates e interiores de establecementos. Este último lévase a cabo en colaboración coa asociación de comerciantes “Ribadumia Agárdate”.

A finalidade de ambos certames é incentivar a participación da veciñanza, promovendo que decoren os seus balcóns, ventás, exteriores ou locais comerciais para contribuír ao ambiente festivo do Nadal. Ademais, búscase apoiar o comercio de proximidade, pois os 890 euros en premios deberán investirse en negocios situados no propio municipio.

O xurado valorará diferentes aspectos como a creación artística, a presentación, creatividade, orixinalidade, as cores e iluminación e os elementos característicos da nosa cultura e tradicións, así como os adornos de Nadal feitos con material reciclado.

As inscricións poderán realizarse ata o luns 22 de decembro de 2025, de forma presencial nas oficinas municipais, por correo electrónico (cultura@ribadumia.org) ou chamando ao 986 718 491.

As persoas que participen na categoría de vivendas deberán manter visible a súa decoración entre o 8 de decembro de 2025 e o 7 de xaneiro de 2026.

Unha vez rematado o prazo de inscrición nos concursos, o xurado reunirase para examinar as candidaturas presentadas e decidir os galardoados da presente edición. No caso do concurso de vivendas, o xurado estrará composto por dous representantes do Concello de Ribadumia e un representante da Asociación de Comerciantes de Ribadumia. Por outra banda, para o concurso de escaparates e interiores de establecementos, o xurado estará formado por un representante do Concello de Ribadumia e dous representantes da Asociación de Comerciantes.

Os gañadores e gañadoras dos dous concursos daranse a coñecer o día da Cabalgata de Reis. Para coñecer máis información arredor de todas as condicións e dereitos dos concursos, pódense consultar as bases que se publicarán na web do Concello de Ribadumia e no taboleiro municipal.

Premios do Concurso de decoración de Nadal de ventás e exteriores de vivendas:

- 1º premio: 200€ en vales de 20€ para empregar no comercio local.

- 2º premio: 140€ en vales de 20€ para empregar no comercio local.

- 3º premio: 100€ en vales de 20€ para empregar no comercio local.

Premios do Concurso de decoración de Nadal de escaparates e interiores de establecementos:

- 1º premio: 200€ e un diploma de recoñecemento.

- 2º premio: 150€ e un diploma de recoñecemento.

- 3º premio: 100€ e un diploma de recoñecemento.

Dende o Concello animamos a todos os nosos veciños e veciñas a sumarse a esta iniciativa polo Nadal, decorando Ribadumia dunha forma orixinal coa que poidamos atraer a visitantes dos municipios da comarca e potenciar o comercio local de cara as compras destas sinaladas datas.

Arquivo/s adxunto/s

NP - XA ESTÁ EN MARCHA O CUARTO CICLO DE DESBROCE E LIMPEZA DOS RUEIROS DE RIBADUMIA 05/12/25

O Concello de Ribadumia xa comezou co cuarto ciclo de desbroce e limpeza dos rueiros municipais no que vai de ano, dentro do plan de mantemento continuo que se aplica de maneira cíclica en todo o territorio. En canto finaliza unha rolda de traballos, actívase de novo outra pasada, garantindo así que todas as parroquias conten con vías limpas, transitables e en bo estado durante os doce meses.

Estas tarefas céntranse na retirada de vexetación que invade camiños e beiravías, ademais da limpeza xeral que permite manter os accesos despexados para vehículos e peóns. O obxectivo é asegurar que os desprazamentos pola rede viaria municipal se realicen con maior comodidade e seguridade.

Manter os rueiros en condicións óptimas é esencial para a accesibilidade e o benestar da veciñanza, polo que o operativo de mantemento seguirá activo de maneira permanente. O Concello reafirma así o seu compromiso coa conservación do espazo público e coa creación dun entorno máis seguro, ordenado e cómodo para o uso diario da cidadanía.

Arquivo/s adxunto/s

NP - RIBADUMIA ARRANCA O PROXECTO INTEGRAL DE DOTACIÓN DUN EDIFICIO DE SERVIZOS PARA O CAMPO DE A BOUZA E A HUMANIZACIÓN DO ESPAZO PÚBLICO ANEXO 28/11/25

Xa deu comezo o proxecto integral de creación do novo edificio para servicios múltiples no entorno do campo de fútbol de A Bouza e do pavillón polideportivo, xunto coa humanización do espazo público anexo.

𝐎𝐑𝐙𝐀𝐌𝐄𝐍𝐓𝐎: O investimento total ascende a 1.086.523,72 euros, dos cales 700.000 euros proceden do Plan Provincia Extraordinaria – PLAN EXTRA da Deputación de Pontevedra. Os 386.523,72 euros restantes están financiados a través dun convenio con Turismo da Xunta de Galicia.

𝐀𝐂𝐓𝐔𝐀𝐂𝐈𝐎́𝐍𝐒:

Construción dun inmoble de dúas plantas situado entre o pavillón e as bancadas do campo de fútbol, que permitirá dotar estas instalacións de novos accesos, vestiarios, cafetería e zona de despachos.
Traballos de urbanización e humanización do espazo público existente entre o colexio e as instalacións deportivas, configurando un parque urbano.
Creación dunha rampla peonil para dar acceso á bancada do Campo de A Bouza.

Este proxecto engloba melloras para a comunidade educativa, a comunidade deportiva e a veciñanza en conxunto grazas á zona de ocio e esparcemento que se consegue coa humanización desta localización.

Co inicio destas obras, Ribadumia continúa avanzando cara a un municipio máis accesible, funcional e pensado para o uso da súa veciñanza.

Arquivo/s adxunto/s

NP - REMATAN AS OBRAS DE MELLORA DO CAMIÑO MUNICIPAL E DAS REDES DE PLUVIAIS E SANEAMENTO NO NÚCLEO DO FREIXO 21/11/25

Onte finalizaron os traballos de mellora do camiño municipal e as redes de pluviais e saneamento no núcleo do Freixo, unha intervención integral na que se estivo traballando nas últimas semanas e que estivo destinada a modernizar os servizos básicos e mellorar a accesibilidade nesta zona da parroquia de Ribadumia.

𝐎𝐑𝐙𝐀𝐌𝐄𝐍𝐓𝐎: O proxecto contou cun investimento total de 121.000 euros, tendo como obxectivo optimizar o servizo ás vivendas próximas, mellorar o estado do viario e adecuar as redes de abastecemento, pluviais e saneamento ás necesidades actuais.

𝐀𝐂𝐓𝐔𝐀𝐂𝐈𝐎́𝐍𝐒:

Novo sistema de drenaxe e recollida de augas pluviais.
Ampliación da rede de saneamento existente cara aos camiños transversais.
Melloras na rede de abastecemento municipal, incluíndo conexións ás vivendas que o precisaban.
Separación da rede de pluviais da de fecais.
Ancheamento do camiño, co conseguinte retranqueo e derrube duns muros e peches en mal estado.
Nova pavimentación e pintado das marcas viarias.

Coa execución deste proxecto, o Concello de Ribadumia responde ás necesidades trasladadas polos residentes da zona e continúa avanzando na mellora das infraestruturas rurais, garantindo servizos de calidade e un maior benestar para todas as familias que viven no núcleo do Freixo.

Arquivo/s adxunto/s

NP - RIBADUMIA XA TEN FINALISTAS E DATA DEFINITIVA PARA CELEBRAR A VIII FESTA DO DEPORTE 17/11/25

O xurado da VIII Festa do Deporte reuniuse este mércores 12 de novembro no Salón de Plenos do Concello para avaliar e valorar os méritos de todas as candidaturas presentadas, dende o mes de setembro do ano 2024 ata o mes de agosto do ano en curso, e escoller os galardoados e galardoadas da presente edición.

Para a formación do xurado, e segundo se establece nas bases, convocáronse aos seguintes membros: a concelleira de Deportes ou persoa na que delegue, que actúa como presidente do xurado; un técnico municipal, que exerce como secretario; un representante de cada un dos grupos políticos con representación municipal; gañadores do ‘Mérito Deportivo’ das anteriores edicións e representantes especializados en deportes dos medios de comunicación con maior difusión na comarca. Finalmente, á sesión de deliberación acudiron a concelleira de deportes sen voz nin voto por delegación da presidencia noutra concelleira, un técnico municipal, un representante do equipo de goberno, dous dos gañadores do ‘Mérito Deportivo’ e un representante dos medios de comunicación.

O Concello de Ribadumia tamén estableceu a data definitiva para levar a cabo a Gala da VIII Festa do Deporte, que terá lugar o vindeiro 29 de novembro ás 18:00 horas no Auditorio Municipal de Ribadumia. Durante a velada daranse a coñecer os galardoados/as desta edición, na que o Concello pretende recoñecer ós e ás deportistas e entidades que, co seu traballo e esforzo diarios, promoven os valores do deporte e levan o nome de Ribadumia alí por onde pasan.

A continuación, expoñemos a listaxe de todos os finalistas da presente edición, ordenada alfabeticamente:

Deportistas propostos

CLUB

Mellor deportista

RIBADUMIENSE

“PROMESA”

MASCULINO

1. Brais García Outeda

2. Aarón Fernández Martínez

3. Yago Serantes Aris

1. Umia CF

2. Desguaces Tino Racing

3. CD Ribadumia

Mellor deportista

RIBADUMIENSE

“PROMESA”

FEMININA

1. Candela Álvarez Varela

2. Ainoa Feijoo Cid

3. Sara Outeda Vidal

1. Club Piragüismo Verducido-Pontillón

2. Club Náutico O Muiño

3. Judo Club Galicia Sur

Mellor deportista

RIBADUMIENSE

MASCULINO

1. Daniel Gondar Villanueva

2. Celestino Iglesias Cores

3. Jorge Iglesias Cores

1. Xuventude de Sisán CF

2. Desguaces Tino Racing

3. Desguaces Tino Racing

Mellor deportista

RIBADUMIENSE

FEMININA

1. Lidia Bello Radio

2. María Martínez Chan

3. Alba Vázquez Lafuente

1. CD Ribadumia

2. Desguaces Tino Racing

3. Club Náutico O Muiño

Mellor deportista

MASCULINO non

RIBADUMIENSE

1. Manuel Fontán Señoráns

2. Carlos Maquieira Camiño

3. Adrián Sieiro Barreiro

1. Club Náutico O Muiño

2. Desguaces Tino Racing

3. Club Náutico O Muiño

Mellor deportista

FEMININA non

RIBADUMIENSE

1. Carla Fernández Torres

2. Silvia Gago García

3. Lara Remigio Besada

1. Club Ciclista Ribadumia

2. Club Náutico O Muiño

3. Club Náutico O Muiño

Mellor EQUIPO MASC.

1. Alevín F8 CD Ribadumia

2. Club Náutico O Muiño

3. Xuvenil CD Ribadumia

1. CD Ribadumia

2. Club Náutico O Muiño

3. CD Ribadumia

Mellor EQUIPO FEM.

1. C4 Feminino Campionato de España Sprint Olímpico Club Náutico O Muiño

1. Club Náutico O Muiño

Mellor CLUB

1. CD Ribadumia

2. Club Náutico O Muiño

3. Desguaces Tino Racing

1. CD Ribadumia

2. Club Náutico O Muiño

3. Desguaces Tino Racing

Mellor

ADESTRADOR

1. Fran Blanco

2. Francisco Javier García Parada

3. Jhon Ríos

1. CD Ribadumia

2. Club Náutico O Muiño

3. CD Ribadumia

Premio ó MÉRITO DEPORTIVO

1. Leonardo Martínez Martínez

2. Miguel Vázquez Bustelo

3. Nico Mindiola Abal

1. Proposto polo Concello de Ribadumia

2. CD Ribadumia

3. Proposto polo UMIA CF

Premio ó

PATROCINADOR

1. Celtamotor

2. Construcciones Agis

3. Galventus

4. O Loureiro de Siso

5. Viña da Codeseira

Premio á

COMUNICACIÓN

1. Arousa Si Radio

2. Diario de Arousa

3. Rallystreaming Fran Rodríguez

Premio ó arraigo RIBADUMIENSE

1. Alejandro Leiro Torres

2. Alejandro Pintos Barreiro

3. María Pérez Aragunde

1. Judo Club Pontevedra /Club de Loita Pontevedra

2. Xuventude de Sisán CF

3. Proposto polo Club Náutico O Muiño

Arquivo/s adxunto/s

Arquivo adxunto-1

NP - O PLENO MUNICIPAL APROBA POR UNANIMIDADE A CREACIÓN DA MESA LOCAL DE COORDINACIÓN FRONTE A VIOLENCIA DE XÉNERO 09/11/25

O Pleno Municipal de Ribadumia, reunido en sesión Ordinaria este xoves, aprobou por unanimidade a creación da Mesa Local de Coordinación fronte á Violencia de Xénero, un instrumento clave para reforzar a resposta institucional e social ante esta problemática.

A creación desta Mesa responde á iniciativa do equipo de goberno local, consciente de que a violencia de xénero continúa sendo un grave problema que atenta contra a seguridade, a liberdade e a dignidade das mulleres, e que require unha resposta pública coordinada e eficaz. Este paso chega tras a aprobación do I Plan Municipal de Igualdade de Ribadumia, no Pleno de marzo de 2025, onde o Concello xa adquiriu o compromiso de promover a creación de Mesas Locais de Coordinación como ferramenta esencial para o cumprimento das medidas recollidas no devandito plan.

A Mesa Local constitúe un espazo estable de cooperación entre administracións, servizos e entidades, co obxectivo de mellorar os mecanismos de atención e derivación dos casos, reforzar a prevención e garantir unha intervención integral e coordinada.

O Concello contou durante estes meses co apoio técnico da Dirección Xeral de Loita contra a Violencia de Xénero, dependente da Consellería de Política Social e Igualdade, a través dun acordo de colaboración coa FEGAMP. Como parte deste proceso para a súa posta en marcha, realizáronse dúas sesións formativas os días 24 de setembro e 1 de outubro, que reuniron a representantes institucionais e profesionais de distintos ámbitos.

A Mesa estará integrada polas distintas administracións e entidades que interveñen na atención, prevención e detección da violencia de xénero, como:

• Centro de Información ás Mulleres da Mancomunidade do Salnés (CIM), principal recurso especializado de referencia.

• Os Servizos Sociais municipais, que realizan un labor fundamental de acompañamento e seguimento.

• Os centros educativos, servizos sanitarios e forzas e corpos de seguridade, así como a Subdelegación do Goberno en Pontevedra, a través da Unidade contra a Violencia sobre a Muller.

A Mesa, de carácter técnico e operativo, estará presidida polo alcalde ou persoa en quen delegue, e contará coa participación da concelleira con competencias na materia, persoal técnico municipal e representantes das entidades implicadas. Ademais, poderanse crear grupos de traballo específicos para abordar cuestións concretas.

Con esta medida, Ribadumia dá un paso adiante na loita contra a violencia de xénero, fortalecendo a rede de atención existente, asegurando unha resposta máis eficaz e consolidando unha estrutura de prevención e sensibilización social estable no tempo.

Arquivo/s adxunto/s

Arquivo adxunto-1

NP - O MERCADO MUNICIPAL DE RIBADUMIA AFRONTA UNHA REMODELACIÓN INTEGRAL E MELLORA DA EFICIENCIA ENERXÉTICA 08/11/25

O Concello de Ribadumia está a executar as obras de remodelación integral do Mercado Municipal, unha actuación que permitirá modernizar as instalacións, mellorar a eficiencia enerxética e garantir unha maior accesibilidade neste espazo clave para o comercio local.

𝐎𝐑𝐙𝐀𝐌𝐄𝐍𝐓𝐎: O orzamento total da obra ascende a 159.997,97 euros, repartidos nas anualidades 2025 e 2026, dos cales o 80% son financiados pola Consellería de Emprego, Comercio e Emigración e o 20% restante asumido con fondos propios municipais.

𝐀𝐂𝐓𝐔𝐀𝐂𝐈𝐎́𝐍𝐒:

Renovación completa da infraestrutura, incluíndo a substitución da cuberta existente por unha nova estrutura de aceiro con illamento térmico.
Instalación dun sistema de illamento térmico exterior (SATE) que mellorará o confort interior e a estética do mercado.
Reforma integral da instalación eléctrica, coa substitución das antigas luminarias por pantallas LED
Dotación de accesibilidade plena mediante ramplas e aseos adaptados.
Renovación da rede de fontanería para abastecer os catro postos actuais do mercado.
Colocación dun novo falso teito rexistrable.
Aplicación de resina epoxi nos pavimentos interiores para mellorar a hixiene e facilitar o mantemento.
Renovación da pintura dos paramentos con pintura alimentaria e pasteado de azulexos.

A intervención está integrada nas subvencións da Xunta de Galicia destinadas ao impulso dunha rede de mercados excelentes e á dinamización e revitalización das prazas de abastos galegas.

Con esta actuación, o Concello de Ribadumia aposta por espazos máis sostibles, accesibles e de fácil uso, co obxectivo de revitalizar o comercio de proximidade e ofrecer un servizo de calidade á veciñanza. O Mercado Municipal converterase así nun punto de venda renovado e funcional, preparado para responder ás necesidades actuais dos profesionais e das persoas usuarias.

Arquivo/s adxunto/s

NP - COMEZAN AS LABORES DE PODA DE ÁRBORES E SETOS EN DIFERENTES TRAMOS DO CONCELLO 06/11/25

Xa deron comezo no Concello de Ribadumia os traballos anuais de poda de árbores e setos en diferentes rúas e zonas verdes do municipio.

𝐎𝐑𝐙𝐀𝐌𝐄𝐍𝐓𝐎: Esta actuación conta cun orzamento base de 16.301,12 euros, financiados a través de fondos propios.

𝐙𝐎𝐍𝐀𝐒 𝐃𝐄 𝐀𝐂𝐓𝐔𝐀𝐂𝐈𝐎́𝐍:

Escola Infantil Municipal, Pavillón de Sisán, Preescolar de Leiro (CRA), Campo da festa de Barrantes, Fonte de Besomaño, Casa de Cultura de Ribadumia, Preescolar de Lois e Ponte Arnelas.
Tramos viarios dende a rotonda dos Castaños ata o antigo bar O Cruceiro Vello, e dende Lois ata Paradela (Meis).
Entornos da Casa do Concello, as igrexas de Barrantes, Ribadumia, Besomaño, Lois e Leiro, así como o Centro Médico e o Tanatorio.
Árbores do Polígono Industrial de Cabanelas e setos da piscina municipal.

Nesta campaña, ademais da empresa contratada, participa activamente un equipo de traballadores municipais, que reforzan os labores de poda e limpeza en distintas áreas, o que permite ampliar a capacidade de actuación e mellorar a coordinación dos traballos en todo o territorio.

As tarefas céntranse no control e coidado das árbores e setos para evitar riscos como a caída de ramas ou o entorpecemento das vías públicas. As podas realízanse con maquinaria manual e mecánica, seguindo criterios respectuosos coa natureza. Unha vez finalizados os traballos, os restos vexetais serán reutilizados para a produción de biomasa, promovendo así unha xestión sostible dos recursos.

Con esta iniciativa, o Concello de Ribadumia reitera o seu compromiso co coidado da contorna e coa prevención de incidencias derivadas das condicións meteorolóxicas adversas propias do inverno, contribuíndo á conservación dun espazo público máis seguro, limpo e sostible para toda a veciñanza.

Arquivo/s adxunto/s

NP - AVANZAN AS OBRAS DE MELLORA DO CAMIÑO MUNICIPAL E REDES DE PLUVIAIS EN BARROSO, NA PARROQUIA DE SISÁN 28/10/25

O Concello de Ribadumia informa de que avanzan a bo ritmo as obras de mellora do camiño municipal e das redes de pluviais no núcleo de Barroso, na parroquia de Sisán, un proxecto promovido polo ente municipal e financiado pola Deputación de Pontevedra a través do Plan Máis Provincia 2025.

A actuación conta cun orzamento total de 124.481,25 euros (IVE incluído) e responde á necesidade de modernizar e mellorar as infraestruturas viarias deste núcleo, garantindo un mellor servizo e accesibilidade ás vivendas e parcelas agrarias da contorna.

O proxecto inclúe a mellora do sistema de drenaxe e recollida de augas pluviais mediante a execución de cunetas de formigón e embornais conectados a unha nova rede soterrada que se integrará na existente, logrando unha xestión máis eficiente das augas. Tamén se acometerán labores de desbroce, limpeza e retirada de escombros nas marxes dos camiños, a renovación de instalacións de alumeado público, baixa tensión e telecomunicacións, así como a construción dun muro de contención de cachotería rematado cun cerramento de granito. Ademais, ampliarase a plataforma viaria con novas capas de firme para mellorar a seguridade e durabilidade, e instalaranse pozos, arquetas, reixas e cunetas de formigón armado.

O Concello de Ribadumia continúa así coa súa liña de traballo orientada á mellora e conservación das infraestruturas rurais, executando obras que repercuten directamente no benestar e calidade de vida da veciñanza.

Arquivo/s adxunto/s

NP - O CONCELLO DE RIBADUMIA PON A PUNTO OS CEMITERIOS MUNICIPAIS DE CARA Á CELEBRACIÓN DO DÍA DE DEFUNTOS 28/10/25

O Concello de Ribadumia está levando a cabo diferentes tarefas de limpeza e mantemento nos cemiterios municipais, co obxectivo de que estes espazos se atopen en perfectas condicións para as visitas que se agardan coincidindo coa festividade de Todos os Santos e o Día de Defuntos.

Como cada ano por estas datas, os operarios municipais realizan labores integrais de posta a punto, tanto no interior coma nos accesos exteriores dos camposantos. Os traballos inclúen tarefas de desbroce, baldeo, limpeza de zonas axardinadas e comúns, revisión dos puntos de luz e acondicionamento xeral das instalacións, garantindo así o seu bo estado e a seguridade das persoas visitantes.

Con estas accións, o Concello busca ofrecer espazos coidados, dignos e accesibles, mantendo en óptimas condicións uns lugares de especial significado para a veciñanza nestes días.

Arquivo/s adxunto/s

NP - AS OBRAS DE MELLORA NOS PARQUES INFANTÍS DE RIBADUMIA XA ESTÁN EN MARCHA 24/10/25

Xa deron comezo as obras de reparación e mellora dos parques infantís municipais de Ribadumia, situados na Praza do Concello e na Carballeira de Barrantes, dúas zonas de xogo e encontro moi frecuentadas pola veciñanza e, especialmente, polos máis pequenos do municipio.

Esta actuación, cun orzamento total de 169.512,22 euros, está financiada integramente a través da Liña 1 do Plan +Provincia da Deputación de Pontevedra, e ten como finalidade modernizar, adaptar e garantir a seguridade dos espazos infantís, proporcionando áreas de xogo máis atractivas e seguras.

No parque infantil da Carballeira de Barrantes, retirouse o pavimento de caucho, os xogos existentes e a varanda perimetral. Nas próximas semanas, instalaranse novos equipos combinados de xogo, dous pórticos arrandeadoiros (un con asentos planos e outro con asentos de berce), un xogo xiratorio, un trampolín e varios xogos de resorte, ademais dunha nova varanda e cartel informativo.

Pola súa parte, no parque da Praza do Concello, as obras incluiron a retirada dos xogos biosaludables e do pavimento existente. Procederase á instalación dunha cuneta e sistema de drenaxe, e a colocación dun novo pavimento de seguridade con céspede artificial e paneis de polietileno. Incorporaranse tamén unha tirolina, un equipo combinado de xogos, balancíns, trampolíns, un resorte individual e unha mariola, entre outros elementos.

Con esta actuación, o Concello de Ribadumia reforza o seu compromiso co benestar da infancia e coa mellora dos espazos públicos, apostando por contornas accesibles, seguras e atractivas que fomenten o xogo e a convivencia familiar.

Arquivo/s adxunto/s

NP - O TURISMO EN RIBADUMIA PECHA A TEMPADA 2025 CUN 21% MAIS DE VISITANTES CA NO MESMO PERÍODO QUE 2024 23/10/25

O Concello de Ribadumia vén de facer balance da actividade turística correspondente ao mes de outubro e da tempada 2025, que rematou o pasado día 12 coa clausura do Punto de Información Turística municipal. Durante estes primeiros doce días de outubro contabilizáronse 695 visitantes, unha cifra que confirma o interese do municipio como destino activo máis aló da tempada estival.

Do total de visitantes, o 68% (472 persoas) procedían doutros países, mentres que o 32% (223 persoas) chegaron de diferentes puntos de España, incluíndo 79 galegos (11%). No perfil dos usuarios, o 86% foron peregrinos, o 13% turistas e o 1% excursionistas.

Entre os países de orixe, Portugal e Estados Unidos comparten a primeira posición (82 visitantes cada un), seguidos de China, México, Canadá, Australia e Reino Unido, que completan a lista dos principais países. No eido nacional, destacan Cataluña (51 visitantes), Madrid e Andalucía (24 cada unha) e Galicia (79 visitantes), reflectindo unha ampla diversidade de orixes entre as persoas que escollen Ribadumia como parada no seu percorrido.

Facendo un balance global, entre os meses de xuño e outubro, o Punto de Información Turística de Ribadumia rexistrou un total de 5.672 visitantes, o que supón un incremento aproximado do 20.7% respecto ao ano 2024, cando a cifra total fora de 4.699.

A tempada caracterizouse pola forte presenza internacional, especialmente de Estados Unidos, Portugal e Italia, ademais doutros como Alemaña, Francia, China e Polonia. O turismo nacional tamén tivo unha importante representación, con Andalucía, Madrid e Castela-A Mancha á cabeza.

No conxunto do ano, o perfil de peregrino consolidouse como o máis habitual —representando preto do 85% das visitas totais—, en gran parte vinculado á Variante Espiritual do Camiño Portugués - Ruta do Padre Sarmiento, un dos principais reclamos do municipio xunto coa Ruta da Pedra e da Auga, o Monte do Castro ou os muíños de Barrantes e do Batán.

Desde o goberno local valórase moi positivamente o balance desta tempada turística, que demostra a capacidade de Ribadumia para atraer visitantes nacionais e internacionais máis aló do verán. O concello destaca que o traballo de promoción, a mellora dos espazos naturais e patrimoniais e a organización de eventos culturais, deportivos e gastronómicos contribúen á desestacionalización do turismo e á dinamización económica local.

Con estas cifras, Ribadumia pecha a tempada 2025 cun crecemento sostido, reafirmándose como un destino con recursos turísticos de primeiro nivel, preparado para seguir medrando no futuro.

Arquivo/s adxunto/s

Arquivo adxunto-1

O CONCELLO DE RIBADUMIA ABRE O PRAZO DE PRESENTACIÓN DE CANDIDATURAS PARA A VIII FESTA DO DEPORTE 20/10/25 - 11/11/25

O Concello de Ribadumia informa de que xa está aberto o prazo de presentación de candidaturas para a “VIII Festa do Deporte”.

Todo aquel que o desexe poderá presentar as súas propostas dende o 20 de outubro ata o 10 de novembro.

Para facelo, os/as interesados/as deberán descargar os formularios na plataforma do Concello ou solicitalos nas propias oficinas da Casa Consistorial.

Para coñecer todos os detalles sobre estes galardóns, os interesados poden consultar as bases da “Festa do Deporte”.

Arquivo/s adxunto/s

Arquivo adxunto-1

NP - O TURISMO EN RIBADUMIA MANTÉN A SÚA DINÁMICA DE CRECEMENTO NO MES DE SETEMBRO 15/10/25

Ribadumia continúa consolidándose como un destino de referencia dentro da comarca do Salnés, tamén fóra da tempada alta. Segundo os datos recollidos pola Oficina de Turismo municipal durante o mes de setembro, rexistráronse 1.540 visitantes, o que supón un incremento do 24,4% respecto ao mesmo período de 2024.

O turismo internacional segue a ser o principal motor de visitantes, representando o 71% do total, con 1.101 persoas procedentes de países estranxeiros, mentres que o 29% restante corresponde a visitantes nacionais (439 persoas), e 50 galegos.

O perfil maioritario continúa a ser o de peregrino, que suma 1.376 persoas (89%), seguido de turistas (9%) e excursionistas (2%). Estes datos confirman a relevancia da Variante Espiritual do Camiño de Santiago, que atrae cada ano a un número crecente de camiñantes e visitantes interesados en coñecer o patrimonio natural e cultural de Ribadumia.

Desde o goberno local valoran moi positivamente estes resultados, que reafirman o traballo desenvolvido nos últimos anos para desestacionalizar o turismo e poñer en valor os múltiples recursos do municipio: dende os muíños do Batán, a senda fluvial do Umia, a Ruta da Pedra e da Auga e o Monte do Castro, ata os eventos culturais, deportivos e gastronómicos que dinamizan o territorio durante todo o ano.

Ribadumia segue así a consolidarse como un destino onde a natureza e o patrimonio convértense nos mellores reclamos para quen nos visita.

Arquivo/s adxunto/s

Arquivo adxunto-1

NP - O CONCELLO DE RIBADUMIA IMPULSA A LIMPEZA E MANTEMENTO DAS FONTES E LAVADOIROS MUNICIPAIS 15/10/25

O Concello de Ribadumia está a desenvolver unha nova campaña de limpeza e mantemento das fontes e lavadoiros tradicionais do municipio, co obxectivo de preservar en boas condicións estes bens patrimoniais que forman parte da identidade histórica e cultural da localidade.

Para levar a cabo estes traballos, o Concello habilitou unha cuadrilla de persoal municipal encargada da limpeza, conservación e posta a punto destes espazos, actuando de maneira coordinada en todas as parroquias do termo municipal, dende Sisán ata Lois.

En total, está previsto intervir en preto de 40 elementos patrimoniais, tanto fontes como lavadoiros, algúns deles de gran valor histórico e etnográfico. A actuación permitirá mellorar a accesibilidade e o uso cotián por parte da veciñanza, así como favorecer que as persoas visitantes poidan coñecer de primeira man o patrimonio de Ribadumia.

Dende o goberno local destacan a importancia de manter este tipo de bens en condicións óptimas polo seu valor funcional, cultural e histórico, reforzando o compromiso coa conservación e a posta en valor do patrimonio común.

Arquivo/s adxunto/s

NP - O CONCELLO DE RIBADUMIA APOSTA POLO CORRECTO MANTEMENTO DOS ESPAZOS PÚBLICOS COA COLABORACIÓN DA ASOCIACIÓN BATA 08/10/25

O Concello de Ribadumia conta coa colaboración de BATA Servicios Integrales a la Comunidad C.E.E. para o desenvolvemento de labores de xardinería e coidado do medio ambiente en distintos puntos do municipio. O equipo de traballo, composto por tres ou catro operarios segundo a xornada, incluíndo un responsable de equipo, realiza tarefas fundamentais para garantir o bo estado das zonas verdes e dos espazos públicos.

As súas funcións abranguen a limpeza de matorrais e maleza mediante roza manual ou mecánica, o corte de céspede con cortacéspede, o perfilado de perímetros con rozadoira de fío, o recorte de sebes, así como a poda de árbores. Ademais, encárganse do tratamento sostible dos restos orgánicos derivados destes traballos, velando polo respecto medioambiental.

As intervencións concéntranse nas rotondas dos Castaños, do cemiterio de Sisán, de Santa Marta, do Polígono, da piscina municipal, de Leiro, de Lois e a situada no lugar da Lomba. O labor é practicamente semanal durante o verán, coincidindo co maior crecemento vexetal, e complétase con actuacións periódicas ao longo do resto do ano en función das necesidades da vexetación.

Con esta colaboración, o Concello de Ribadumia reitera a súa aposta polo mantemento sostible e responsable das zonas verdes municipais, favorecendo a integración laboral das persoas con TEA e/o discapacidade intelectual e garantindo á veciñanza e visitantes espazos públicos coidados.

Arquivo/s adxunto/s

NP - RIBADUMIA REMATA A FORMACIÓN PARA A POSTA EN MARCHA DA MESA LOCAL DE COORDINACIÓN CONTRA A VIOLENCIA DE XÉNERO 03/10/25

O pasado mércores tivo lugar no Salón de Plenos do Concello de Ribadumia a segunda sesión formativa do Programa para a constitución das Mesas Locais de Coordinación institucional fronte á violencia de xénero (MLC), completando así o ciclo de formación que permite dar un paso decisivo cara á creación deste novo recurso no municipio.

O Concello foi seleccionado pola Consellería de Política Social e Igualdade, a través da Dirección Xeral de Loita contra a Violencia de Xénero, dentro do acordo de colaboración coa Federación Galega de Municipios e Provincias, para integrar a rede galega de entidades locais comprometidas na loita contra a violencia de xénero.

Á formación asistiron o alcalde e membros da corporación municipal, persoal técnico do concello, representantes do Centro de Saúde de Ribadumia, do ámbito deportivo, das ANPAs dos centros escolares, así como a xefa da Unidade de Violencia de Xénero contra a Muller da Subdelegación do Goberno en Pontevedra, entre outros axentes clave.

As sesións tiveron carácter teórico e práctico, abordando cuestións como os obxectivos da mesa, os procedementos oficiais para a súa constitución e os pasos necesarios para a coordinación entre os diferentes axentes implicados. Ademais, favoreceron a creación dunha rede de contactos e intercambio de información, imprescindible para garantir unha resposta integral e eficaz ante situacións de violencia de xénero.

Co remate desta formación, Ribadumia sitúase máis preto da constitución oficial da súa Mesa Local de Coordinación, un espazo de traballo conxunto que reforzará a prevención, detección, atención e seguimento dos casos, poñendo no centro a protección das mulleres e das súas familias.

Arquivo/s adxunto/s

NP - AVANZAN AS OBRAS DE MELLORA NO CAMIÑO MUNICIPAL E NAS REDES DE PLUVIAIS E SANEAMENTO NO FREIXO 19/9/25

O Concello de Ribadumia informa de que xa están en marcha as obras de mellora do camiño municipal e das redes de pluviais e saneamento no núcleo de Freixo, na parroquia de Ribadumia, unha actuación incluída no convenio de colaboración subscrito co organismo público SOGAMA, que financia na súa totalidade este proxecto cun investimento total de 121.000 euros.

O obxectivo principal desta intervención é ofrecer un mellor servizo ás vivendas da contorna, garantindo unha accesibilidade axeitada e unhas infraestruturas máis seguras e modernas. Para iso, as obras céntranse na mellora do sistema de drenaxe e recollida de augas pluviais do camiño, dotándoo dunha rede eficiente, e na ampliación da rede de saneamento existente cara aos camiños transversais.

Ademais, realizaranse pequenas intervencións na rede de abastecemento de auga e procederase á ampliación dun tramo do camiño, derrubando muros e peches en mal estado de conservación, co obxectivo de mellorar a súa funcionalidade e a seguridade viaria.

Con esta actuación, o Concello de Ribadumia continúa coa súa aposta pola modernización das infraestruturas municipais, garantindo condicións de maior confort e seguridade para a veciñanza do núcleo de Freixo.

Arquivo/s adxunto/s