ACTUALIDADE - ÚLTIMAS NOVAS

Relación de entradas

720 Entradas

RIBADUMIA CONTA CON TRES PUNTOS LIMPOS DE PROXIMIDADE NO TERMO MUNICIPAL 20/12/24

O Concello de Ribadumia vén de adquirir unha dotación de tres puntos limpos de proximidade, que se colocaron en diferentes localizacións do termo municipal, e nos que a veciñanza ribadumiense pode depositar de forma sinxela ata sete tipos de residuos domésticos de pequeno tamaño, facilitando así a súa catalogación e posterior reciclaxe.

O orzamento desta acción ascende a un total de 11.978,75 euros, subvencionado parcialmente cunha axuda da Xunta de Galicia con importe de 8.900,10 euros, cofinanciada polo Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU.

Os puntos limpos de proximidade foron instalados na praza do Concello, diante do Mercado Municipal e nas proximidades do Centro de Saúde.

O tipo de materiais que se poden botar nestas instalacións urbanas accesibles e de fácil identificación pola cidadanía son: cartuchos de tinta, residuos de aparatos eléctricos e electrónicos, baterías e pilas usadas, lámpadas (fluorescentes, baixo consumo e leds), material escolar e cápsulas de café. Ademais, o interior de cada un dos sete departamentos está organizado en celdas individuais de xeito que cada tipo de residuo se garde en compartimentos separados no seu interior.

Con esta medida, dende o Consistorio búscase promover a concienciación social e unha reciclaxe efectiva, establecendo unha medida que facilita á veciñanza a entrega de eses restos que ata o de agora carecían de recollida específica na entidade local.

Arquivo/s adxunto/s

Arquivo adxunto-1

NP - O VANDALISMO ATACA AS INSTALACIÓNS DO CPI JULIA MALVAR E NA ESCOLA INFANTIL MUNICIPAL DEIXANDO DIVERSOS DESTROZOS 12/12/24

O CPI Julia Becerra Malvar, de Ribadumia, foi obxecto de varios actos de vandalismo, acontecidos durante a fin de semana.

Entre os danos rexistrados atópanse a pintada de grafitis nas portas, columnas e nos muros exteriores tanto do centro de educación primaria e infantil, como no recinto da Escola Infantil Municipal. Ademais, os docentes tamén notificaron ao Concello de Ribadumia a rotura de fiestras e a queima de cartóns no recinto escolar.

As autoridades competentes da Xefatura da Garda Civil de Cambados xa foron notificadas sobre este incidente, e neste momento estase traballando para esclarecer os detalles e levar a cabo as accións necesarias.

O Concello quere expresar a súa máis firme condena a estes actos vandálicos, que van contra os valores de respecto, convivencia e coidado do espazo público que deben caracterizar o noso municipio. Recordamos que as instalacións escolares como as do CPI Julia Becerra Malvar e a Escola Infantil Municipal son un lugar fundamental para a educación e o desenvolvemento dos nenos e nenas, e é responsabilidade de todos preservalas e protexelas.

Por este motivo, facemos un chamamento á conciencia cidadá para evitar que se repitan actos coma este no futuro. O vandalismo non só implica un custo económico para os veciños e veciñas, senón que tamén provoca un dano moral e social difícil de medir.

Dende o Concello de Ribadumia reiteramos o noso compromiso coa protección dos espazos públicos e seguiremos traballando para garantir a seguridade e o benestar de toda a cidadanía. Así mesmo, animamos a calquera persoa que poida aportar información relevante a poñerse en contacto coas autoridades locais.

Arquivo/s adxunto/s

NP - APERTURA DO PRAZO DE INSCRICIÓN PARA O DESFILE DA CABALGATA DE REIS EN RIBADUMIA 03/12/24

O Concello de Ribadumia ten o pracer de anunciar que xa está aberto o prazo de inscrición para que os nenos e nenas de entre 4 e 13 anos de idade empadroados no municipio poidan participar no Desfile da Cabalgata de Reis. Esta é unha oportunidade única para que os máis cativos gocen destas datas tan esperadas.

As inscricións estarán abertas dende o día 3 ata o 22 de decembro. É importante destacar que, para garantir a participación, terán preferencia os nenos e nenas empadroados en Ribadumia. No caso de que non se completen todas as prazas, estas serán cubertas por nenos e nenas non empadroados por riguroso orde de entrada das solicitudes de participación.

Os interesados/as en participar deberán completar o formulario de inscrición que se pode recoller na Casa do Concello ou descargalo dende a plataforma municipal.

Animamos a todas as familias a inscribir aos seus fillos e fillas para que poidan vivir esta experiencia máxica. Para máis información, poden contactar co departamento de Cultura do Concello a través do teléfono 986 71 84 91 ou no correo electrónico cultura@ribadumia.org.

Arquivo/s adxunto/s

NP - RIBADUMIA ILUMINA O SEU NADAL CO TRADICIONAL ACENDIDO DE LUCES 03/12/24

O Concello de Ribadumia dará comezo ao seu Nadal este xoves, 5 de decembro, co acendido do alumeado. Esta cita terá lugar ás 19:30 horas na Praza do Concello cando os representantes do Goberno local e da asociación de comerciantes Ribadumia Agárdate inauguren, en colaboración, o Nadal ribadumiense.

Será unha xornada en que toda a familia e a veciñanza goce dunha tarde chea de música e entretemento, rosca, castañas e chocolate quente gratuíto para todas as persoas que se acheguen ata o lugar do acendido. Ás 19:30 horas estrearase o alumeado e farase un brinde en que se desexará un bo Nadal e unhas felices festas.

O Concello de Ribadumia convida a toda a veciñanza do municipio e arredores a asistir ao tradicional acendido do alumeado e compartir unha tarde chea de ledicia e espírito de Nadal. O Goberno local espera dar comezo a estas celebracións con este evento para todos os ribadumienses na compañía de amigos, familiares e veciños.

Arquivo/s adxunto/s

NP - RIBADUMIA PREMIA ÁS MELLORES DECORACIÓNS DE NADAL DE VIVENDAS E ESCAPARATES 28/11/24

Tras o éxito das anteriores edicións, o Concello de Ribadumia convoca un ano máis o V Concurso de decoración de Nadal en ventás e exteriores de vivendas e o V Concurso de decoración de Nadal de escaparates e interiores de establecementos, este último promovido en colaboración coa asociación de comerciantes do municipio “Ribadumia Agárdate”.

O obxectivo destes dous certames non é outro que promover a creatividade dos veciños e veciñas de Ribadumia, animándoos a decorar os seus balcóns, ventás, exteriores ou establecementos, nunha data tan sinalada como é o Nadal. Así mesmo, tamén se busca impulsar a promoción do comercio local de Ribadumia, repartindo 890 euros en premios para gastar nos establecementos con sede no municipio.

O xurado valorará diferentes aspectos como a creación artística, a presentación, creatividade, orixinalidade, as cores e iluminación e os elementos característicos da nosa cultura e tradicións, así como os adornos de Nadal feitos con material reciclado.

As persoas que desexen participar teñen de prazo para inscribirse ata o venres 20 de decembro de 2024 de forma presencial no Concello de Ribadumia, a través do correo electrónico cultura@ribadumia.org ou no teléfono 986718491.

Os veciños e veciñas de Ribadumia que queiran participar coa decoración dos seus fogares deberán ter exposta a súa decoración, cando menos, entre o 8 de decembro de 2024 e o 7 de xaneiro de 2025.

Unha vez rematado o prazo de inscrición nos concursos, o xurado reunirase para examinar as candidaturas presentadas e decidir os galardoados da presente edición. No caso do concurso de vivendas, o xurado estrará composto por dous representantes do Concello de Ribadumia e un representante da Asociación de Comerciantes de Ribadumia. Por outra banda, para o concurso de escaparates e interiores de establecementos, o xurado estará formado por un representante do Concello de Ribadumia e dous representantes da Asociación de Comerciantes.

Os gañadores e gañadoras dos dous concursos daranse a coñecer o día da Cabalgata de Reis, ademais de ser comunicados persoalmente e a través das redes sociais municipais. Para coñecer máis información arredor de todas as condicións e dereitos dos concursos, pódense consultar as bases que se publicarán na web do Concello de Ribadumia e no taboleiro municipal.

Premios do Concurso de decoración de Nadal de ventás e exteriores de vivendas:

- 1º premio: 200€ en vales de 20€ para empregar no comercio local.

- 2º premio: 140€ en vales de 20€ para empregar no comercio local.

- 3º premio: 100€ en vales de 20€ para empregar no comercio local.

Premios do Concurso de decoración de Nadal de escaparates e interiores de establecementos:

- 1º premio: 200€ e un diploma de recoñecemento.

- 2º premio: 150€ e un diploma de recoñecemento.

- 3º premio: 100€ e un diploma de recoñecemento.

Dende o Concello animamos a todos os nosos veciños e veciñas a sumarse a esta iniciativa polo Nadal, decorando Ribadumia dunha forma orixinal coa que poidamos atraer a visitantes dos municipios da comarca e potenciar o comercio local de cara as compras destas sinaladas datas.

Arquivo/s adxunto/s

NP - O CONCELLO DE RIBADUMIA CONVOCA O II CONCURSO DE CARROZAS DE REIS 27/11/24

Co Nadal cada vez máis cerca, o Concello de Ribadumia está preparando unha completa programación de actividades e eventos cos que celebrar coa veciñanza as datas festivas.

Por este motivo, convócase o II Concurso de carrozas de Reis, as cales acompañarán ás maxestades de Oriente na Cabalgata de Reis 2025, percorrendo as rúas con creacións orixinais e cheas de luz.

Ao concurso poderán presentarse todas as asociacións veciñais, culturais, clubs deportivos ou entidades de carácter social sen ánimo de lucro que o deseñen e teñan o seu domicilio social no Concello de Ribadumia e se atopen inscritos no Rexistro Municipal de Asociacións. Poderase participar unicamente cunha carroza individualmente ou en agrupación dun máximo de dúas asociacións.

A temática de cada carroza é libre pero deberá estar vinculada ao Nadal, sendo imprescindible que sexa realizada polos propios participantes e que a estética sexa diferente á do ano anterior, no caso de ter participado. Ademais, tan só se poderán presentar aquelas propostas nas que os seus integrantes vaian disfrazados. As carrozas deberán ter, como mínimo, 1 metro de altura, 3 metros de longo e 1,5 metros de ancho.

A inscrición deberá facerse obrigatoriamente nas oficinas do concello. O prazo de presentación de toda a documentación será ata o venres 13 de decembro e as solicitudes recolleranse de luns a venres en horario de 8:00 a 15:00 horas.

O xurado deste concurso estará composto por un membro representante da organización da Cabalgata de Reis, unha persoa vinculada ao departamento de eventos, cultura ou comunicación do Concello de Ribadumia e tres representantes de distintas asociacións con sede no Concello de Ribadumia, dándose prioridade a aquelas que colaboren na organización da Cabalgata e non se presenten a este concurso.

Cada unha das carrozas que realicen o pasacalles obterán unha gratificación de 300€ por participar. Ademais, estableceranse tres premios:

• Primeiro premio: 400€ + diploma acreditativo.

• Segundo premio: 300€ + diploma acreditativo.

• Terceiro premio: 200€ + diploma acreditativo.

As persoas interesadas poden consultar o resto da información relevante e as bases desta convocatoria na páxina web municipal, no taboleiro de anuncios ou a través das redes sociais oficiais do Concello.

Dende o Concello anímase a todas as asociacións e entidades municipais a ser participes das celebracións de Nadal, e especialmente deste II Concurso de Carrozas de Reis, enchendo de ledicia as rúas de Ribadumia.

Arquivo/s adxunto/s

NP - O CONCELLO DE RIBADUMIA CONMEMORA O 25N COA LECTURA DO MANIFESTO E UN PUNTO VIOLETA 26/11/24

O Concello de Ribadumia conmemorou o Día Internacional para a Eliminación da Violencia contra as Mulleres realizando a lectura do Manifesto institucional no Auditorio, ata onde se achegaron veciños e veciñas do municipio, representantes políticos e representantes do tecido asociativo e deportivo do concello, sumándose á loita pola igualdade.

O acto deu comezo ás 12:00 horas da man do pianista Juan Carlos Cambas que tocou unha emotiva peza instrumental, acompañado dunha interpretación de danza por parte de dúas ximnastas do club de ximnasia rítmica Grand Jeté.

Rematada a peza, o alcalde de Ribadumia, David Castro, tomou a palabra para avogar por unha sociedade igualitaria e libre de violencias, destacando o papel fundamental que deben desempeñar as institucións como axentes de apoio, dando visibilidade e información de especial relevancia para acadar este fin.

Tras isto, deu comezo a lectura conxunta do Manifesto, que foi realizada polo alcalde, ao que lle seguiu a concelleira de Igualdade e Servicios Sociais, Alba Martínez. Finalmente, rematou a proclama a coordinadora do CIM da Mancomunidade do Salnés, Ana Balsa, quen tamén aproveitou a súa intervención para lembrar ás persoas presentes que todas as mulleres vítimas de violencia de xénero teñen a súa disposición o CIM do Salnés, no que poden recibir axuda psicolóxica e xurídica, así como información de especial importancia.

Finalmente, o acto conmemorativo pechouse cunha nova interpretación musical por parte de Juan Carlos Cambas, esta vez acompañado pola solista Rosa Leiro.

Paralelamente á celebración no Auditorio, na praza do Concello instalouse dende primeira hora da mañá un Punto Violeta no que se proporcionou a todas as persoas que se achegaron ata alí información relativa á campaña de sensibilización da Deputación de Pontevedra para este 25N baixo os lemas “Compracer nunca, con pracer sempre” e “Non a líes, alíate”.

Ademais, este punto informativo tamén se desprazou ata o CPI Julia Becerra Malvar, onde se lle repartiron aos alumnos e alumnas de Educación Secundaria Obrigatoria unhas pulseiras e un pequeno folleto informativo.

Arquivo/s adxunto/s

NP - O CONCELLO DE RIBADUMIA REALIZA OBRAS DE AMPLIACIÓN E MELLORA NO CAMIÑO DE ACCESO A OUTEIRO E PUXAFEITA 19/11/24

O Concello de Ribadumia deu comezo ás obras necesarias para a ampliación e mellora do camiño de titularidade municipal que transcorre dende a estrada provincial EP-9305 Coirón - Ribadumia - Leiro cara os núcleos de Outeiro e Puxafeita, ambos na parroquia de Ribadumia.

Este proxecto pertence ao Plan Marco de Mellora de Camiños Municipais de Acceso a Parcelas Agrícolas 2024/205 e conta cun orzamento base de 62.139, 30 euros, destinado a conseguir unha correcta accesibilidade ás diversas explotacións e fincas agrícolas, así como proporcionar mellores prestacións ás vivendas dos núcleos próximos.

O tramo citado presentaba anteriormente unha serie de dificultades para o tránsito rodado como unha lomba no camiño que limitaba a correcta visión, así como unha anchura insuficiente da plataforma do viario, o que impedía o cruzamento de dous vehículos en dirección contraria.

O plan de actuación a seguir polo Concello contempla a ampliación da plataforma do camiño, rematando adecuadamente as marxes do mesmo mediante a execución de muros de contención de terras e muros de perpiaños; así como a pavimentación con firme de aglomerado asfáltico en idénticas condicións que o xa existente e a recollida das augas pluviais superficiais sobre o camiño, dirixíndoas cara a rede existente na estrada provincial.

Arquivo/s adxunto/s

NP - A CASA CONSISTORIAL DE RIBADUMIA CONTA CUNHA NOVA INSTALACIÓN FOTOVOLTAICA PARA AUTOCONSUMO 18/11/24

O Concello de Ribadumia dá un paso máis no seu compromiso co uso das enerxías renovables, incorporando unha instalación paneis solares fotovoltaicos para o autoconsumo na casa do Concello, contando cun orzamento de 11.410,30 euros para a realizacións dos traballos correspondentes.

O Instituto Enerxético de Galicia (INEGA) concedeu ao ente municipal unha subvención de 7.680,40 euros para este fin, financiándose no marco do Plan de Recuperación, Transformación e Resiliencia Europeo, ao amparo do instrumento temporal Next Generation EU.

A instalación consta de 16 paneis monocristalinos cunha potencia unitaria de 455 Wp, facendo un total de 7,28 kW de potencia total. O inversor ten unha potencia de 7,00 kW. Así, a potencia nominal da instalación será de 7,00 kW, por ser a potencia máis baixa, considerando a potencia do campo fotovoltaico e do inversor.

O campo fotovoltaico instalarase na cuberta da Casa do Concello, en superposición co tellado da mesma. Ademais, instalaranse correctamente o cabreado e proteccións necesarias, e realizarase a documentación técnica necesaria para a súa legalización.

Dende o consistorio adóptase esta medida co obxectivo de mellorar a eficiencia enerxética do edificio, apostando polas fontes de enerxía limpas, como é a solar, esperando acadar ademais unha notable redución dos custos eléctricos para as arcas municipais, podendo investir os fondos empregados con anterioridade noutros fins, de cara a mellorar a calidade de vida da veciñanza de Ribadumia.

Arquivo/s adxunto/s

O CONCELLO DE RIBADUMIA CONVOCA A XXII EDICIÓN DO CONCURSO DE POSTAIS DE NADAL 15/11/24 - 25/11/24 14:00

As datas festivas do Nadal vanse achegando e, con elas, o comezo da programación especial do Concello de Ribadumia, que este ano convoca o XXII Concurso de Postais de Nadal. As persoas interesadas poden consultar as bases do certame no taboleiro de anuncios, na plataforma municipal e nas redes sociais.

O concurso está aberto a todos os nenos e nenas de entre 3 e 16 anos, empadroados no Concello de Ribadumia, escolarizados no CPI Julia Becerra Malvar ou no CRA de Ribadumia. Cada alumno ou alumna poderá presentar un único traballo en tamaño cuartilla e participará na categoría que lle corresponda segundo o seu curso escolar (infantil, primaria ou ESO).

A temática das postais terá que facer alusión ao Nadal e á exaltación dos valores típicos destas datas como, por exemplo, a solidariedade, a familia, a amizade, a reunión ou ledicia. Ademais, terán que ser orixinais e non estar presentadas a outros concursos.

Para presentar estas creacións haberá, en cada centro escolar, unha urna para depositalas. No Concello de Ribadumia tamén haberá unha urna para facer a súa entrega, que estará dispoñible ata o luns 25 de novembro ás 14:00 horas.

Unha vez se coñezan os gañadores de cada unha das categorías, os traballos presentados pasarán a ser propiedade do Concello, e o fin último do concurso é a elaboración da felicitación de Nadal coas postais gañadoras.

Tendo en conta que estamos preto dunha das datas favoritas da pequena veciñanza, o Concello de Ribadumia anima ás novas xeracións a participar neste tipo de actividades que, ademais de facelas partícipes do que ocorre en Ribadumia, fomentan a estimulación da creatividade.

Arquivo/s adxunto/s

NP - O MERCADO DE RIBADUMIA EN CAMIÑO DE CONSEGUIR O SELO DE EXCELENCIA 14/11/24

O Concello de Ribadumia, consciente da importancia que os mercados teñen na vida local, ven de recibir unha subvención da Consellería de Emprego, Comercio e Emigración grazas a cal iniciar un proceso de diagnose da situación actual e os usos de dita instalación municipal. O orzamento previsto para a acción é de 9.680,00 euros, dos cales o ente autonómico faise cargo do 80% do total.

O plan do Concello de cara a conseguir o recoñecemento do selo de excelencia é emprender accións de mellora que fagan que este espazo sexa un lugar competitivo e atractivo, que responda ás necesidades dos comerciantes que desenvolven alí a súa actividade diaria, así como para os potenciais consumidores, co fin de que se consolide un comercio de proximidade moderno e innovador.

Arquivo/s adxunto/s

NP - REMATAN AS OBRAS DE EXECUCIÓN DO PECHE LATERAL DA AULA DO C.R.A. DE RIBADUMIA 14/11/24

Tras analizar o estado do peche da escola infantil C.R.A. de Ribadumia, localizada na parroquia de Ribadumia, dende o Concello ordenouse a execución dun novo muro lateral, cuxo proxecto ascende a un orzamento total de 10.875,01 euros.

O proxecto executouse co obxecto de acadar unha correcta solución de cerramento do espazo escolar e garantir a seguridade dos usuarios e usuarias das instalacións municipais. Ademais, a renovación do muro permite acadar unha imaxe uniforme do peche frontal do recinto.

O novo peche ten unha lonxitude de 29,60 metros, conformado por unha fileira granítico abuxardada en ambas caras, cunha altura de 0,50 metros en tonalidade similar á pedra existente. Así mesmo, completouse a instalación cunha malla metálica simple de torsión, plastificada en cor verde, alcanzando unha altura final de 1,50 metros. A base do peche, nivelándoa co patio interior do recinto do C.R.A, realizouse con bloques de mampostería granítica.

Esta actuación é unha mostra máis do compromiso do equipo de Goberno local, asegurando espazos seguros que permitan un correcto desenvolvemento académico e persoal do alumnado.

Arquivo/s adxunto/s

NP O Concello de Ribadumia presenta a súa programación polo 25N 12/11/24

O Salón de Plenos da Casa Consistorial acolleu esta mañá a presentación da programación do Concello de Ribadumia en conmemoración do 25N, o Día Internacional da Eliminación da Violencia Contra a Muller.

As actividades darán comezo o vindeiro 15 de novembro no Auditorio municipal co obradoiro “Comunícate con confianza e seguridade”, organizado en colaboración co Centro de Información á Muller do Salnés. O 20 de novembro terá lugar a inauguración da exposición “Á violencia de xénero dille non”, que permanecerá aberta ao público ata o 4 de decembro; e o 21 de novembro as persoas interesadas poderán participar no segundo obradoiro do CIM, “O poder das redes sociais”.

De cara á fin de semana, o domingo 24 de novembro contaremos cunha dobre cita, pola mañá, a andaina #NonEstásSoa, que partirá da praza do Concello ás 10:30 horas, percorrendo a beira do río Umia ata Cabanelas e volta ao punto de partida. Pola tarde, ás 19:00 horas o Auditorio acollerá a obra de teatro “Elas” de Vero Rilo.

O 25N procederase á lectura do manifesto institucional no Auditorio, acompañado dunha actuación interpretación musical.

Outra das citas destacadas do programa celebrarase o 26 de novembro na Casa do Concello, onde se presentará o I Plan de Igualdade, no que se recollen as liñas a seguir e as medidas a adoptar en favor dunha sociedade igualitaria, libre de violencia cara a muller.

O mércores 27 de novembro, chega a quenda da xornada de formación do Plan Corresponsables da Federación pola Igualdade das Mulleres da Provincia de Pontevedra.

Pero iso non é todo, a programación municipal continúa o 29 de novembro, co último dos obradoiros organizado polo CIM do Salnés, “Enfrontando a violencia de xénero, construíndo respostas e reaccións dende o rural”, que se celebrará no anfiteatro do Auditorio.

Finalmente, o broche final a esta completa listaxe de actividades, porano o obradoiro de danza contemporánea impartido por Xiana Vilas o 30 de novembro, que ten como obxectivo promover a igualdade a través da danza, fomentando a autoestima e a sororidade.

Arquivo/s adxunto/s

NP Traballos de poda de árbores en diversas zonas do concello 07/11/24

Como cada ano, comezaron os traballos de poda de árbores e setos en diversas rúas e zonas verdes do municipio.

O obxectivo principal dos traballos é o correcto coidado das árbores e setos localizados nos espazos municipais, garantindo un crecemento controlado e minimizando riscos futuros como a caída de ramas ou o entorpecemento nas vías de paso. Para isto, os operarios encargados empregan tanto maquinaria manual como mecánica, realizando unha poda respectuosa coas árbores. Unha vez rematadas as tarefas, aos restos da poda daráselles unha segunda vida, empregándoos para facer biomasa.

Arquivo/s adxunto/s

NP O Concello de Ribadumia executa obras de mellora nas instalacións térmicas dos ximnasios de Barrantes, Cabanelas e a piscina municipal 06/11/24

O Concello de Ribadumia executou dúas actuacións de mellora da eficiencia enerxética nos vestiarios dos ximnasios de Barrantes e Cabanelas, xunto cos da piscina municipal. O investimento total do proxecto cofinanciado a través do Fondo de Cooperación Local (FCL) é de 67.114,89 euros.

No caso do ximnasio de Cabanelas e a piscina municipal centráronse na instalación dunha bomba de calor de aire-auga reversible de 15Kw de potencia e un depósito acumulador de ACS cunha capacidade de 1.000 litros, en substitución dos cinco dispositivos acumuladores eléctricos que se localizaban nos vestiarios e aseos das infraestruturas.

Por outra banda, no ximnasio de Barrantes, instaláronse dúas bombas de calor aire-auga reversibles, no lugar da caldeira de gasóleo que con anterioridade servía á calefacción e ao subministro de auga quente sanitaria do espazo deportivo.

Arquivo/s adxunto/s

Arquivo adxunto-1

NP O CONCELLO DE RIBADUMIA CELEBRA A PRIMEIRA MESA DE TRABALLO PARA A ELABORACIÓN DO I PLAN DE IGUALDADE 05/11/24

O Concello de Ribadumia celebrou esta mañá a primeira mesa de traballo para a elaboración do I Plan de Igualdade do municipio.

A posta en marcha do Plan de Igualdade, considerado unha medida fundamental de cara a establecer as políticas públicas, as actuacións de promoción da igualdade e as estratexias de prevención da violencia de xénero a desenvolver, garantindo o dereito universal á igualdade de oportunidades, constará de cinco fases: unha primeira de diagnose e análise, continuando pola elaboración do plan de acción, a definición das áreas, a redacción minuciosa do Plan e, finalmente, a súa aprobación en Pleno Municipal.

Arquivo/s adxunto/s

Arquivo adxunto-1

O CONCELLO DE RIBADUMIA PON A PUNTO OS CEMITERIOS PARA O DÍA DE DEFUNTOS 31/10/24

O concello de Ribadumia, como cada ano, levou a cabo tarefas adicadas a posta a punto dos cemiterios municipais e que así poidan estar en perfectas condicións para as visitas que se agardan cara á fin de semana coincidindo coas festividades do Día de Defuntos e o Día de todos os Santos.

Arquivo/s adxunto/s

Arquivo adxunto-1

NP OS TABOLEIROS INFORMATIVOS DO CONCELLO DE RIBADUMIA XA ESTÁN RENOVADOS 24/10/24

O Concello de Ribadumia xa rematou os traballos de suministro e colocaión de "TABOLEIROS INFORMATIVOS PARA VARIOS PUNTOS DO CONCELLO DE RIBADUMIA” cofinanciado co programa Plan Máis Provincia 2024 da Deputación de Pontevedra.

Os taboleiros informativos renovados levan unha alfombra protectora duradeira de caucho reciclado cun granulado que protexe todo tipo de membranas de impermeabilización, illamentos e membranas contra danos mecánicos, como poden ser os causados por pedras afiadas.

Renováronse 8 taboleiros informativos, repartidos xeograficamente polas parroquias do concello, cuxa ubicación se tivo en conta atendendo ás demandas veciñais. Este proxecto ven a completar o traballo xa realizado en anos anteriores coa renovación doutra gran parte de taboleiros, que tamén foron renovados.

Arquivo/s adxunto/s

Arquivo adxunto-1

O CONCELLO DE RIBADUMIA EXECUTA O PROXECTO DE MELLORA DO EDIFICIO DA CASA CONSISTORIAL E DO EDIFICIO DE SERVIZOS SOCIAIS 21/10/24

O concello de Ribadumia vén de adxudicar un contrato que ten por obxecto a “Mellora do edificio da casa consistorial e do edificio de servizos sociais”.

A actuación na casa consistorial consiste na ampliación de instalacións eléctricas co obxecto de mellorar a eficiencia enerxética das instalacións térmicas do edificio acometeránse reformas eléctricas que afectan non soamente ás liñas e proteccións destinadas ás novas liñas de alimentación de máquinas de climatización recentemente instaladas, senón que se realizará tamén unha adaptación das instalacións xerais do edificio. Por outra banda tamén consistirá na ordenación de instalcións no exterior do edificio. Co obxecto de ordenar o conxunto de instalacións existentes na fachada oeste do edificio será preciso executar unha actuación consistente no saneado da mesma, de cara a facilitar as labores futuras de mantemento e xestión das instalacións térmicas.

A actuación no edificio de servizos sociais consiste na instalación de climatización e reparacións para mellora de condicións ambientais no interior do edificio. Con obxecto de mellorar a calidade e confort térmico interior, ademais de promover a mellora da eficiencia enerxética do edificio, executarase a instalación dun sistema de climatización con unidades interiores individuais nos despachos e espazos necesarios.

Arquivo/s adxunto/s

Arquivo adxunto-1

O CONCELLO DE RIBADUMIA BENEFICIARIO DUNHA SUBVENCIÓN PARA A MELLORA DE EFICIENCIA ENERXÉTICA DA ESCOLA INFANTIL MUNICIPAL 21/10/24

O concello de Ribadumia vén de recibir unha subvención que ten por obxecto a “Mellora de eficiencia enerxética da escola infantil municipal de Ribadumia”.

O obxecto do proxecto consiste na rehabilitación enerxética do edificio da Escola Infantil Municipal de Ribadumia:

- Aislamiento térmico das fachadas con SATE

- Renovación total do sistema de climatización coa instalación dunha bomba de calor reversible aire-auga e fancoils en todas as dependencias do edificio.

- Mellora da eficiencia na iluminación de todas as dependencias substituíndo as luminarias actuais por outras con lámpadas LED

Con estas obras proporciónanse ao edificio as seguintes melloras:

• Redución do consumo de enerxía.

• Aumento do confort termoacústico nas distintas dependencias e desde o exterior.

• Elimínase o risco de desprendementos en fachada, filtracións e renovar o seu deteriorado aspecto.

Arquivo/s adxunto/s

Arquivo adxunto-1