ACTUALIDADE - ÚLTIMAS NOVAS

Relación de entradas

833 Entradas

Ribadumia entrega 100 composteiros de balde para impulsar a compostaxe doméstica 05/10/26

O Concello de Ribadumia pon en marcha unha nova campaña para fomentar a compostaxe doméstica coa entrega de 100 composteiros de balde entre a veciñanza que cumpra os requisitos establecidos.

A iniciativa está dirixida a persoas que residan en vivendas unifamiliares con parcela ou horta de polo menos 25 m², onde se poida instalar o composteiro.

Como solicitar o composteiro

As persoas interesadas poden realizar a solicitude a través de dúas vías:

Online, mediante o formulario de solicitude dispoñible en https://app.compostalocal.com/application/form
Por teléfono, chamando ao Concello de Ribadumia no 986 718 491.

As solicitudes serán atendidas ata completar as 100 unidades dispoñibles.

Características e instalación

Os composteiros teñen unha capacidade de 400 litros e están deseñados para a súa instalación no exterior das vivendas.

Para favorecer o seu correcto funcionamento, recoméndase situalos nunha zona sombreada e protexida das inclemencias meteorolóxicas, preferiblemente baixo unha árbore de folla caduca, e sempre en contacto directo coa terra para facilitar a entrada dos microorganismos encargados da descomposición da materia orgánica.

A compostaxe doméstica permite transformar os residuos orgánicos en compost para o seu aproveitamento, evitando que estes residuos tengan que ser trasladados para a súa xestión. A campaña recupera así unha práctica tradicional do rural galego e facilita a súa realización mediante un sistema máis cómodo e eficiente.

A actuación está cofinanciada pola Unión Europea no marco do programa Galicia FEDER 2021-2027.

Arquivo/s adxunto/s

Arquivo adxunto-1

NOVA BRIGADA FORESTAL DO CONCELLO DE RIBADUMIA 17/9/26

Xa está en marcha a nova brigada forestal do Concello de Ribadumia, composta por un capataz e catro peóns forestais contratados por un período de tres meses. A súa incorporación enmárcase no convenio de colaboración entre a Consellería de Medio Rural e o Concello para a execución de accións de prevención e defensa contra os incendios forestais nos anos 2025-2026.

O investimento da actuación ascende a un total de 92.712 euros para as dúas anualidades, dos cales 50.712 euros correspóndense con labores en materia de prevención de incendios forestais, sendo este un importe cofinanciado nun 80% pola Unión Europea a través de fondos Feader no marco do Plan Estratéxico da Política Agraria Común (PEPAC9 2023-2027. Os 42.000 euros restantes, financiados íntegramente con fondo autonómicos, estarán destinados a actuacións en materia de vixilancia e defensa contra incendios forestais.

Ao igual que na anualidade anterior, durante o seu período de actividade, a brigada realizará tarefas de defensa e extinción no Distrito Forestal O Salnés-Caldas, así como actuacións preventivas mediante traballos de roza manual en parcelas da rede de faixas secundarias de xestión de biomasa forestal, seguindo unha planificación técnica detallada.

Tamén se realizarán traballos de roza mecanizada de matogueiras con apeiros rozadores de cadeas nas diferentes parroquias.

Con esta iniciativa, Ribadumia continúa dando pasos adiante na loita contra os incendios forestais, reforzando tanto a capacidade de resposta inmediata como o labor de prevención, clave para garantir a seguridade da veciñanza e a preservación do patrimonio natural do noso municipio e da comarca.

Oferta de actividades municipais 11/9/26

Lembra: o luns 14 de setembro ás 08:00 horas abre o prazo de inscrición na oferta de ACTIVIDADES MUNICIPAIS.

As solicitudes poden rexistrarse de dous xeitos:

- De forma presencial nas oficinas municipais

- Por sede electrónica, a través do procedemento "Inscrición en actividades e cursos" (código SIA 3215654) a través do enlace https://ribadumia.sedelectronica.gal/catalog/t/1086e3fa-b560-4deb-9c55-66bed39d82f4

Lembra que, en todo caso, se deben usar os FORMULARIOS DE INSCRICIÓN habilitados (para adultos, nenos/as ou para o club senior), débese acompañar copia do DNI do solicitante e entregar no caso de actividades de pago, o modelo SEPA e copia da certificación bancaria de titularidade.

En documento adxunto, están dispoñibles os formularios para a sua descarga.

Arquivo/s adxunto/s

AULA DE ACOLLIDA-PLAN MADRUGA I ESCOLA DE OCIO E TEMPO LIBRE 26/27 07/9/26

Atópanse dispoñibles os listados provisionais de admitidos na Escola de ocio e tempo libre e na Aula de acollida-Plan madruga, que darán comezo o próximo día 9 de setembro. Pódense consultar nas oficinas da Casa do Concello ou chamando ao 986 718491/99.

OFERTA ACTIVIDADES MUNICIPAIS E DOUTRAS ENTIDADES 2026/27 04/9/26

Difúndese a través desta plataforma municipal a oferta completa de actividades no Concello de Ribadumia: informática, fútbol, piragüismo, pilates, manualidades, zumba, tenis, cestería e moitas máis!

Lembra: o luns 14 de setembro ás 08:00 horas abre o prazo de inscrición.

As solicitudes realizaranse de forma presencial ou por sede electrónica a través dos formularios dispoñibles nesta plataforma ou no Concello, entregando tamén a documentación necesaria.

Arquivo/s adxunto/s

Arquivo adxunto-1

AULA DE ACOLLIDA (PLAN MADRUGA) I ESCOLA EDUCATIVA PARA O OCIO E O TEMPO LIBRE 14/8/26

O prazo abrirá o próximo luns e as inscricións poderán facerse nas oficinas municipais dende o 17 ata o 31 de agosto (ambos inclusive).

Requisitos escola educativa para o ocio: Nenas e nenos de 3 a 14 anos (ambos incluídos) empadroados no Concello de Ribadumia, coa condición de que traballen ambos proxenitores e estea empadroado, como mínimo, un deles (xunto co menor) no Concello de Ribadumia. Así mesmo é imprescindible presentar a documentación que xustifique que ambos proxenitores estean traballando.

Requisitos aula acollida plan madruga: Nenas e nenos de 3 a 14 anos (ambos incluídos), matriculados no CPI Julia Becerra Malvar ou no CRA de Ribadumia. E imprescindible presentar acreditación de que ambos proxenitores estean traballando.

Documentación: DNI do pai e da nai, DNI do fillo/a (no caso de non ter DNI o libro de familia), xustificante da ocupación laboral actual dos pais, número de conta bancaria para a domiciliación do pago e tarxeta sanitaria do neno/a.

APRENDÉNDONOS: un programa para acompañar ás mulleres na recuperación dos seus proxectos vitais 09/7/26

O Concello de Ribadumia pon en marcha APRENDÉNDONOS, un programa dirixido a mulleres en situación de vulnerabilidade que ten como obxectivo acompañalas na recuperación dos seus proxectos vitais, fortalecendo a súa autonomía persoal, social e laboral desde unha perspectiva de xénero.

Ao longo dos meses de xullo, agosto e setembro, as participantes poderán acceder a sesións individuais e grupais nas que se traballarán aspectos relacionados co desenvolvemento persoal, a autoestima, a xestión emocional, a orientación sociolaboral e formativa, así como a promoción da igualdade e a prevención das violencias machistas.

O programa tamén incluirá actividades de lecer e autocoidado, creando espazos seguros de encontro, apoio mutuo e crecemento persoal, favorecendo a creación de redes entre mulleres e o fortalecemento das súas capacidades para afrontar novos retos persoais e profesionais.

APRENDÉNDONOS está destinado a mulleres que estean a atravesar situacións de especial vulnerabilidade e que desexen contar cun acompañamento integral para avanzar cara a unha maior autonomía e benestar. As mulleres interesadas poden solicitar máis información e realizar a súa inscrición a través dos Servizos Sociais do Concello.

Esta actuación está financiada pola Consellería de Política Social e Igualdade da Xunta de Galicia e cofinanciada pola Unión Europea a través do Fondo Social Europeo Plus (FSE+).

Arquivo/s adxunto/s

Arquivo adxunto-1

AXUDAS ECONÓMICAS A ENTIDADES QUE ORGANICEN CAMPUS DE VERÁN 12/6/26

O Concello de Ribadumia informa da aprobación das bases que regulan os criterios para a concesión de axudas económicas a Campus de Verán organizados por entidades culturais ou deportivas inscritas no rexistro de asociacións do Concello de Ribadumia. Segundo as mesmas, ábrese o prazo de presentación de solicitudes durante todo o mes de xullo.

Arquivo/s adxunto/s

Arquivo adxunto-1

CONCESIÓN DE AXUDA DA DEPUTACIÓN DE PONTEVEDRA PARA GASTO CORRENTE EN ACTIVIDADES E PRESTACIÓN DE SERVIZOS - PLAN + PROVINCIA 2026 09/6/26

Co obxecto de cooperar no financiamento das actividades e servizos que desenvolve o Concello de Ribadumia ao longo do 2026, a Deputación de Pontevedra ven de conceder unha axuda económica de 38.182,62€ ao abeiro da liña 2 do Plan + Provincia 2026 para o cofinanciamento dos seguintes eventos:

-LIII Festa do Viño tinto do Salnés

Con esta axuda recibida, o Concello dá continuidade a eventos que se veñen realizando dende edicións anteriores. Eventos de suma transcendencia e repercusión en Ribadumia e en toda a comarca.

BANDO FOGUEIRAS DE SAN XOÁN E SAN PEDRO 19/5/26

Xa está aberto o prazo para solicitar as comunicacións das fogueiras de San Xoán e San Pedro. As solicitudes son presenciais no horario habitual de oficina do Concello (luns a venres de 8:00 a 15:00 horas).

Fogueiras de San Xoán: ata o 16 de xuño

Fogueiras de San Pedro: ata o 23 de xuño

Arquivo/s adxunto/s

Arquivo adxunto-1

ESCOLA DE VERÁN 2026 11/5/26

> O Concello de Ribadumia quere informar de que a partir do próximo mércores día 13 de maio xa se poderán presentar as solicitudes para a Escola de Verán.

Arquivo/s adxunto/s

NP - RIBADUMIA MELLORA A ACCESIBILIDADE DA BEIRARRÚA NO CASCO URBANO CON MOTIVO DAS OBRAS NA EP-9302 15/4/26

O Concello de Ribadumia está a executar labores de acondicionamento na marxe da estrada EP-9302, coincidindo coas obras de pavimentación que está a levar a cabo a Deputación de Pontevedra nun tramo desta vía.

A intervención municipal consiste na creación dunha nova beirarrúa, co obxectivo de mellorar a accesibilidade e a seguridade das persoas usuarias, especialmente dos peóns e das persoas con mobilidade reducida.

Con esta actuación, o Concello busca garantir un tránsito máis cómodo e seguro nunha vía moi utilizada. Deste xeito, a colaboración entre administracións permite optimizar recursos e mellorar as infraestruturas viarias do municipio, contribuíndo a facer de Ribadumia un lugar máis accesible, seguro e adaptado ás necesidades da veciñanza.

Arquivo/s adxunto/s

NP - RIBADUMIA DESPIDE UNHA NOVA EDICIÓN DA FASE PREVIA DO AROUSA FÚTBOL 7 09/4/26

O Concello de Ribadumia fai unha valoración moi positiva da Fase Previa da 29ª edición do Arousa Fútbol 7, celebrada do 2 ao 5 de abril no Complexo Deportivo de A Senra, convertendo o municipio no epicentro do fútbol base durante catro intensas xornadas.

O evento reuniu a máis de 1.000 xogadores e xogadoras distribuídos en 65 equipos procedentes de Galicia, Asturias, Cantabria, Castela e Portugal, xunto a preto de 130 persoas nos seus corpos técnicos. Durante 40 horas de competición disputáronse 168 partidos, nos que se puido ver un alto nivel deportivo, así como unha destacada actitude de respecto, compañeirismo e deportividade.

A afluencia de público foi constante ao longo de toda a competición, xerando un gran ambiente no Complexo Deportivo de A Senra e contribuíndo, un ano máis, a consolidar o torneo como unha das grandes referencias do fútbol base a nivel autonómico e estatal, consolidando o turismo deportivo que atrae Ribadumia. O evento supuxo tamén un importante impacto para a economía local e da comarca, con elevada ocupación nos servizos de aloxamento e un notable movemento na hostalaría e no comercio do municipio e da contorna.

Dende o Concello queren felicitar especialmente aos equipos clasificados para a fase final: o ED Val Miñor Nigrán, o Ourense CF “A”, o C.D. Pabellón Promesas e o C.D. Quirinal "A" que acadaron o pase tras unhas xornadas de gran nivel competitivo. Parabéns tamén ao resto dos equipos participantes, que fixeron desta Fase Previa unha auténtica festa do deporte base cun alto nivel de xogo.

Dende o Concello de Ribadumia queremos agradecer o labor da organización do AF7, dos clubs participantes, das familias e de todas as persoas voluntarias implicadas, cuxa colaboración resulta fundamental para o correcto desenvolvemento dun evento destas características. O seu compromiso fai posible que Ribadumia siga a ser un referente na organización de eventos deportivos e na promoción dos valores do deporte base.

Vémonos de novo no Complexo Deportivo de A Senra os días 22, 23 e 24 de maio, para a celebración da Fase Final do Arousa Fútbol 7 2026, na que participarán equipos nacionais e internacionais de primeiro nivel.

Arquivo/s adxunto/s

Arquivo adxunto-1

NP - ÉXITO DA FOODTRUCK “O SABOR DAS RÍAS BAIXAS” EN RIBADUMIA REPARTINDO PRETO DE 2.000 PETISCOS 09/4/26

Ribadumia converteuse durante o pasado mércores, xoves e venres nun punto de encontro para os amantes da gastronomía coa presenza da foodtruck da campaña “O Sabor das Rías Baixas”, impulsada por Turismo Rías Baixas da Deputación de Pontevedra.

Ao longo destas tres xornadas repartíronse preto de 2.000 petiscos, nunha iniciativa que contou cunha excelente acollida por parte da veciñanza e das persoas visitantes que se achegaron tanto á Praza do Concello como ao Campo de Fútbol de A Senra, na que estivo situada as dúas últimas xornadas.

As persoas asistentes puideron degustar unha variada selección de elaboracións inspiradas nas festas de Interese Turístico das Rías Baixas, como mexillón en escabeche sobre mariñeira, croquetas de cocido e polbo, crujiente de xamón con tartar de tomate, ruliño de lacón con grelos ou empanada de atún, todas elas elaboradas con produtos de gran calidade.

Esta acción permitiu non só promocionar a riqueza culinaria da provincia, senón tamén dinamizar o municipio nun período de gran afluencia como a Semana Santa.

Desde o Concello destacan a importancia de participar en iniciativas deste tipo, que reforzan a proxección turística de Ribadumia e consolidan o seu papel como destino atractivo dentro da comarca do Salnés.

Arquivo/s adxunto/s

Arquivo adxunto-1

NP - O PUNTO DE INFORMACIÓN TURÍSTICA DE RIBADUMIA RECIBÍU A VISITA DE 400 USUARIOS DURANTE A SEMANA SANTA 07/4/26

O Concello de Ribadumia fai balance das visitas rexistradas durante a pasada Semana Santa no Punto de Información Turística municipal, un período no que se volveu constatar o importante atractivo do municipio como destino turístico, tanto a nivel nacional como internacional.

Durante estes días, o punto de información atendeu a un total de 400 persoas interesadas en coñecer os principais recursos turísticos da localidade, así como en obter información sobre o noso patrimonio, gastronomía e actividades dispoñibles no municipio e na contorna.

Entre os aspectos máis demandados polos visitantes destacan enclaves como a Ruta da Pedra e da Auga ou a Variante Espiritual – Ruta do Padre Sarmiento do Camiño, que seguen a posicionar Ribadumia como un destino atractivo para peregrinos e amantes da natureza.

A procedencia das persoas atendidas reflicte tamén a diversidade do perfil turístico, con visitantes chegados de distintos puntos de Galicia (10% dos usuarios), do territorio nacional (35%) e tamén do estranxeiro (55%), consolidando a proxección internacional do municipio.

Ademais entre as nacionalidades que escollen Ribadumia destacan os visitantes de Portugal, Alemaña, Estados Unidos, Italia e Reino Unido, así como procedentes do territorio nacional destacan aqueles chegados de diferentes puntos de Cataluña, Andalucía, Madrid ou Comunidade Valenciana.

O perfil maioritario que visitou o punto de información turística foron peregrinos (83%) seguidos dos excursionistas (10%) e os turistas (8%).

O goberno local valora moi positivamente estes datos, que confirman a tendencia á alza do turismo en Ribadumia e reforzan a necesidade de seguir apostando pola promoción turística, o coidado dos espazos naturais e a mellora continua dos servizos ofrecidos á cidadanía e ás persoas visitantes.

Arquivo/s adxunto/s

Arquivo adxunto-1

NP - RIBADUMIA ARRANCA UN NOVO CICLO DE LABORES DE LIMPEZA E CONSERVACIÓN DE FONTES E LAVADOIROS 01/4/26

O Concello de Ribadumia volve poñer en marcha unha nova fase de traballos centrados na limpeza e mantemento das fontes e lavadoiros repartidos polo conxunto do termo municipal, co propósito de garantir a súa conservación e bo estado.

Estas actuacións céntranse en levar a cabo tarefas de acondicionamento, limpeza e revisión destes espazos, intervindo de maneira progresiva nas distintas parroquias.

O obxectivo é preservar uns elementos que forman parte do patrimonio etnográfico de Ribadumia, mantendo a súa funcionalidade e contribuíndo a mellorar a súa imaxe e accesibilidade tanto para a veciñanza como para as persoas visitantes.

Desde o goberno local subliñan que este tipo de intervencións permiten conservar a identidade do municipio, ao tempo que se poñen en valor espazos que tiveron e seguen tendo unha importante presenza na vida diaria das parroquias. Ademais, desenvolver este tipo de actuacións de maneira periódica, reafirma o seu compromiso coa protección e coidado do patrimonio común.

Arquivo/s adxunto/s

NP - A FOODTRUCK “O SABOR DAS RÍAS BAIXAS” CHEGA A RIBADUMIA PARA PROMOCIONAR A GASTRONOMÍA PROVINCIAL 01/4/26

. Ribadumia recibíu hoxe a foodtruck da campaña “O Sabor das Rías Baixas”, unha iniciativa impulsada por Turismo Rías Baixas da Deputación de Pontevedra que busca poñer en valor a riqueza gastronómica da provincia a través da degustación de produtos e receitas tradicionais.

Instalada na Praza do Concello ata as 18:30 horas, esta proposta permite á veciñanza e ás persoas visitantes degustar de balde unha selección de petiscos inspirados na gastronomía das Rías Baixas. Esta mañá todas as persoas que se achegaron puideron probar elaboracións como croquetas de cocido e de polbo, tella de xamón, ruliño de lacón con grelos ou empanada de atún.

A iniciativa continuará tamén nos vindeiros días, trasladándose mañá e o venres ao campo de fútbol de A Senra, en horario de 11:00 a 14:00 e de 17:00 a 20:00 horas, ampliando así a súa presenza no municipio.

A través desta campaña, ofrécense tapas inspiradas nas festas de interese turístico que se celebran na provincia, combinando promoción gastronómica e difusión cultural, nun formato dinámico e accesible para todos os públicos.

Desde o Concello de Ribadumia animan á veciñanza a achegarse e participar nesta actividade, que contribúe a promocionar a gastronomía como un dos principais atractivos turísticos do territorio.

Arquivo/s adxunto/s

NP - A OFICINA DE TURISMO DE RIBADUMIA ABRE AS SÚAS PORTAS EN SEMANA SANTA 27/3/26

O Concello de Ribadumia informa da apertura da Oficina de Turismo durante a Semana Santa, dende hoxe 27 de marzo ata o 6 de abril, co obxectivo de ofrecer información sobre os diferentes atractivos turísticos do noso municipio aos numerosos visitantes que se agardan nestas datas.

Como vén sendo habitual nos últimos anos, a Semana Santa convértese nun momento de gran afluencia turística no municipio, impulsada, entre outras cousas, polos numerosos peregrinos que percorren a Variante Espiritual - Ruta do Padre Sarmiento do Camiño de Santiago, que atravesa o noso municipio. Así como polo turismo deportivo, ao acoller nestas datas a Fase Previa do torneo alevín Arousa Fútbol 7. A combinación de turismo deportivo, rural e cultural fai de Ribadumia un destino atractivo tanto para visitantes como para a veciñanza da contorna.

A oficina estará operativa de martes a venres en horario de mañá e tarde, de 9:30 a 13:30 e de 16:30 a 19:30 horas. Os sábados, domingos e días festivos atenderá en horario de mañá, de 9:00 a 13:30 horas, mentres que os luns permanecerá pechada.

Para máis información, as persoas interesadas en recibir información poden contactar directamente coa Oficina de Turismo no teléfono 986 710 499.

Arquivo/s adxunto/s

NP - O CONCELLO DE RIBADUMIA PON A PUNTO OS CEMITERIOS DE CARA Á SEMANA SANTA 27/3/26

O Concello de Ribadumia está a levar a cabo nestes días diferentes tarefas de limpeza e mantemento nos cemiterios municipais, co obxectivo de que estes espazos se atopen en perfectas condicións para as visitas que se agardan coincidindo coa celebración da Semana Santa.

Como é habitual nestas datas, os operarios municipais están a realizar labores integrais de posta a punto, tanto no interior como nos accesos exteriores dos camposantos. Entre os traballos que se están a desenvolver inclúense tarefas de desbroce, limpeza de zonas axardinadas e espazos comúns, revisión dos puntos de luz e acondicionamento xeral das instalacións.

Estas actuacións permiten garantir o bo estado dos cemiterios e reforzar a seguridade das persoas visitantes, nunhas datas nas que aumenta a afluencia de veciños e veciñas a estes espazos.

Con estas accións, o Concello de Ribadumia continúa traballando para ofrecer espazos públicos coidados e accesibles, mantendo en óptimas condicións lugares de especial significado para a veciñanza.

Arquivo/s adxunto/s

NP - AVANZAN AS OBRAS DE MELLORA DA SEGURIDADE VIARIA NA EP-9305 AO SEU PASO POR LEIRO 26/3/26

O Concello de Ribadumia informa de que avanzan os traballos de mellora da seguridade viaria que a Deputación de Pontevedra está a levar a cabo na estrada EP-9305 Coirón-Ribadumia-Leiro, ao seu paso pola parroquia de Leiro.

A actuación consiste na execución de cunetas transitables de seguridade nun treito de 125 metros lineais da vía, unha intervención que permitirá mellorar tanto a drenaxe da estrada como a seguridade do tráfico rodado. Estas cunetas configuran espazos que facilitan que os vehículos poidan reconducir a súa traxectoria en caso de saída da calzada, reducindo así o risco de accidentes.

Esta intervención forma parte dun conxunto máis amplo de actuacións incluídas no acordo marco do ente provincial, concretamente no lote 2, cun investimento global de máis de 738.000 euros en estradas provinciais situadas no termo municipal de Ribadumia.

Ademais desta obra na EP-9305, o programa tamén incluíu actuacións na estrada EP-9501, que xa foron executadas, contribuíndo á mellora da rede viaria do municipio.

Dende o Concello de Ribadumia destacan a importancia de seguir avanzando na mellora da seguridade viaria nas estradas que atravesan o municipio, atendendo ás necesidades da veciñanza e reforzando a colaboración entre administracións para executar actuacións que repercutan directamente no benestar e na seguridade de todos os usuarios da vía.

Arquivo/s adxunto/s